ਕਾਨਪੁਰ, 1 ਮਈ (ਪੋਸਟ ਬਿਊਰੋ)- ਜ਼ਿਲ੍ਹੇ ਦੇ ਗੋਵਿੰਦ ਨਗਰ ਖੇਤਰ ਵਿੱਚ ਕੱਲ੍ਹ ਸਵੇਰੇ ਰਿਫਲਿੰਗ ਦੌਰਾਨ ਆਕਸੀਜਨ ਸਿਲੰਡਰ ਫੱਟਣ ਨਾਲ ਇੱਕ ਮਜ਼ਦੂਰ ਦੀ ਮੌਤ ਹੋ ਗਈ ਅਤੇ ਦੋ ਗੰਭੀਰ ਜ਼ਖ਼ਮੀ ਹੋ ਗਏ।
ਪੁਲਸ ਸੂਤਰਾਂ ਮੁਤਾਬਕ ਦਾਦਾ ਨਗਰ ਉਯੋਗਿਕ ਖੇਤਰ ਵਿਚਲੇ ਆਕਸੀਜਨ ਪਲਾਂਟ ਵਿੱਚ ਸਵੇਰੇ ਕਰੀਬ ਚਾਰ ਵਜੇ ਮਰਦਪੁਰ ਵਾਸੀ ਮਜ਼ਦੂਰ ਮੁਰਾਦ ਅਲੀ ਸਿਲੰਡਰ ਰਿਫਲਿੰਗ ਦਾ ਕੰਮ ਕਰ ਰਿਹਾ ਸੀ ਤਾਂ ਇੱਕ ਸਿਲੰਡਰ ਫਟ ਗਿਆ। ਇਸ ਧਮਾਕੇ ਨਾਲ ਮਜ਼ਦੂਰ ਦਾ ਸਰੀਰ ਬੁਰੀ ਤਰ੍ਹਾਂ ਸੜ ਗਿਆ ਅਤੇ ਨਾਲ ਕੰਮ ਕਰਦੇ ਦੋ ਮਜ਼ਦੂਰ ਧਮਾਕੇ ਨਾਲ ਨੇੜੇ ਰੱਖੇ ਸਿਲੰਡਰਾਂ ਥੱਲੇ ਦਬ ਗਏ। ਇਸਬਾਰੇ ਏ ਸੀ ਪੀ ਗੋਵਿੰਦ ਨਗਰ ਵਿਕਾਸ ਪਾਂਡੇ ਨੇ ਦੱਸਿਆ ਕਿ ਪਨਕੀ ਗੈਸ ਪਲਾਂਟ ਥਾਣਾ ਗੋਵਿੰਦ ਨਗਰ ਵਿੱਚ ਹੈ। ਇਥੇ ਕਿਦਵਈ ਦੇ ਇੱਕ ਹਸਪਤਾਲ ਤੋਂ ਗੈਸ ਭਰਨ ਲਈ ਕੁਝ ਸਿਲੰਡਰ ਆਏ ਸਨ, ਜਿਨ੍ਹਾਂ ਵਿੱਚੋਂ ਇੱਕ ਸਿਲੰਡਰ ਵਿੱਚ ਆਕਸੀਜਨ ਭਰਨ ਦੇ ਦੌਰਾਨ ਧਮਾਕਾ ਹੋਇਆ ਸੀ।