ਮਾਂਟਰੀਅਲ, 7 ਦਸੰਬਰ (ਪੋਸਟ ਬਿਊਰੋ) : ਵੀਰਵਾਰ ਨੂੰ ਫਰਸਟ ਮਨਿਸਟਰਜ ਦੀ ਮੀਟਿੰਗ ਲਈ ਪਹੁੰਚੇ ਪ੍ਰੀਮੀਅਰਜ ਨੇ ਪੈਂਦੀ ਸੱਟੇ ਹੀ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵੱਲੋਂ ਤੈਅ ਕੀਤੇ ਗਏ ਏਜੰਡੇ ਬਾਰੇ ਸਿਕਾਇਤ ਕਰਨੀ ਸੁਰੂ ਕਰ ਦਿੱਤੀ। ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਨੇ ਤਾਂ ਇੱਥੋਂ ਤੱਕ ਧਮਕੀ ਦੇ ਦਿੱਤੀ ਕਿ ਜੇ ਪ੍ਰੋਵਿੰਸਾਂ ਦੀਆਂ ਤਰਜੀਹਾਂ ਨੂੰ ਇਸ ਮੀਟਿੰਗ ਵਿੱਚ ਥਾਂ ਨਾ ਦਿੱਤੀ ਗਈ ਤਾਂ ਉਹ ਵਾਕ ਆਊਟ ਕਰ ਜਾਣਗੇ।
ਫੋਰਡ ਦੇ ਨਜਦੀਕੀ ਸਰੋਤਾਂ ਨੇ ਦੱਸਿਆ ਕਿ ਉਨ੍ਹਾਂ ਨੇ ਇਸ ਲਿਹਾਜ ਨਾਲ ਮੀਟਿੰਗ ਛੱਡਣ ਦਾ ਮਨ ਬਣਾਇਆ ਹੋਇਆ ਹੈ ਜੇ ਟਰੂਡੋ ਨੇ ਫੈਡਰਲ ਕਾਰਬਨ ਟੈਕਸ ਬਾਰੇ ਕੋਈ ਵਿਚਾਰ ਵਟਾਂਦਰਾ ਨਾ ਕੀਤਾ ਕਿਉਂਕਿ ਫੋਰਡ ਨੇ ਉਸ ਨੂੰ ਅਦਾਲਤ ਵਿੱਚ ਚੁਣੌਤੀ ਦਿੱਤੀ ਹੋਈ ਹੈ। ਇਸ ਲਈ ਵੀਰਵਾਰ ਨੂੰ ਜਦੋਂ ਉਹ ਡਾਊਨਟਾਊਨ ਦੇ ਹੋਟਲ ਵਿੱਚ ਟਰੂਡੋ ਨੂੰ ਮਿਲੇ ਤਾਂ ਫੋਰਡ ਨੇ ਆਖਿਆ ਕਿ ਉਨ੍ਹਾਂ ਨੂੰ ਇਸ ਗੱਲ ਦੀ ਬਹੁਤ ਖੁਸੀ ਹੈ ਕਿ ਆਪਾਂ ਰਲ ਕੇ ਬੈਠਾਂਗੇ ਤੇ ਜਿਹੜੇ ਮੁੱਦੇ ਓਨਟਾਰੀਓ ਦੇ ਲੋਕਾਂ ਲਈ ਅਹਿਮ ਹਨ ਉਨ੍ਹਾਂ ਬਾਰੇ ਵਿਚਾਰ ਵਟਾਂਦਰਾ ਕਰਾਂਗੇ। ਉਨ੍ਹਾਂ ਆਖਿਆ ਕਿ ਓਨਟਾਰੀਓ ਦੇ ਲੋਕਾਂ ਨੂੰ ਸੱਭ ਤੋਂ ਵੱਧ ਤਕਲੀਫ ਰੋਜਗਾਰ ਖਤਮ ਕਰਨ ਵਾਲੇ ਕਾਰਬਨ ਟੈਕਸ ਕਾਰਨ ਹੋ ਰਹੀ ਹੈ।
ਉਨ੍ਹਾਂ ਆਖਿਆ ਕਿ ਓਨਟਾਰੀਓ ਇਹ ਵੀ ਚਾਹੁੰਦਾ ਹੈ ਕਿ ਅਗਲੇ ਸਾਲ ਓਸਵਾ ਸਥਿਤ ਆਪਣੇ ਪਲਾਂਟ ਨੂੰ ਬੰਦ ਕਰਨ ਜਾ ਰਹੀ ਜਨਰਲ ਮੋਟਰਜ ਦੇ ਇਸ ਫੈਸਲੇ ਕਾਰਨ ਵਿਹਲੇ ਹੋਣ ਵਾਲੇ ਕਾਮਿਆਂ ਨੂੰ ਨਵੀਆਂ ਨੌਕਰੀਆਂ ਕਿਸ ਤਰ੍ਹਾਂ ਲੱਭ ਕੇ ਦਿੱਤੀਆਂ ਜਾਣ। ਇਸ ਤੋਂ ਇਲਾਵਾ ਸਰਹੱਦ ਪਾਰ ਕਰਕੇ ਕੈਨੇਡਾ ਆਉਣ ਵਾਲੇ ਗੈਰਕਾਨੂੰਨੀ ਸਰਨਾਰਥੀਆਂ ਲਈ ਖਰਚ ਹੋਣ ਵਾਲੇ 200 ਮਿਲੀਅਨ ਡਾਲਰ ਨੂੰ ਪ੍ਰੋਵਿੰਸ ਕਿਸ ਤਰ੍ਹਾਂ ਝੱਲੇ। ਟਰੂਡੋ ਵੀ ਫੋਰਡ ਨਾਲ ਪੂਰੀ ਨਰਮਾਈ ਨਾਲ ਪੇਸ ਆ ਰਹੇ ਸਨ ਹਾਲਾਂਕਿ ਫੈਡਰਲ ਅਧਿਕਾਰੀਆਂ ਨੂੰ ਇਹ ਉਮੀਦ ਸੀ ਕਿ ਪ੍ਰਾਈਵੇਟ ਤੌਰ ਉੱਤੇ ਪ੍ਰੀਮੀਅਰ ਇਸ ਮੀਟਿੰਗ ਨੂੰ ਲੀਹ ਤੋਂ ਲਾਹੁਣ ਦੀ ਪੂਰੀ ਕੋਸਿਸ ਕਰਨਗੇ।
ਟਰੂਡੋ ਨੇ ਆਖਿਆ ਕਿ ਕਿਊਬਿਕ, ਮਾਂਟਰੀਅਲ ਵਿੱਚ ਡੱਗ ਦਾ ਸਵਾਗਤ ਕਰਦਿਆਂ ਉਨ੍ਹਾਂ ਨੂੰ ਬਹੁਤ ਖੁਸੀ ਹੋ ਰਹੀ ਹੈ। ਇਹ ਸਾਡੇ ਲਈ ਸੁਨਹਿਰਾ ਮੌਕਾ ਹੈ ਕਿ ਅਸੀਂ ਓਨਟਾਰੀਓ ਵਾਸੀਆਂ ਦੇ ਮੁੱਦਿਆਂ, ਕੈਨੇਡੀਅਨਾਂ ਨੂੰ ਦਰਪੇਸ ਚੁਣੌਤੀਆਂ, ਆਰਥਿਕ ਵਿਕਾਸ, ਮੱਧਵਰਗ ਤੇ ਹਰ ਕਿਸੇ ਲਈ ਚੰਗੀਆਂ ਨੌਕਰੀਆਂ ਸਿਰਜਣ ਲਈ ਸਖਤ ਮਿਹਨਤ ਕਰਾਂਗੇ। ਟਰੂਡੋ ਨੇ ਆਖਿਆ ਕਿ ਉਹ ਪ੍ਰੀਮੀਅਰਜ ਨਾਲ ਹਰ ਉਹ ਮੁੱਦਾ ਵਿਚਾਰਨਗੇ ਜਿਹੜਾ ਉਹ ਵਿਚਾਰਨਾ ਚਾਹੁੰਦੇ ਹਨ। ਪਰ ਅਜਿਹਾ ਆਖ ਕੇ ਟਰੂਡੋ ਉਸ ਨੁਕਤਾਚੀਨੀ ਤੋਂ ਨਹੀਂ ਬਚ ਸਕਦੇ ਕਿ ਉਨ੍ਹਾਂ ਨੇ ਬਹੁਤ ਹੀ ਨਿੱਕਾ ਏਜੰਡਾ ਰੱਖਿਆ ਹੈ ਤੇ ਕਈ ਮੁੱਦਿਆਂ ਨੂੰ ਅਣਦੇਖਿਆਂ ਕੀਤਾ ਗਿਆ।