ਓਨਟਾਰੀਓ, 20 ਨਵੰਬਰ (ਪੋਸਟ ਬਿਊਰੋ) : ਈ.ਕੋਲੀ ਫੈਲਣ ਦੇ ਡਰ ਕਾਰਨ ਕੈਨੇਡਾ ਤੇ ਅਮਰੀਕਾ ਦੇ ਸਿਹਤ ਅਧਿਕਾਰੀਆਂ ਵੱਲੋਂ ਲੋਕਾਂ ਨੂੰ ਰੋਮੇਨ ਲੈਟਸ ਖਾਣ ਤੋਂ ਬਚਣ ਲਈ ਆਖਿਆ ਜਾ ਰਿਹਾ ਹੈ।
ਕੈਨੇਡਾ ਦੀ ਪਬਲਿਕ ਹੈਲਥ ਏਜੰਸੀ ਦਾ ਕਹਿਣਾ ਹੈ ਕਿ ਇਹ ਲੈਟਸ ਖਾਣ ਕਾਰਨ ਕਿਊਬਿਕ ਵਿੱਚ 15 ਤੇ ਓਨਟਾਰੀਓ ਵਿੱਚ ਤਿੰਨ ਵਿਅਕਤੀ ਬਿਮਾਰ ਪੈ ਗਏ ਹਨ ਜਿਨ੍ਹਾਂ ਵਿੱਚੋਂ ਛੇ ਨੂੰ ਹਸਪਤਾਲ ਭਰਤੀ ਕਰਵਾਉਣਾ ਪਿਆ। ਏਜੰਸੀ ਨੇ ਦੱਸਿਆ ਕਿ ਇਸ ਤਰ੍ਹਾਂ ਦੇ ਮਾਮਲੇ ਅਕਤੂਬਰ ਦੇ ਮੱਧ ਤੇ ਨਵੰਬਰ ਦੇ ਸ਼ੁਰੂਆਤੀ ਹਫਤੇ ਵਿੱਚ ਸਾਹਮਣੇ ਆਏ। ਜਿਹੜੇ ਲੋਕ ਇਸ ਲੈਟਸ ਨੂੰ ਖਾ ਕੇ ਬਿਮਾਰ ਪਏ ਹਨ ਉਨ੍ਹਾਂ ਦੀ ਉਮਰ ਪੰਜ ਸਾਲ ਤੋਂ 93 ਸਾਲ ਦਰਮਿਆਨ ਹੈ।
ਇਹ ਵੀ ਦੱਸਿਆ ਗਿਆ ਕਿ ਇੱਕ ਵਿਅਕਤੀ ਦੀ ਹਾਲਤ ਈ.ਕੋਲੀ ਇਨਫੈਕਸ਼ਨ ਕਾਰਨ ਕਾਫੀ ਵਿਗੜ ਗਈ ਪਰ ਅਜੇ ਤੱਕ ਇਸ ਕਾਰਨ ਕਿਸੇ ਦੀ ਮੌਤ ਹੋਣ ਦੀ ਖਬਰ ਨਹੀਂ ਮਿਲੀ ਹੈ। ਇਸ ਵਾਰੀ ਈ.ਕੋਲੀ ਦਾ ਸਾਹਮਣੇ ਆਇਆ ਮਾਮਲਾ ਪਿਛਲੇ ਸਾਲ ਵਰਗਾ ਹੀ ਹੈ। ਅਮਰੀਕੀ ਅਧਿਕਾਰੀਆਂ ਵੱਲੋਂ ਈ.ਕੋਲੀ ਦੇ 32 ਮਾਮਲੇ ਰਿਪੋਰਟ ਕੀਤੇ ਗਏ ਹਨ ਤੇ ਇਸ ਕਾਰਨ ਉੱਥੇ ਬਿਮਾਰ ਹੋਏ 13 ਲੋਕਾਂ ਨੂੰ ਹਸਪਤਾਲ ਭਰਤੀ ਕਰਵਾਉਣਾ ਪਿਆ ਹੈ।
ਕੈਨੇਡੀਅਨ ਫੂਡ ਇੰਸਪੈਕਸ਼ਨ ਏਜੰਸੀ ਦਾ ਕਹਿਣਾ ਹੈ ਕਿ ਉਹ ਅਮਰੀਕੀ ਅਧਿਕਾਰੀਆਂ ਨਾਲ ਰਲ ਕੇ ਰੋਮੇਨ ਲੈਟਸ ਦੇ ਸਰੋਤ ਦਾ ਪਤਾ ਲਾਉਣ ਦੀ ਕੋਸਿ਼ਸ਼ ਕਰ ਰਹੇ ਹਨ ਜਿਸ ਕਾਰਨ ਲੋਕ ਬਿਮਾਰ ਪੈ ਰਹੇ ਹਨ। ਇਹ ਵੀ ਦੱਸਿਆ ਗਿਆ ਕਿ ਈ.ਕੋਲੀ ਇਨਫੈਕਸ਼ਨ ਹੋਣ ਕਾਰਨ ਢਿੱਡ ਵਿੱਚ ਮਰੋੜ ਪੈਂਦੇ ਹਨ, ਦਸਤ ਤੇ ਉਲਟੀਆਂ ਲੱਗ ਜਾਂਦੇ ਹਨ। ਬਹੁਤੇ ਲੋਕ ਇੱਕ ਹਫਤੇ ਦੇ ਅੰਦਰ ਅੰਦਰ ਠੀਕ ਹੋ ਜਾਂਦੇ ਹਨ ਪਰ ਕਈਆਂ ਦੀ ਇਹ ਤਕਲੀਫ ਲੰਮਾਂ ਸਮਾਂ ਰਹਿੰਦੀ ਹੈ ਤੇ ਵਿਗੜ ਵੀ ਸਕਦੀ ਹੈ।