ਓਟਵਾ, 11 ਮਈ (ਪੋਸਟ ਬਿਊਰੋ) : ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵੱਲੋਂ ਆਪਣੇ ਵਿਦੇਸ਼ ਮੰਤਰੀ ਦੇ ਪਿੱਛੇ ਜਿਹੇ ਕੀਤੇ ਗਏ ਤੇ ਆਉਣ ਵਾਲੇ ਸਮੇਂ ਵਿੱਚ ਕੀਤੇ ਜਾਣ ਵਾਲੇ ਵਿਦੇਸ਼ ਦੌਰਿਆਂ ਨੂੰ ਕੰਮ ਨਾਲ ਸਬੰਧਤ ਜ਼ਰੂਰੀ ਦੌਰਿਆਂ ਦਾ ਦਰਜਾ ਦਿੱਤਾ ਗਿਆ। ਉਨ੍ਹਾਂ ਕੈਨੇਡੀਅਨਾਂ ਨੂੰ ਭਰੋਸਾ ਦਿਵਾਇਆ ਕਿ ਕੁਆਰਨਟੀਨ ਤੇ ਟੈਸਟਿੰਗ ਸਬੰਧੀ ਸਾਰੀਆਂ ਸ਼ਰਤਾਂ ਪੂਰੀਆਂ ਕੀਤੀਆਂ ਜਾਣਗੀਆਂ।
ਇਹ ਪੁੱਛੇ ਜਾਣ ਉੱਤੇ ਕਿ ਕੌਮਾਂਤਰੀ ਟਰੈਵਲ ਦੇ ਸਬੰਧ ਵਿੱਚ ਸਰਕਾਰ ਦੋਹਰੇ ਮਾਪਦੰਡ ਕਿਉਂ ਅਪਣਾ ਰਹੀ ਹੈ, ਇੱਕ ਪਾਸੇ ਤਾਂ ਕੌਮਾਂਤਰੀ ਟਰੈਵਲ ਇੱਕ ਸਾਲ ਤੋਂ ਬੰਦ ਕੀਤਾ ਗਿਆ ਹੈ ਪਰ ਵਿਦੇਸ਼ ਮੰਤਰੀ ਮਾਰਕ ਗਾਰਨਿਊ ਉੱਤੇ ਇਸ ਤਰ੍ਹਾਂ ਦੀ ਕੋਈ ਰੋਕ ਨਹੀਂ ਲਾਈ ਗਈ, ਟਰੂਡੋ ਨੇ ਆਖਿਆ ਕਿ ਉਨ੍ਹਾਂ ਦੀ ਸਰਕਾਰ ਨੇ ਹਮੇਸ਼ਾਂ ਅਸੈਂਸ਼ੀਅਲ ਟਰੈਵਲ ਉੱਤੇ ਜ਼ੋਰ ਦਿੱ਼ਤਾ ਗਿਆ ਹੈ।
ਓਟਵਾ ਵਿੱਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਟਰੂਡੋ ਨੇ ਆਖਿਆ ਕਿ ਹਜ਼ਾਰਾਂ ਦੀ ਗਿਣਤੀ ਵਿੱਚ ਫੂਡ ਤੇ ਅਸੈਂਸ਼ੀਅਲ ਵਸਤਾਂ ਨਾਲ ਭਰੇ ਹਜ਼ਾਰਾਂ ਟਰੱਕ ਅਮਰੀਕਾ ਦਾ ਬਾਰਡਰ ਕਰੌਸ ਕਰਦੇ ਹਨ।ਅਸੀਂ ਅਸੈਂਸ਼ੀਅਲ ਟਰੈਵਲ ਤੋਂ ਤਾਂ ਮਨ੍ਹਾਂ ਨਹੀਂ ਕਰਦੇ, ਪਰ ਹਮੇਸ਼ਾਂ ਇਹ ਸਵਾਲ ਬਣਿਆ ਰਹਿੰਦਾ ਹੈ ਕਿ ਅਸੈਂਸ਼ੀਅਲ ਟਰੈਵਲ ਹੈ ਕੀ ਤੇ ਕੀ ਇਸ ਦੌਰਾਨ ਨਿਯਮਾਂ ਦੀ ਪਾਲਣਾ ਕੀਤੀ ਜਾਵੇਗੀ।
ਜਿ਼ਕਰਯੋਗ ਹੈ ਕਿ ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਜੀ-7 ਦੇਸ਼ਾਂ ਦੇ ਵਿਦੇਸ਼ ਤੇ ਵਿਕਾਸ ਮੰਤਰੀਆਂ ਦੀ ਇਨ ਪਰਸਨ ਮੀਟਿੰਗ ਵਿੱਚ ਹਿੱਸਾ ਲੈਣ ਲਈ ਗਾਰਨਿਊ ਯੂਕੇ ਗਏ ਸਨ।ਅਗਲੇ ਹਫਤੇ ਆਈਸਲੈਂਡ ਵਿੱਚ ਆਰਕਟਿਕ ਕਾਊਂਸਲ ਦੀ ਮੰਤਰੀ ਪੱਧਰ ਦੀ 12ਵੀਂ ਇਨ ਪਰਸਨ ਮੀਟਿੰਗ ਵਿੱਚ ਵੀ ਗਾਰਨਿਊ ਦੇ ਹਿੱਸਾ ਲੈਣ ਦੀ ਸੰਭਾਵਨਾ ਹੈ।ਟਰੂਡੋ ਨੇ ਇਹ ਵੀ ਆਖਿਆ ਕਿ ਉਨ੍ਹਾਂ ਨੂੰ ਪੂਰੀ ਆਸ ਹੈ ਕਿ ਅਗਲੇ ਮਹੀਨੇ ਯੂ ਕੇ ਵਿੱਚ ਹੋਣ ਵਾਲੀ ਜੀ-7 ਆਗੂਆਂ ਦੀ ਮੀਟਿੰਗ ਵਿੱਚ ਉਹ ਹਿੱਸਾ ਲੈ ਪਾਉਣਗੇ।