ਸੈਨ ਡਿਏਗੋ, 2 ਮਈ (ਪੋਸਟ ਬਿਊਰੋ) : ਸੈਨ ਡਿਏਗੋ ਦੇ ਤੱਟ ਨੇੜੇ ਇੱਕ ਬੋਟ ਦੇ ਪਲਟਣ ਤੇ ਟੁੱਟ ਜਾਣ ਕਾਰਨ ਤਿੰਨ ਵਿਅਕਤੀ ਮਾਰੇ ਗਏ ਜਦਕਿ ਦੋ ਦਰਜਨ ਤੋਂ ਵੱਧ ਨੂੰ ਹਸਪਤਾਲ ਭਰਤੀ ਕਰਵਾਉਣਾ ਪਿਆ। ਅਧਿਕਾਰੀਆ ਦਾ ਕਹਿਣਾ ਹੈ ਕਿ ਇਸ ਬੋਟ ਵਿੱਚ ਮਨੁੱਖੀ ਸਮਗਲਿੰਗ ਨੂੰ ਅੰਜਾਮ ਦਿੱਤਾ ਜਾ ਰਿਹਾ ਸੀ।
ਸੈਨ ਡਿਏਗੋ ਫਾਇਰ ਰੈਸਕਿਊ ਡਿਪਾਰਟਮੈਂਟ ਅਨੁਸਾਰ ਪੁਆਇੰਟ ਲੋਮਾ ਨੇੜੇ ਪਾਣੀ ਦੀਆਂ ਤੇਜ਼ ਛੱਲਾਂ ਕਾਰਨ ਬੋਟ ਪਲਟ ਗਈ, ਇਸ ਦਾ ਪਤਾ ਲੱਗਣ ਉੱਤੇ ਲਾਈਫਗਾਰਡਜ਼, ਅਮਰੀਕੀ ਕੋਸਟ ਗਾਰਡ ਤੇ ਹੋਰ ਏਜੰਸੀਆਂ ਮੌਕੇ ਉੱਤੇ ਪਹੁੰਚੀਆਂ। ਸੈਨ ਡਿਏਗੋ ਲਾਈਫਗਾਰਡ ਸਰਵਿਸਿਜ਼ ਦੇ ਲੈਫਟੀਨੈਂਟ ਰਿੱਕ ਰੋਮੇਰੋ ਨੇ ਦੱਸਿਆ ਕਿ ਪਹਿਲਾਂ ਤਾਂ ਸਾਨੂੰ ਲੱਗਿਆ ਕਿ ਬੋਟ ਵਿੱਚ ਸਵਾਰ ਥੋੜ੍ਹੇ ਜਿਹੇ ਲੋਕਾਂ ਨੂੰ ਬਚਾਉਣਾ ਹੋਵੇਗਾ ਪਰ ਰੈਸਕਿਊਅਰਜ਼ ਨੇ ਮੌਕੇ ਉੱਤੇ ਪਹੁੰਚ ਕੇ ਵੇਖਿਆ ਕਿ ਉੱਥੇ ਥੋੜ੍ਹੇ ਲੋਕ ਨਹੀਂ ਸਗੋਂ ਕਾਫੀ ਸਾਰੇ ਲੋਕਾਂ ਨੂੰ ਮਦਦ ਦੀ ਲੋੜ ਸੀ।
ਉਨ੍ਹਾਂ ਦੱਸਿਆ ਕਿ ਕਈ ਲੋਕ ਪਾਣੀ ਵਿੱਚ ਡੁੱਬਣ ਤੋਂ ਬਚਣ ਲਈ ਹੱਥ ਪੈਰ ਮਾਰ ਰਹੇ ਸਨ, ਕਈ ਪਾਣੀ ਦੇ ਤੇਜ਼ ਬਹਾਅ ਵਿੱਚ ਫਸ ਗਏ ਸਨ। ਰੋਮੇਰੋ ਨੇ ਦੱਸਿਆ ਕਿ ਸੱਤ ਵਿਅਕਤੀਆਂ ਨੂੰ ਪਾਣੀ ਵਿੱਚੋਂ ਕੱਢਿਆ ਗਿਆ, ਇਨ੍ਹਾਂ ਵਿੱਚ ਤਿੰਨ ਉਹ ਵਿਅਕਤੀ ਵੀ ਸ਼ਾਮਲ ਸਨ ਜਿਨ੍ਹਾਂ ਦੀ ਡੁੱੁਬਣ ਕਾਰਨ ਮੌਤ ਹੋ ਗਈ ਸੀ। ਇੱਕ ਵਿਅਕਤੀ ਨੂੰ ਚੱਟਾਨ ਕੋਲੋਂ ਬਚਾਇਆ ਗਿਆ ਜਦਕਿ 22 ਹੋਰ ਆਪਣੇ ਆਪ ਤੈਰ ਕੇ ਕਿਨਾਰੇ ਪਹੁੰਚ ਗਏ।
ਉਨ੍ਹਾਂ ਆਖਿਆ ਕਿ ਮੌਕੇ ਉੱਤੇ ਪਹੁੰਚ ਕੇ ਅਸੀਂ ਵੇਖਿਆ ਕਿ ਬੋਟ ਦੋ ਹਿੱਸਿਆਂ ਵਿੱਚ ਟੁੱਟ ਚੁੱਕੀ ਸੀ। ਹਾਲਾਤ ਬਹੁਤ ਨਾਸਾਜ਼ ਸਨ, 5 ਤੋਂ 6 ਫੁੱਟ ਤੱਕ ਦੀਆਂ ਲਹਿਰਾਂ ਉੱਠ ਰਹੀਆਂ ਸਨ ਤੇ ਤੇਜ਼ ਹਵਾਵਾਂ ਦੇ ਨਾਲ ਨਾਲ ਪਾਣੀ ਵੀ ਕਾਫੀ ਠੰਢਾ ਸੀ। 27 ਵਿਅਕਤੀਆਂ ਨੂੰ ਹਸਪਤਾਲ ਦਾਖਲ ਕਰਵਾਇਆ ਗਿਆ, ਉਨ੍ਹਾਂ ਨੂੰ ਕਈ ਤਰ੍ਹਾਂ ਦੀਆਂ ਸੱਟਾਂ ਲੱਗੀਆਂ ਸਨ ਤੇ ਕਈਆਂ ਨੂੰ ਹਾਈਪੋਥਰਮੀਆ ਵੀ ਹੋ ਗਿਆ ਸੀ। ਇਸ 40 ਫੁੱਟ ਲੰਮੀਂ ਕੈਬਿਨ ਕਰੂਜ਼ਰ ਸੀ ਜਿਸ ਵਿੱਚ ਲੋੜੋਂ ਵੱਧ ਲੋਕਾਂ ਨੂੰ ਬਿਠਾਇਆ ਗਿਆ ਸੀ। ਇਸ ਤਰ੍ਹਾਂ ਦੀਆਂ ਬੋਟਸ ਦੀ ਵਰਤੋਂ ਅਕਸਰ ਸਮਗਲਰਾਂ ਵੱਲੋਂ ਮੈਕਸਿਕੋ ਤੋਂ ਗੈਰਕਾਨੂੰਨੀ ਢੰਗ ਨਾਲ ਲੋਕਾਂ ਨੂੰ ਅਮਰੀਕਾ ਲਿਆਉਣ ਲਈ ਕੀਤੀ ਜਾਂਦੀ ਹੈ।
ਯੂਐਸ ਬਾਰਡਰ ਪੈਟਰੋਲ ਦੇ ਸੁਪਰਵਾਈਜਿ਼ੰਗ ਏਜੰਟ ਜੈੱਫ ਸਟੀਫਨਸਨ ਨੇ ਆਖਿਆ ਕਿ ਸਾਨੂੰ ਇਹੋ ਸ਼ੱਕ ਹੈ ਕਿ ਇਸ ਬੋਟ ਵਿੱਚ ਮਨੁੱਖੀ ਸਮਗਲਿੰਗ ਕੀਤੀ ਜਾ ਰਹੀ ਸੀ। ਉਨ੍ਹਾਂ ਆਖਿਆ ਕਿ ਅਜੇ ਕਿਸੇ ਵਿਅਕਤੀ ਦੀ ਨਾਗਰਿਕਤਾ ਦੀ ਪੁਸ਼ਟੀ ਨਹੀਂ ਕੀਤੀ ਜਾ ਸਕੀ ਹੈ।