ਚੰਡੀਗੜ੍ਹ, 8 ਮਈ (ਪੋਸਟ ਬਿਊਰੋ)- ਤਿੰਨ ਸਾਲ ਪਹਿਲਾਂ ਆਈ ਡੀ ਬੀ ਆਈ ਬੈਂਕ ਦੇ ਨਾਲ 17 ਕਰੋੜ 29 ਲੱਖ ਰੁਪਏ ਦੀ ਠੱਗੀ ਦਾ ਕੇਸ ਦਰਜ ਹੋਇਆ ਸੀ, ਜਿਸ ਦੀ ਜਾਂਚ ਸੀ ਬੀ ਆਈ ਕਰ ਰਹੀ ਹੈ, ਪਰ ਅਜੇ ਤੱਕ ਕੋਰਟ ਵਿੱਚ ਇਸ ਕੇਸ ਦਾ ਟ੍ਰਾਇਲ ਸ਼ੁਰੂ ਨਹੀਂ ਹੋ ਸਕਿਆ। ਕਾਰਨ ਇਹ ਹੈ ਕਿ ਇਸ ਕੇਸ ਵਿੱਚ ਮੁੱਖ ਦੋਸ਼ੀ ਅੰਕੁਸ਼ ਸੂਦ ਤੇ ਉਸ ਦੀ ਪਤਨੀ ਸਲੋਨੀ ਸੂਦ ਨਿਊਜੀਲੈਂਡ ਭੱਜ ਗਏ ਹਨ। ਇਨ੍ਹਾਂ ਨੂੰ ਵਾਪਸ ਇੰਡੀਆ ਲਿਆ ਕੇ ਕੋਰਟ ਵਿੱਚ ਪੇਸ਼ ਕਰਨ ਲਈ ਸੀ ਬੀ ਆਈ ਵੱਲੋਂ ਲਗਾਤਾਰ ਯਤਨ ਕੀਤੇ ਜਾ ਰਹੇ ਹਨ।
ਇਸ ਸੰਬੰਧ ਵਿੱਚ ਸੀ ਬੀ ਆਈ ਦੀ ਅਦਾਲਤ ਨੇ ਇਨ੍ਹਾਂ ਦੋ ਦੋਸ਼ੀਆਂ ਨੂੰ ਉਨ੍ਹਾਂ ਦੇ ਨਿਊਜ਼ੀਲੈਂਡ ਦੇ ਐਡਰੈੱਸ ਉੱਤੇ ਨੋਟਿਸ ਜਾਰੀ ਕੀਤਾ ਹੈ। ਕੋਰਟ ਨੇ ਗ੍ਰਹਿ ਮੰਤਰਾਲੇ ਦੇ ਰਾਹੀਂ ਨਿਊਜ਼ੀਲੈਂਡ ਵਿੱਚ ਕੌਂਸਲੇਟ ਆਫ ਇੰਡੀਆ ਨੂੰ ਨੋੋਟਿਸ ਭੇਜੇ ਹਨ, ਪਰ ਉਸਦਾ ਕੋਈ ਜਵਾਬ ਨਹੀਂ ਮਿਲਿਆ, ਇਸ ਲਈ ਗ੍ਰਹਿ ਮੰਤਰਾਲੇ ਨੂੰ ਰਿਮਾਈਂਡਰ ਭੇਜਿਆ ਹੈ। ਇਸ ਕੇਸ ਦੀ ਅਗਲੀ ਸੁਣਵਾਈ 13 ਮਈ ਨੂੰ ਹੋਵੇਗੀ। ਜੇ ਅਜੇ ਵੀ ਦੋਸ਼ੀ ਕੋਰਟ ਵਿੱਚ ਪੇਸ਼ ਨਹੀਂ ਹੋਏ ਤਾਂ ਸੀ ਬੀ ਆਈ ਉਨ੍ਹਾਂ ਨੂੰ ਭਗੌੜਾ ਐਲਾਨ ਕਰਨ ਦੀ ਪ੍ਰਕਿਰਿਆ ਸ਼ੁਰੂ ਕਰ ਸਕਦੀ ਹੈ।
ਅੰਕੁਸ਼ ਸੂਦ ਨੇ ਸੱਤ ਫਰਵਰੀ 2009 ਨੂੰ ਆਈ ਡੀ ਬੀ ਆਈ ਦੇ ਡੀ ਜੀ ਐਮ ਕੋਲ ਕਰਜ਼ੇ ਵਾਸਤੇ ਅਪਲਾਈ ਕੀਤਾ ਸੀ। ਜਾਂਚ ਵਿੱਚ ਪਤਾ ਲੱਗਾ ਕਿ ਅੰਕੁਸ਼ ਨੇ ਕਰਜ਼ਾ ਲੈਣ ਸਮੇਂ ਕੰਪਨੀ ਦੇ ਜੋ ਡਾਕੂਮੈਂਟਸ ਜਮ੍ਹਾ ਕਰਵਾਏ ਸਨ ਅਤੇ ਉਹ ਫਰਜ਼ੀ ਨਿਕਲੇ ਸਨ। ਸੀ ਬੀ ਆਈ ਨੇ ਆਈ ਡੀ ਬੀ ਆਈ ਸੈਕਟਰ-17 ਦੇ ਡੀ ਜੀ ਐਮ ਜਤਿੰਦਰ ਦੀ ਸ਼ਿਕਾਇਤਉੱਤੇ ਐਸ ਐਸ ਟੈਕਨੋ ਕੰਸਲਟੈਂਟ ਪ੍ਰਾਈਵੇਟ ਲਿਮਿਟਿਡ, ਏ ਏ ਏ, ਐਡਪਲਾਸਟ ਪ੍ਰਾਈਵੇਟ ਲਿਮਿਟਿਡ, ਨਿਊਟਾਈਮ ਕਾਨਟ੍ਰੈਕਟਰਸ ਅਤੇ ਬਿਲਡਰਸ ਪ੍ਰਾਈਵੇਟ ਲਿਮਿਟਿਡ, ਅੰਕੁਸ਼ ਸੂਦ, ਸਲੋਨੀ ਅਤੇ ਸੰਜੀਵ ਦੇ ਖ਼ਿਲਾਫ਼ ਕੇਸ ਕੀਤਾ ਹੈ।