ਭਰੂਚ, 2 ਮਈ (ਪੋਸਟ ਬਿਊਰੋ)- ਗੁਜਰਾਤ ਦੇ ਭਰੂਚ ਵਿੱਚ ਇੱਕ ਹਸਪਤਾਲ ਵਿੱਚ ਅੱਗ ਲੱਗਣ ਦੇ ਕਾਰਨ 18 ਕੋਰੋਨਾ ਮਰੀਜ਼ਾਂ ਦੀ ਮੌਤ ਹੋਣ ਦੀ ਖਬਰ ਆਈ ਹੈ। ਅੱਗ ਏਨੀ ਭਿਆਨਕ ਸੀ ਕਿ ਕਈ ਮਰੀਜ਼ ਤਾਂ ਸਟਰੈਚਰ ਅਤੇ ਬੈਡਾਂ ਉੱਤੇਜਿਊਂਦੇ ਸੜ ਗਏ। ਹਸਪਤਾਲ ਦੇ ਬਾਹਰ ਅਫਰਾ-ਤਫੜੀ ਵਾਲਾ ਮਾਹੌਲ ਬਣ ਗਿਆ ਅਤੇ ਅਧਿਕਾਰੀ ਪੀੜਤਾਂ ਦੇ ਸਕੇ-ਸੰਬੰਧੀਆਂ ਨੂੰ ਸ਼ਾਂਤ ਕਰ ਰਹੇ ਸਨ। ਆਈ ਸੀ ਯੂ ਵਿੱਚ ਵੈਂਟੀਲੇਟਰ, ਫਰਿੱਜ, ਬੈਡਾਂ ਸਮੇਤ ਸਾਰੇ ਜੰਤਰ ਵੀ ਸੜ ਗਏ। ਕਈ ਮ੍ਰਿਤਕਾਂ ਦੀ ਪਛਾਣ ਕਰਨੀ ਮੁਸ਼ਕਲ ਹੋ ਗਈ। ਇਸ ਚਾਰ ਮੰਜ਼ਿਲਾ ਵੈਲਫੇਅਰ ਹਸਪਤਾਲ ਵਿੱਚ ਕਰੀਬ ਪੰਜਾਹ ਦੂਸਰੇ ਮਰੀਜ਼ ਵੀ ਸਨ, ਜਦੋਂ ਦੇਰ ਰਾਤ ਇੱਕ ਵਜੇ ਇਸ ਦੀ ਕੋਰੋਨਾ ਵਾਰਡ ਵਿੱਚ ਅੱਗ ਲੱਗ ਗਈ।
ਅਧਿਕਾਰੀਆਂ ਨੇ ਦੱਸਿਆ ਕਿ ਇਨ੍ਹਾਂ ਮਰੀਜ਼ਾਂ ਨੂੰ ਸਥਾਨਕ ਲੋਕਾਂ ਅਤੇ ਤੁਰੰਤ ਅੱਗ ਬੁਝਾਊ ਅਮਲੇ ਨੇ ਬਚਾਅ ਕੇ ਹੋਰ ਹਸਪਤਾਲਾਂ ਵਿੱਚ ਦਾਖਲ ਕਰਵਾਇਆ। ਇੱਕ ਪੁਲਸ ਅਧਿਕਾਰੀ ਨੇ ਦੱਸਿਆ ਕਿ ਅੱਗ ਲੱਗਣ ਦੇ ਨਾਲ 12 ਮੌਤਾਂ ਦੀ ਪੁਸ਼ਟੀ ਹੋਈ ਸੀ, ਪਰ ਸਵੇਰੇ 6.30 ਵਜੇ ਤੱਕ ਮੌਤਾਂ ਦੀ ਗਿਣਤੀ 18 ਦੱਸ ਗਈ।