ਟੋਰਾਂਟੋ, 6 ਮਈ (ਪੋਸਟ ਬਿਊਰੋ) : ਪਿੱਛੇ ਜਿਹੇ ਟੋਰਾਂਟੋ ਪੀਅਰਸਨ ਇੰਟਰਨੈਸ਼ਨਲ ਏਅਰਪੋਰਟ ਪਹੁੰਚੇ ਦੋ ਵਿਅਕਤੀਆਂ ਵੱਲੋਂ ਕੋਵਿਡ-19 ਸਬੰਧੀ ਜਾਅਲੀ ਪ੍ਰੀ ਡਿਪਾਰਚਰ ਟੈਸਟ ਰਿਜ਼ਲਟ ਪੇਸ਼ ਕਰਨ ਉੱਤੇ ਉਨ੍ਹਾਂ ਨੂੰ ਹਜ਼ਾਰਾਂ ਡਾਲਰ ਦਾ ਜੁਰਮਾਨਾ ਕੀਤਾ ਗਿਆ ਹੈ।
ਵੀਰਵਾਰ ਸਵੇਰੇ ਟਰਾਂਸਪੋਰਟ ਕੈਨੇਡਾ ਵੱਲੋਂ ਜਾਰੀ ਕੀਤੀ ਗਈ ਨਿਊਜ਼ ਰਲੀਜ਼ ਵਿੱਚ ਆਖਿਆ ਗਿਆ ਕਿ ਪਹਿਲੇ ਪੈਸੈਂਜਰ ਨੂੰ 8 ਫਰਵਰੀ ਨੂੰ ਡੌਮਨਿਕਨ ਰਿਪਬਲਿਕ ਤੋਂ ਟੋਰਾਂਟੋ ਆਉਣ ਉੱਤੇ ਸੋਧਿਆ ਹੋਇਆ ਕੋਵਿਡ-19 ਟੈਸਟ ਪੇਸ਼ ਕਰਨ ਉੱਤੇ 2500 ਡਾਲਰ ਦਾ ਜੁਰਮਾਨਾ ਕੀਤਾ ਗਿਆ। ਦੂਜਾ ਪੈਸੈਂਜਰ ਜਿਹੜਾ ਅਮਰੀਕਾ ਤੋਂ 3 ਅਪਰੈਲ ਨੂੰ ਟੋਰਾਂਟੋ ਆਇਆ, ਨੂੰ ਜਾਅਲੀ ਕੋਵਿਡ-19 ਟੈਸਟ ਰਿਪੋਰਟ ਪੇਸ਼ ਕਰਨ ਉੱਤੇ 6,500 ਡਾਲਰ ਦਾ ਜੁਰਮਾਨਾ ਕੀਤਾ ਗਿਆ। ਫੈਡਰਲ ਏਜੰਸੀ ਨੇ ਦੋਸ ਲਾਇਆ ਕਿ ਇਨ੍ਹਾਂ ਪੈਸੈਂਜਰਜ਼ ਵੱਲੋਂ ਆਪਣੀ ਹੈਲਥ ਸਬੰਧੀ ਸਟੇਟਸ ਬਾਰੇ ਏਅਰਲਾਈਨ ਨੂੰ ਵੀ ਝੂਠੀ ਸਟੇਟਮੈਂਟ ਦਿੱਤੀ ਗਈ।
ਨਵੇਂ ਨਿਯਮਾਂ ਅਨੁਸਾਰ ਏਅਰ ਟਰੈਵਲਰਜ਼ ਨੂੰ ਕੈਨੇਡਾ ਲਈ ਰਵਾਨਾ ਹੋਣ ਤੋਂ 72 ਘੰਟੇ ਪਹਿਲਾਂ ਕਰਵਾਏ ਗਏ ਕੋਵਿਡ-19 ਟੈਸਟ ਦੀ ਨੈਗੇਟਿਵ ਰਿਪੋਰਟ ਪੇਸ਼ ਕਰਨੀ ਹੁੰਦੀ ਹੈ।ਮਹਾਂਮਾਰੀ ਕਾਰਨ ਵਿਗੜੇ ਹਾਲਾਤ ਕਾਰਨ ਹੀ ਇਹ ਫੈਸਲਾ ਕੀਤਾ ਗਿਆ ਹੈ ਤੇ ਇਸ ਦੀ ਉਲੰਘਣਾ ਕਰਨ ਵਾਲਿਆਂ ਨੂੰ ਜੁਰਮਾਨਾ ਵੀ ਕੀਤਾ ਗਿਆ ਹੈ।