ਬਰਲਿਨ, 3 ਮਈ (ਪੋਸਟ ਬਿਊਰੋ)- ਬਰਲਿਨ ਵਿੱਚ ਮਈ ਦਿਵਸ ਬਾਰੇਰਿਵਾਇਤੀ ਰੈਲੀਆਂ ਦੇ ਹਿੰਸਕ ਹੋਣ ਕਾਰਨ ਪੰਜਾਹ ਤੋਂ ਵੱਧ ਪੁਲਸ ਵਾਲੇ ਜ਼ਖਮੀ ਹੋ ਗਏ। ਇਸ ਦੌਰਾਨ 250 ਤੋਂ ਵੱਧ ਪ੍ਰਦਰਸ਼ਨਕਾਰੀਆਂ ਨੂੰ ਹਿਰਾਸਤ ਵਿੱਚ ਲਿਆ ਗਿਆ। ਇਹ ਜਾਣਕਾਰੀ ਜਰਮਨੀ ਪੁਲਸ ਯੂਨੀਅਨ ਨੇ ਦਿੱਤੀ ਹੈ।
ਜਰਮਨੀ ਪੁਲਸ ਮੁਤਾਬਕ ਕੱਲ੍ਹ ਮਈ ਦਿਵਸ ਮੌਕੇ ਦੇਸ਼ ਦੀ ਰਾਜਧਾਨੀ ਵਿੱਚ ਵੀਹ ਤੋਂ ਵੱਧ ਥਾਵਾਂ ਉਤੇ ਰੈਲੀਆਂ ਹੋਈਆਂ ਅਤੇ ਇਨ੍ਹਾਂ ਵਿੱਚੋਂ ਬਹੁਤੀਆਂ ਸ਼ਾਂਤਮਈ ਰਹੀਆਂ। ਇਸ ਦੌਰਾਨ 8000 ਲੋਕਾਂ ਦਾ ਇੱਕ ਖੱਬੇ ਪੱਖੀ ਮਾਰਚ ਸ਼ਹਿਰ ਦੇ ਨਿਊਕੋਇਲਨ ਤੇ ਕਰਿਊਜ਼ਬਰਗ ਇਲਾਕਿਆਂ ਤੋਂ ਨਿਕਲਿਆ, ਜੋ ਹਿੰਸਕ ਹੋ ਗਿਆ। ਇਨ੍ਹਾਂ ਇਲਾਕਿਆਂ ਵਿੱਚ ਪਿਛਲੇ ਦਹਾਕਿਆਂ ਵਿੱਚ ਵੀ ਝੜਪਾਂ ਹੁੰਦੀਆਂ ਰਹੀਆਂ ਹਨ। ਇਸ ਦੌਰਾਨ ਪ੍ਰਦਰਸ਼ਨਕਾਰੀਆਂ ਨੇ ਪੁਲਸ ਮੁਲਾਜ਼ਮਾਂ ਉਤੇ ਬੋਤਲਾਂ ਤੇ ਪੱਥਰ ਸੁੱਟੇ ਅਤੇ ਸੜਕਾਂ ਉੱਤੇ ਕੂੜੇਦਾਨ ਤੇ ਬੈਰੀਕੇਡ ਸਾੜ ਦਿੱਤੇ। ਬਰਲਿਨ ਪੁਲਸ ਦੇ ਉਪ ਮੁਖੀ ਸਟੀਫਨ ਕੈਲਮ ਨੇ ਦੱਸਿਆ, ‘‘ਸਾਡੇ ਕੋਲ ਕੋਈ ਪੱਕੀ ਗਿਣਤੀ ਨਹੀਂ ਹੈ, ਪਰ ਜਾਣਕਾਰੀ ਅਨੁਸਾਰ ਸਾਡੇ ਪੰਜਾਹ ਤੋਂ ਵੱਧ ਪੁਲਸ ਮੁਲਾਜ਼ਮ ਜ਼ਖਮੀ ਹੋਏ ਹਨ ਅਤੇ ਇਸ ਦੌਰਾਨ 250 ਤੋਂ ਵੱਧ ਪ੍ਰਦਰਸ਼ਨਕਾਰੀਆਂ ਨੂੰ ਹਿਰਾਸਤ ਵਿੱਚ ਲਿਆ ਹੈ।'' ਉਨ੍ਹਾਂ ਬੋਤਲਾਂ ਤੇ ਪੱਥਰ ਸੁੱਟਣ ਅਤੇ ਸੜਕਾਂ 'ਤੇ ਬੈਰੀਕੇਡ ਸਾੜੇ ਜਾਣ ਦੀ ਨਿਖੇਧੀ ਕੀਤੀ।