ਓਨਟਾਰੀਓ, 6 ਮਈ (ਪੋਸਟ ਬਿਊਰੋ) : ਅੱਜ ਤੋਂ ਓਨਟਾਰੀਓ ਭਰ ਵਿੱਚ ਕੋਵਿਡ-19 ਵੈਕਸੀਨ ਲਵਾਉਣ ਲਈ ਉਮਰ ਦੀ ਹੱਦ ਘਟਾ ਕੇ 50 ਸਾਲ ਤੇ ਇਸ ਤੋਂ ਵੱਧ ਕਰ ਦਿੱਤੀ ਹੈ।
ਇਸ ਦੇ ਨਾਲ ਹੀ ਅਸੈਂਸ਼ੀਅਲ ਵਰਕਰਜ਼, ਸਿਹਤ ਨਾਲ ਸਬੰਧਤ ਹਾਈ ਰਿਸਕ ਲੋਕਾਂ, ਫਰਸਟ ਨੇਸ਼ਨ, ਇਨੁਇਟ ਤੇ ਮੈਟਿਸ ਲੋਕ, ਜਿਹੜੇ ਇਮਿਊਨਾਈਜ਼ੇਸ਼ਨ ਦੀ ਪਹਿਲੀ ਡਰਾਈਵ ਵਿੱਚ ਸ਼ਾਮਲ ਨਹੀਂ ਸਨ, ਵੀ ਹੁਣ ਯੋਗ ਹੋ ਗਏ ਹਨ।ਇਨ੍ਹਾਂ ਗਰੁੱਪ ਆਫ ਵਰਕਰਜ਼ ਵਿੱਚ ਐਲੀਮੈਂਟਰੀ ਤੇ ਸੈਕੰਡਰੀ ਸਕੂਲ ਵਰਕਰਜ਼, ਚਿਲਡਰਨ ਕੇਅਰ ਵਰਕਰਜ਼, ਫੂਡ ਤੇ ਮੈਨੂਫੈਕਚਰਿੰਗ ਵਰਕਰਜ਼, ਖੇਤੀਬਾੜੀ ਤੇ ਫਾਰਮਵਰਕਰਜ਼ ਸ਼ਾਮਲ ਹਨ।
ਪ੍ਰੋਵਿੰਸ ਦੇ ਆਨਲਾਈਨ ਬੁਕਿੰਗ ਸਿਸਟਮ ਦੀ ਵਰਤੋਂ ਕਰਕੇ ਜਾਂ ਸਵੇਰੇ 8:00 ਵਜੇ ਸ਼ੁਰੂ ਹੋਣ ਵਾਲੇ ਕਾਲ ਸੈਂਟਰ ਰਾਹੀਂ ਯੋਗ ਰੈਜ਼ੀਡੈਂਟਸ ਮਾਸ ਵੈਕਸੀਨੇਸ਼ਨ ਕਲੀਨਿਕਸ ਵਿਖੇ ਆਪਣੀਆਂ ਅਪੁਆਇੰਟਮੈਂਟਸ ਬੁੱਕ ਕਰਵਾ ਸਕਦੇ ਹਨ। ਆਪਣੇ ਬੁਕਿੰਗ ਸਿਸਟਮ ਦੀ ਵਰਤੋਂ ਕਰਨ ਵਾਲੀਆਂ ਪਬਲਿਕ ਹੈਲਥ ਯੂਨਿਟਸ ਰਾਹੀਂ ਵੀ ਲੋਕ ਇਹ ਅਪੁਆਇੰਟਮੈਂਟ ਬੁੱਕ ਕਰਵਾ ਸਕਦੇ ਹਨ। ਜੇ ਸਪਲਾਈ ਜਾਰੀ ਰਹਿੰਦੀ ਹੈ ਤਾਂ ਪ੍ਰੋਵਿੰਸ ਵੱਲੋਂ 24 ਮਈ ਵਾਲੇ ਹਫਤੇ ਵਿੱਚ 18 ਸਾਲ ਤੇ ਇਸ ਤੋਂ ਵੱਧ ਉਮਰ ਦੇ ਲੋਕਾਂ ਨੂੰ ਵੀ ਵੈਕਸੀਨੇਟ ਕੀਤਾ ਜਾਵੇਗਾ।
ਸਿਹਤ ਮੰਤਰੀ ਕ੍ਰਿਸਟੀਨ ਐਲੀਅਟ ਨੇ ਆਖਿਆ ਕਿ ਸੋਧੇ ਹੋਏ ਵੈਕਸੀਨ ਟਾਰਗੈਟ ਤੋਂ ਭਾਵ ਹੈ ਕਿ 7·9 ਮਿਲੀਅਨ ਲੋਕਾਂ ਨੂੰ ਇਸ ਮਹੀਨੇ ਦੇ ਅੰਤ ਤੱਕ ਵੈਕਸੀਨ ਦੀ ਪਹਿਲੀ ਡੋਜ਼ ਮਿਲ ਜਾਵੇਗੀ। ਪੀਲ ਰੀਜਨ ਵਿੱਚ ਵੀਰਵਾਰ ਸਵੇਰ ਤੱਕ ਸਾਰੇ ਬਾਲਗ ਸ਼ੌਟ ਲਈ ਯੋਗ ਹੋ ਜਾਣਗੇ।