ਓਟਵਾ, 7 ਮਈ (ਪੋਸਟ ਬਿਊਰੋ) : ਫੈਡਰਲ ਸਰਕਾਰ ਵੱਲੋਂ ਵਰਲਡ ਹੈਲਥ ਆਰਗੇਨਾਈਜ਼ੇਸ਼ਨ ਦੇ ਐਕਸੈੱਸ ਕੋਵਿਡ-19 ਟੂਲਜ਼ ਐਕਸੇਲਰੇਟਰ ਪ੍ਰੋਗਰਾਮ ਲਈ 375 ਮਿਲੀਅਨ ਡਾਲਰ ਦਾ ਹੋਰ ਯੋਗਦਾਨ ਪਾਇਆ ਜਾ ਰਿਹਾ ਹੈ। ਇਹ ਜਾਣਕਾਰੀ ਸ਼ੁੱਕਰਵਾਰ ਨੂੰ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵੱਲੋਂ ਦਿੱਤੀ ਗਈ।
ਟਰੂਡੋ ਦਾ ਕਹਿਣਾ ਹੈ ਕਿ ਇਨ੍ਹਾਂ ਫੰਡਾਂ ਨਾਲ ਘੱਟ ਤੇ ਦਰਮਿਆਨੀ ਆਮਦਨ ਵਾਲੇ ਮੁਲਕਾਂ ਵਿੱਚ ਡਾਇਗਨੌਸਟਿਕਜ਼, ਥੈਰੇਪਿਊਟਿਕਸ ਅਤੇ ਵੈਕਸੀਨਜ਼ ਨੂੰ ਵਿਕਸਤ ਕਰਨ, ਤਿਆਰ ਕਰਨ ਤੇ ਵੰਡਣ ਵਿੱਚ ਮਦਦ ਮਿਲੇਗੀ। ਟਰੂਡੋ ਨੇ ਆਖਿਆ ਕਿ ਕੈਨੇਡਾ ਵਿੱਚ ਤੇ ਹੋਰਨਾਂ ਦੇਸ਼ਾਂ ਵਿੱਚ ਮਹਾਂਮਾਰੀ ਨੂੰ ਖਤਮ ਕਰਨ ਲਈ ਸਾਨੂੰ ਵਾਇਰਸ ਤੇ ਇਸ ਦੇ ਹੋਰਨਾਂ ਵੇਰੀਐਂਟਸ ਨਾਲ ਲੜਨ ਦੀ ਲੋੜ ਹੈ।ਇਸੇ ਲਈ ਸਾਰੇ ਦੇਸ਼ਾਂ ਦੀ ਵੈਕਸੀਨਜ਼ ਤੱਕ ਅਤੇ ਇਲਾਜ ਤੱਕ ਪਹੁੰਚ ਹੋਣੀ ਚਾਹੀਦੀ ਹੈ ਅਤੇ ਸਾਨੂੰ ਇਹ ਯਕੀਨੀ ਬਣਾਉਣਾ ਚਾਹੀਦਾ ਹੈ ਕਿ ਇਸ ਲੜਾਈ ਵਿੱਚ ਕੋਈ ਵੀ ਪਿੱਛੇ ਨਾ ਰਹੇ।
ਪ੍ਰਧਾਨ ਮੰਤਰੀ ਨੇ ਆਖਿਆ ਕਿ ਇਸ ਸਮੇਂ ਭਾਰਤ ਜਿਸ ਸੰਕਟ ਵਿੱਚੋਂ ਲੰਘ ਰਿਹਾ ਹੈ ਉਸ ਦੀ ਮਦਦ ਲਈ ਕੈਨੇਡੀਅਨ ਰੈੱਡ ਕਰੌਸ ਰਾਹੀਂ 10 ਮਿਲੀਅਨ ਡਾਲਰ ਭੇਜੇ ਗਏ ਹਨ।ਉਨ੍ਹਾਂ ਆਖਿਆ ਕਿ ਇਸ ਤੋਂ ਇਲਾਵਾ ਵੈਂਟੀਲੇਟਰਜ਼ ਦੇ ਨਾਲ ਨਾਲ ਐਂਟੀ ਵਾਇਰਲ ਵੈਕਸੀਨ ਨਾਲ ਲੱਦਿਆ ਇੱਕ ਕਾਰਗੋ ਜਹਾਜ਼ ਵੀ ਭਾਰਤ ਭੇਜਿਆ ਗਿਆ ਹੈ ਤੇ ਅਜੇ ਹੋਰ ਮਦਦ ਵੀ ਦਿੱਤੀ ਜਾਵੇਗੀ।ਟਰੂਡੋ ਨੇ ਆਖਿਆ ਕਿ ਭਾਰਤ ਭੇਜੀ ਜਾਣ ਵਾਲੀ ਸਪਲਾਈ ਵਾਧੂ ਸਪਲਾਈ ਸੀ ਤੇ ਇਸ ਲਈ ਕੈਨੇਡੀਅਨ ਲੋੜ ਨਾਲ ਕੋਈ ਸਮਝੌਤਾ ਨਹੀਂ ਕੀਤਾ ਗਿਆ।
ਇਸ ਤੋਂ ਇਲਾਵਾ ਫੈਡਰਲ ਸਰਕਾਰ ਨੇ ਨਿੱਕੇ ਤੇ ਮੀਡੀਅਮ ਬਿਜ਼ਨਸਾਂ ਦੇ ਰੈਪਿਡ ਕੋਵਿਡ-19 ਟੈਸਟਸ ਨੂੰ ਸੁਖਾਲਾ ਬਣਾਉਣ ਲਈ ਨਵਾਂ ਪੋਰਟਲ ਕਾਇਮ ਕੀਤਾ ਹੈ। ਉਨ੍ਹਾਂ ਆਖਿਆ ਕਿ ਟੈਸਟਿੰਗ ਨਾਲ ਹੀ ਫਾਇਦਾ ਹੈ।