ਬੈਂਕਾਕ, 28 ਅਪ੍ਰੈਲ (ਪੋਸਟ ਬਿਊਰੋ)- ਮਿਆਂਮਾਰ ਦੇ ਕਰੇਨ ਗੁਰੀਲਿਆਂ ਨੇ ਕਿਹਾ ਹੈ ਕਿ ਉਨ੍ਹਾਂ ਕੱਲ੍ਹ ਫੌਜ ਦੇ ਇੱਕ ਅੱਡੇ ਉੱਤੇ ਕਬਜ਼ਾ ਕਰ ਲਿਆ। ਮੰਨਿਆ ਜਾਂਦਾ ਹੈ ਕਿ ਇਸ ਖਬਰ ਨਾਲ ਉਨ੍ਹਾਂ ਲੋਕਾਂ ਦਾ ਹੌਸਲਾ ਵਧੇਗਾ, ਜੋ ਫਰਵਰੀ ਵਿੱਚ ਫੌਜ ਵੱਲੋਂ ਦੇਸ਼ ਦੀ ਸਿਵਲ ਸਰਕਾਰ ਦਾ ਤਖਤਾ ਪਲਟਾਉਣ ਦਾ ਵਿਰੋਧ ਕਰ ਰਹੇ ਸਨ।
ਓਧਰ ਸਰਕਾਰ ਦੇ ਇੱਕ ਬੁਲਾਰੇ ਸੀਨੀਅਰ ਥਾਈ ਅਧਿਕਾਰੀ ਤੇ ਰਾਹਤ ਕਰਮਚਾਰੀ ਨੇ ਕਿਹਾ ਕਿ ਮਿਆਂਮਾਰ ਦੀ ਫੌਜ ਨੇ ਕਰੇਨ ਫੌਜਾਂ ਦੇ ਕੰਟਰੋਲ ਵਾਲੇ ਖੇਤਰ ਦੇ ਪਿੰਡਾਂ ਵਿੱਚ ਕਈ ਘੰਟੇ ਬਾਅਦ ਹਵਾਈ ਹਮਲੇ ਕੀਤੇ। ਮਿਆਂਮਾਰ ਦੀ ਕੇਂਦਰ ਸਰਕਾਰ ਤੋਂ ਵਧੇਰੇ ਸੁਤੰਤਰਤਾ ਦੀ ਮੰਗ ਕਰਨ ਵਾਲੇ ਘੱਟ ਗਿਣਤੀ ਦੇ ਮੁੱਖ ਰਾਜਸੀ ਗਰੁੱਪ ਕਰੇਨ ਨੈਸ਼ਨਲ ਯੂਨੀਅਨ (ਕੇ ਐਨ ਯੂ) ਦੇ ਇੱਕ ਬੁਲਾਰੇ ਨੇ ਕਿਹਾ ਕਿ ਗਰੁੱਪ ਦੀ ਹਥਿਆਰਬੰਦ ਇਕਾਈ ਨੇ ਸਵੇਰੇ ਪੰਜ ਵਜੇ ਫੌਜ ਦੇ ਅੱਡੇ ਉੱਤੇ ਹਮਲਾ ਕੀਤਾ, ਮਗਰੋਂ ਅੱਡੇ ਨੂੰ ਅੱਗ ਲਾ ਦਿੱਤੀ। ਕੇ ਐਨ ਯੂ ਦੇ ਵਿਦੇਸ਼ੀ ਮਾਮਲਿਆਂ ਦੇ ਮੁਖੀ ਪਦੋਹ ਸਾਅ ਤਾਵ ਨੀ ਨੇ ਕਿਹਾ ਕਿ ਇਸ ਘਟਨਾ ਦੇ ਜਾਨੀ ਨੁਕਸਾਨ ਦੀ ਕੋਈ ਜਾਣਕਾਰੀ ਨਹੀਂ। ਮਿਆਂਮਾਰ ਦੀ ਸਰਕਾਰ ਨੇ ਇਸ ਬਾਰੇ ਅਜੇ ਤੱਕ ਕੋਈ ਟਿੱਪਣੀ ਨਹੀਂ ਕੀਤੀ। ਕੇ ਐਨ ਯੂ ਦਾ ਥਾਈਲੈਂਡ ਨਾਲ ਲੱਗਦੀ ਸਰਹੱਦ ਨੇੜੇ ਪੂਰਬੀ ਮਿਆਂਮਾਰ ਦੇ ਇੱਕ ਹਿੱਸੇ ਉੱਤੇ ਕਬਜ਼ਾ ਹੈ। ਇਹ ਗਰੁੱਪ ਸੂ ਕੀ ਦੀ ਅਗਵਾਈ ਵਾਲੀ ਸਰਕਾਰ ਨੂੰ ਡੇਗਣ ਵਾਲੀ ਫੌਜ ਦੇ ਖਿਲਾਫ ਚੱਲਦੇ ਅੰਦੋਲਨ ਦਾ ਕਰੀਬੀ ਹੈ। ਥਾਈਲੈਂਡ ਵੱਲੋਂ ਸਰਹੱਦੀ ਖੇਤਰ ਦੀਆਂ ਤਸਵੀਰਾਂ ਵਿੱਚ ਅੱਗ ਦੀਆਂ ਲਪਟਾਂ ਉਠ ਰਹੀਆਂ ਹਨ। ਇਸ ਤੋਂ ਇਲਾਵਾ ਉਧਰੋਂ ਗੋਲੀਬਾਰੀ ਦੀਆਂ ਵੀ ਆਵਾਜ਼ਾਂ ਆ ਰਹੀਆਂ ਹਨ।