ਏਲਿਜਾਬੇਟਾ ਪੋਵੋਲੇਡੋ, 1 ਮਈ (ਪੋਸਟ ਬਿਊਰੋ)- ਰੋਮਨ ਕੈਥੇਲਿਕ ਚਰਚ ਦੇ ਸੀਨੀਅਰ ਅਹੁਦੇਦਾਰਾਂ ਵਿੱਚ ਕੁਰੱਪਸ਼ਨ ਦੀ ਲਾਗ ਰੋਕਣ ਲਈ ਪੋਪ ਫ੍ਰਾਂਸਿਸ ਨੇ ਕੱਲ੍ਹ ਆਦੇਸ਼ ਦਿੱਤਾ ਹੈ ਕਿ ਚਰਚ ਦੇ ਸਾਰੇ ਉਚ ਅਹੁਦੇਦਾਰ ਆਪਣੀ ਸੰਪਤੀ ਦਾ ਵੇਰਵਾ ਦੇਣ। ਇਸ ਆਦੇਸ਼ ਵਿੱਚ ਕਾਰਡਿਨਲ (ਵੱਡੇ ਪਾਦਰੀ) ਵੀ ਸ਼ਾਮਲ ਹਨ। ਆਦੇਸ਼ ਵਿੱਚਸਭ ਨੂੰ ਹਿਦਾਇਤ ਦਿੱਤੀ ਗਈ ਹੈ ਕਿ ਉਹ 50 ਡਾਲਰ ਦੇ ਉਪਰ ਦਾ ਤੋਹਫਾ ਸਵੀਕਾਰ ਕਰਨ ਤੋਂ ਬਚਣ।
ਆਪਣੇ ਆਦੇਸ਼ ਵਿੱਚ ਪੋਪ ਫ੍ਰਾਂਸਿਸ ਨੇ ਲਿਖਿਆ ਹੈ ਕਿ ਸਚਾਈ ਛੋਟੀ ਗੱਲਾਂ ਵਿੱਚ ਜੇ ਨਹੀਂ ਰਹੇਗੀ ਤਾਂ ਉਹ ਵੱਡੇ ਮੁੱਦਿਆਂ ਵਿੱਚ ਵੀ ਨਹੀਂ ਰਹਿ ਸਕੇਗੀ। ਬੇਈਮਾਨੀ, ਛੋਟੀ ਜਾਂ ਵੱਡੀ ਨਹੀਂ ਹੁੰਦੀ। ਆਪਣੀ ਮਨਸ਼ਾ ਜ਼ਾਹਰ ਕਰਦੇ ਹੋਏ ਪੋਪ ਨੇ ਕਿਹਾ ਹੈ ਕਿ ਉਹ ਚਾਹੁੰਦੇ ਹਨ ਕਿ ਈਸ਼ਵਰ ਦੇ ਕੰਮ ਵਿੱਚ ਲੱਗੇ ਲੋਕ ਭਿ੍ਰਸ਼ਟਾਚਾਰ ਤੋਂ ਮੁਕਤ ਰਹਿਣ, ਮਾਇਕ ਲੈਣ ਦੇਣ ਵਿੱਚ ਇਮਾਨਦਾਰੀ ਅਤੇ ਪਾਰਦਰਸ਼ਿਤਾ ਵਰਤਣ।
ਇਸ ਆਦੇਸ਼ ਦੇ ਬਾਅਦ ਚਰਚ ਦੇ ਸਾਰੇ ਸੀਨੀਅਰ ਪ੍ਰਬੰਧਕਾਂ ਤੇ ਪ੍ਰਸ਼ਾਸਕਾਂ ਨੂੰ ਇੱਕ ਸਹੁੰ ਪੱਤਰ ਦੇਣਾ ਹੋਵੇਗਾ, ਜਿਸ ਵਿੱਚ ਉਹ ਦੱਸਣਗੇ ਕਿ ਉਨ੍ਹਾਂ ਦੀਆਂ ਸਰਗਰਮੀਆਂ ਦੀ ਕੋਈ ਜਾਂਚ ਨਹੀਂ ਹੋਈ ਅਤੇ ਉਹ ਕਦੀ ਵੀ ਕਿਸੇ ਭਿ੍ਰਸ਼ਟ ਆਚਰਣ, ਧੋਖਾਧੜੀ, ਬੱਚਿਆਂ ਦੇ ਸ਼ੋਸ਼ਣ, ਮਾਨਵ ਤਸਕਰੀ, ਆਤੰਕਵਾਦ, ਟੈਕਸ ਚੋਰੀ ਅਤੇ ਹਵਾਲਾ ਆਦਿ ਅਪਰਾਧ ਨਾਲ ਜੁੜੇ ਨਹੀਂ ਰਹੇ। ਇਹੀ ਨਹੀਂ, ਪੋਪ ਦੇ ਇਸ ਆਦੇਸ਼ ਦੇ ਬਾਅਦ ਵੈਟੀਕਨ ਸਿਟੀ ਦੇ ਸੀਨੀਅਰ ਅਹੁਦੇਦਾਰ ਅੱਗੇ ਤੋਂ ਆਪਣਾ ਪੈਸਾ ਅਜਿਹੀ ਕੰਪਨੀ ਜਾਂ ਦੇਸ਼ ਵਿੱਚ ਨਹੀਂ ਲਾ ਸਕਣਗੇ, ਜੋ ਟੈਕਸ ਬਚਾਉਣ ਦੇ ਲਈ ਪ੍ਰਸਿੱਧ ਹਨ। ਉਹ ਅਜਿਹੀ ਕੰਪਨੀ ਦੇ ਸ਼ੇਅਰ ਵੀ ਨਹੀਂ ਖ਼ਰੀਦਣਗੇ ਜਾਂ ਉਨ੍ਹਾਂ ਵਿੱਚ ਪੈਸਾ ਲਾ ਕੇ ਵਿਆਜ ਨਹੀਂ ਕਮਾ ਸਕਦੇ, ਜਿਨ੍ਹਾਂ ਦੀ ਵਿਚਾਰਧਾਰਾ ਚਰਚ ਦੀਆਂ ਸਮਾਜਿਕ ਕਦਰਾਂ ਦੇ ਉਲਟ ਹੋਵੇ।