ਮੋਹਾਲੀ, 20 ਨਵੰਬਰ (ਪੋਸਟ ਬਿਊਰੋ)- ਸੈਕਟਰ 48 ਦੀ ਵਸਨੀਕ ਇੱਕ ਵਿਆਹੁਤਾ ਔਰਤ ਨੇ ਬਠਿੰਡਾ ਦੇ ਨੌਜਵਾਨ ਅਕਸ਼ੈ ਜੈਨ ਨੂੰ ਇਮੋਸ਼ਨਲ ਕਰ ਕੇ ਪਿਆਰ ਦੇ ਜਾਲ ਵਿੱਚ ਫਸਾਇਆ ਤੇ ਉਸ ਨਾਲ ਸੰਬੰਧ ਬਣਾਏ। ਫਿਰ ਇਹ ਅਕਸ਼ੈ ਤੋਂ ਪੈਸਿਆਂ ਦੀ ਡਿਮਾਂਡ ਕਰਨ ਲੱਗੀ ਅਤੇ 15 ਲੱਖ ਦਾ ਕਰਜ਼ਾ ਦਿਵਾਉਣ ਨੂੰ ਕਹਿਣ ਲੱਗੀ ਤਾਂ ਉਸ ਨੇ ਆਪਣੇ ਪਰਵਾਰ ਵਾਲਿਆਂ ਨਾਲ ਗੱਲ ਕੀਤੀ। ਅਕਸ਼ੈ ਦੇ ਪਿਤਾ ਨੇ ਉਸ ਨੂੰ ਬੇਦਖਲ ਕਰ ਦਿੱਤਾ।
ਔਰਤ ਨੂੰ ਜਦ ਇਸ ਦਾ ਪਤਾ ਲੱਗਾ ਤਾਂ ਉਸ ਨੇ ਬਠਿੰਡਾ ਜਾ ਕੇ ਉਸ ਦੇ ਘਰ ਅਤੇ ਸ਼ੋਅਰੂਮ 'ਤੇ ਹੰਗਾਮਾ ਕੀਤਾ ਅਤੇ ਅਕਸ਼ੈ ਦੇ ਪਰਵਾਰ ਨੂੰ ਰੇਪ ਕੇਸ ਵਿੱਚ ਫਸਾਉਣ ਲਈ ਧਮਕੀਆਂ ਦਿੱਤੀਆਂ। ਜਦ ਘਰ ਵਾਲਿਆਂ ਨੇ ਉਸ ਵੱਲ ਕੋਈ ਧਿਆਨ ਨਾ ਦਿੱਤਾ ਤਾਂ ਔਰਤ ਨੇ ਫੇਜ਼-11 ਥਾਣੇ ਰੇਪ ਕੇਸ ਦਰਜ ਕਰਾਇਆ ਅਤੇ ਕੇਸ ਵਾਪਸ ਲੈਣ ਦੇ ਤੀਹ ਲੱਖ ਮੰਗੇ। ਅਕਸ਼ੈ ਦੇ ਪਰਵਾਰ ਨੇ ਔਰਤ ਤੇ ਉਸ ਦੇ ਮਾਂ-ਬਾਪ ਨੂੰ ਪੈਸੇ ਦੇਣ ਤੋਂ ਮਨ੍ਹਾ ਕਰ ਕੇ ਪਹਿਲਾਂ ਦਿੱਤੇ 32 ਲੱਖ ਵਾਪਸ ਕਰਨ ਲਈ ਕਿਹਾ ਤਾਂ ਉਨ੍ਹਾਂ ਨੇ ਮਨ੍ਹਾ ਕਰ ਦਿੱਤਾ। ਅਕਸ਼ੈ ਦੇ ਪਰਵਾਰ ਨੇ ਪੂਰੇ ਸਬੂਤ ਇਕੱਠੇ ਕਰ ਕੇ ਐਸ ਐਸ ਪੀ ਮੋਹਾਲੀ ਕੁਲਦੀਪ ਸਿੰਘ ਚਹਿਲ ਨੂੰ ਦਿੱਤੇ। ਐੱਸ ਐੱਸ ਪੀ ਨੇ ਐੱਸ ਐੱਚ ਓ ਫੇਜ਼-11 ਨੂੰ ਜਾਂਚ ਲਈ ਕਿਹਾ ਅਤੇ ਜਾਂਚ ਵਿੱਚ ਪਤਾ ਲੱਗਾ ਹੈ ਕਿ ਕਿਵੇਂ ਔਰਤ ਨੇ ਅਕਸ਼ੈ ਨੂੰ ਫਸਾ ਕੇ ਪਹਿਲਾਂ ਉਸ ਨਾਲ ਸੰਬੰਧ ਬਣਾਏ ਤੇ ਫਿਰ ਉਸ ਨੂੰ ਬਲੈਕਮੇਲ ਕਰਨਾ ਸ਼ੁਰੂ ਕਰ ਦਿੱਤਾ। ਔਰਤ ਅਤੇ ਉਸ ਦੇ ਮਾਂ-ਬਾਪ ਦੇ ਖਿਲਾਫ ਕੇਸ ਰਜਿਸਟਰਡ ਕਰ ਲਿਆ ਹੈ।