ਓਟਵਾ, 25 ਅਪਰੈਲ (ਪੋਸਟ ਬਿਊਰੋ) : ਹੈਲਥ ਕੈਨੇਡਾ ਦਾ ਕਹਿਣਾ ਹੈ ਕਿ ਐਸਟ੍ਰਾਜੈ਼ਨੇਕਾ ਕੋਵਿਡ-19 ਵੈਕਸੀਨ ਦੀਆਂ ਐਮਰਜੈਂਟ ਬਾਇਓਸੌਲਿਊਸ਼ਨਜ਼ ਬਾਲਟੀਮੋਰ ਫੈਸਿਲਿਟੀ ਤੋਂ ਹਾਸਲ ਕੀਤੀਆਂ ਗਈਆਂ 1·5 ਮਿਲੀਅਨ ਡੋਜ਼ਾਂ ਸੇਫ ਹਨ ਤੇ ਮਿਆਰ ਉੱਤੇ ਖਰੀਆਂ ਉਤਰਦੀਆਂ ਹਨ।
ਜਿ਼ਕਰਯੋਗ ਹੈ ਕਿ ਯੂਐਸ ਫੂਡ ਐਂਡ ਡਰੱਗ ਐਡਮਨਿਸਟ੍ਰੇਸ਼ਨ ਨੇ ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਐਸਟ੍ਰਾਜ਼ੈਨੇਕਾ ਦੇ ਇਸ ਫੈਸਿਲਿਟੀ ਦੀ ਵਰਤੋਂ ਉੱਤੇ ਰੋਕ ਲਾ ਦਿੱਤੀ ਸੀ ਤੇ ਇਸ ਦੇ ਨਾਲ ਹੀ ਇਸ ਪਲਾਂਟ ਉੱਤੇ ਜੌਹਨਸਨ ਐਂਡ ਜੌਹਨਸਨ ਵੈਕਸੀਨ ਦਾ ਉਤਪਾਦਨ ਵੀ ਰੋਕ ਦਿੱਤਾ ਗਿਆ ਸੀ।ਪਿਛਲੇ ਮਹੀਨੇ ਐਡਮਨਿਸਟ੍ਰੇਸ਼ਨ ਵੱਲੋਂ ਕਿਸੇ ਗੜਬੜ ਦਾ ਪਤਾ ਲਾਉਣ ਲਈ ਜਾਂਚ ਸ਼ੁਰੂ ਕੀਤੀ ਗਈ ਸੀ ਤੇ ਜਿਸ ਕਾਰਨ ਜੇ ਐਂਡ ਜੇ ਵੈਕਸੀਨ ਦੀਆਂ ਕਈ ਡੋਜ਼ਾਂ ਖਰਾਬ ਹੋ ਗਈਆਂ।
ਹਾਲਾਂਕਿ ਹੈਲਥ ਕੈਨੇਡਾ ਦਾ ਕਹਿਣਾ ਹੈ ਕਿ ਉਨ੍ਹਾਂ ਵੱਲੋਂ ਦੇਸ਼ ਵਿੱਚ ਆਉਣ ਵਾਲੀਆਂ ਸਾਰੀਆਂ ਵੈਕਸੀਨਜ਼ ਦੇ ਟੈਸਟ ਦੇ ਨਤੀਜਿਆਂ ਦਾ ਮੁਲਾਂਕਣ ਕੀਤਾ ਜਾਂਦਾ ਹੈ ਤੇ ਅਜੇ ਤੱਕ ਇਨ੍ਹਾਂ ਸੱਭ ਨੂੰ ਸੇਫ ਪਾਇਆ ਗਿਆ ਹੈ। ਜੇ ਐਂਡ ਜੇ ਡੋਜ਼ਾਂ, ਜਿਹੜੀਆਂ ਬਾਲਟੀਮੋਰ ਸਾਈਟ ਉੱਤੇ ਤਿਆਰ ਹੋਈਆਂ, ਅਜੇ ਤੱਕ ਦੇਸ਼ ਵਿੱਚ ਦਾਖਲ ਨਹੀਂ ਹੋਈਆਂ। ਰੈਗੂਲੇਟਰ ਦਾ ਕਹਿਣਾ ਹੈ ਕਿ ਕੰਪਨੀ ਵੱਲੋਂ ਜਿਹੜੀ ਵੈਕਸੀਨ ਅਗਲੇ ਹਫਤੇ ਇੰਪੋਰਟ ਕੀਤੀ ਜਾਣੀ ਹੈ ਉਹ ਵੀ ਇਸ ਫੈਸਿਲਿਟੀ ਉੱਤੇ ਤਿਆਰ ਨਹੀਂ ਹੋਈ।