ਟੋਕੀਉ, 1 ਮਈ (ਪੋਸਟ ਬਿਊਰੋ)- ਜਾਪਾਨ ਵਿੱਚ ਸੂਮੋ ਕੁਸ਼ਤੀ ਦੌਰਾਨ ਸਿਰ ਦੇ ਭਾਰ ਡਿੱਗਣ ਦੇ ਇੱਕ ਮਹੀਨੇ ਬਾਅਦ 28 ਸਾਲਾ ਪਹਿਲਵਾਨ ਹਿਬੀਕਿਰੋ ਦੀ ਮੌਤ ਹੋ ਗਈ ਹੈ।
ਇਸ ਬਾਰੇ ਜਾਪਾਨ ਸੂਮੋ ਫੈਡਰੇਸ਼ਨ ਨੇ ਕੱਲ੍ਹ ਦੱਸਿਆ ਕਿ ਹਿਬੀਕਿਰੋ ਦੀ ਮੌਤ ਸਾਹ ਲੈਣ ਦੀ ਪਰੇਸ਼ਾਨੀ ਕਾਰਨ ਹੋਈ। ਇਸ ਘਟਨਾ ਤੋਂ ਬਾਅਦ ਜਾਪਾਨ ਵਿੱਚ ਖੇਡ ਦੌਰਾਨ ਮੈਡੀਕਲ ਐਮਰਜੈਂਸੀ ਸਥਿਤੀ ਦੀ ਪ੍ਰਕਿਰਿਆ ਉੱਤੇ ਸਵਾਲ ਉਠਣ ਲੱਗੇ ਹਨ। ਹਿਬੀਕਿਰੋ ਦਾ ਅਸਲੀ ਨਾਮ ਮਿਤਸੁਕੀ ਅਮਾਨੋ ਸੀ।ਇੱਕ ਟੂਰਨਾਮੈਂਟ ਵਿੱਚ 26 ਮਾਰਚ ਨੂੰ ਕੁਸ਼ਤੀ ਦੌਰਾਨ ਵਿਰੋਧੀ ਪਹਿਲਵਾਨ ਨੇ ਉਨ੍ਹਾਂ ਨੂੰ ਸਿਰ ਦੇ ਭਾਰ ਸੁੱਟ ਦਿੱਤਾ ਸੀ। ਇਸ ਪਿੱਛੋਂ ਉਹ ਕੁਝ ਮਿੰਟ ਬੇਹੋਸ਼ ਰਹੇ। ਸੂਮੋ ਅਧਿਕਾਰੀਆਂ ਨੇ ਥੋੜ੍ਹਾ ਉਡੀਕਣਪਿੱਛੋਂ ਡਾਕਟਰ ਸੱਦੇ। ਸਟ੍ਰੈਚਰ ਉੱਤੇ ਲਿਜਾਂਦੇ ਸਮੇਂ ਉਹ ਹੋਸ਼ ਵਿੱਚ ਆ ਗਏ। ਇਸ ਪਹਿਲਵਾਨ ਨੇ ਸੂਮੋ ਅਧਿਕਾਰੀਆਂ ਨੂੰ ਕਿਹਾ ਕਿ ਅਜਿਹਾ ਲੱਗਦਾ ਹੈ ਕਿ ਉਸ ਦੇ ਹੇਠਲੇ ਸਰੀਰ ਨੂੰ ਅਧਰੰਗ ਹੋ ਗਿਆ ਹੈ।ਨਿਕਾਨ ਸਪੋਰਟਸ ਮੁਤਾਬਕ ਹਸਪਤਾਲ ਵਿੱਚ ਉਨ੍ਹਾਂ ਦੀ ਸਥਿਤੀ ਸੁਧਰ ਰਹੀ ਸੀ। ਮੀਡੀਆ ਮੁਤਾਬਕ ਘਟਨਾ ਤੋਂ ਬਾਅਦ ਸੂਮੋ ਪਹਿਲਵਾਨ ਨੂੰ ਮੁੱਢਲਾ ਇਲਾਜ ਦੇਣ ਲਈ ਉਥੇ ਕੋਈ ਮੈਡੀਕਲ ਸਟਾਫ਼ ਨਹੀਂ ਸੀ। ਸੂਮੋ ਅਧਿਕਾਰੀਆਂ ਨੇ ਕਿਹਾ ਕਿ ਹਿਬੀਕਿਰੋ ਦੀ ਮੌਤ ਸੱਟ ਨਾਲ ਹੋਈ ਹੈ। ਹਿਬੀਕਿਰੋ ਨੇ 2011 ਵਿੱਚ ਸ਼ੁਰੂਆਤ ਕੀਤੀ ਸੀ।