ਓਟਵਾ, 20 ਨਵੰਬਰ (ਪੋਸਟ ਬਿਊਰੋ) : ਕੈਨੇਡੀਅਨ ਇੰਸਟੀਚਿਊਟ ਫੌਰ ਹੈਲਥ ਇਨਫਰਮੇਸ਼ਨ ਦੀ ਰਿਪੋਰਟ ਅਨੁਸਾਰ ਕੈਨੇਡਾ ਵੱਲੋਂ 2018 ਵਿੱਚ ਹੈਲਥ ਕੇਅਰ ਉੱਤੇ 253.5 ਬਿਲੀਅਨ ਡਾਲਰ ਜਾਂ ਪ੍ਰਤੀ ਕੈਨੇਡੀਅਨ 6,839 ਡਾਲਰ ਖਰਚ ਕੀਤੇ ਹੋਣ ਦੀ ਸੰਭਾਵਨਾ ਹੈ।
ਗੈਰ ਮੁਨਾਫੇ ਵਾਲੀ ਇਸ ਸੰਸਥਾ ਨੈਸ਼ਨਲ ਹੈਲਥ ਕੇਅਰ ਡਾਟਾ ਦਾ ਅਧਿਐਨ ਕਰਦੀ ਹੈ ਤੇ ਇਸ ਤੋਂ ਭਾਵ ਇਹ ਹੈ ਕਿ ਪਿਛਲੇ ਸਾਲ ਦੇ ਮੁਕਾਬਲੇ ਹੈਲਥ ਕੇਅਰ ਵਿੱਚ 4.2 ਫੀ ਸਦੀ ਖਰਚਾ ਵੱਧ ਹੋਇਆ ਹੈ। ਇਸ ਨਾਲ ਕੁੱਲ ਘਰੇਲੂ ਉਤਪਾਦ ਵਿੱਚ ਵੀ 11.3 ਫੀ ਸਦੀ ਦਾ ਇਜਾਫਾ ਹੋਇਆ। ਆਰਗੇਨਾਈਜ਼ੇਸ਼ਨ ਦੇ ਫਾਰਮਾਸਿਊਟੀਕਲ ਇਨਫਰਮੇਸ਼ਨ ਮੈਨੇਜਰ ਜੌਰਡਨ ਹੰਟ ਦਾ ਕਹਿਣਾ ਹੈ ਕਿ ਸਿਹਤ ਉੱਤੇ ਹੋਣ ਵਾਲੇ ਖਰਚੇ ਦੀਆਂ ਤੰਦਾਂ ਅਸਲ ਵਿੱਚ ਆਰਥਿਕ ਵਿਕਾਸ ਨਾਲ ਜੁੜੀਆਂ ਹੋਈਆਂ ਹਨ।
ਸੋਮਵਾਰ ਨੂੰ ਹੰਟ ਨੇ ਆਖਿਆ ਕਿ ਸਿਹਤ ਉੱਤੇ ਖਰਚਾ ਉਦੋਂ ਹੀ ਵੱਧਦਾ ਹੈ ਜਦੋਂ ਅਰਥਚਾਰਾ ਵਿਕਾਸ ਕਰਦਾ ਹੈ ਤੇ ਇਸ ਉੱਤੇ ਉਸ ਸੂਰਤ ਵਿੱਚ ਖਰਚਾ ਘਟਦਾ ਵੀ ਹੈ ਜਦੋਂ ਅਰਥਚਾਰਾ ਸੁੰਗੜਦਾ ਹੈ। ਪਿਛਲੇ ਇੱਕ ਦਹਾਕੇ ਵਿੱਚ ਇਹ ਸਥਿਰ ਰਿਹਾ ਹੈ। ਉਨ੍ਹਾਂ ਆਖਿਆ ਕਿ ਇਹ ਵੀ ਵੇਖਣ ਵਿੱਚ ਆਇਆ ਹੈ ਕਿ ਸ਼ਹਿਰੀ ਖੇਤਰਾਂ ਵਿੱਚ ਪੇਂਡੂ ਖੇਤਰਾਂ ਦੇ ਮੁਕਾਬਲੇ ਪ੍ਰਤੀ ਵਿਅਕਤੀ ਪਬਲਿਕ ਹੈਲਥ ਉੱਤੇ ਵੱਧ ਖਰਚਾ ਕੀਤਾ ਗਿਆ। ਅਜਿਹਾ ਪਹਿਲੀ ਵਾਰੀ ਵੇਖਣ ਨੂੰ ਮਿਲਿਆ।
ਇਹ ਵੀ ਸਾਹਮਣੇ ਆਇਆ ਹੈ ਕਿ ਇਸ ਸਾਲ ਨੁਸਖੇ ਵਾਲੀ ਦਵਾਈਆਂ ਉੱਤੇ ਅੰਦਾਜ਼ਨ 33.7 ਬਿਲੀਅਨ ਡਾਲਰ ਖਰਚੇ ਜਾਣਗੇ। ਪਿਛਲੇ ਸਾਲ 4 ਫੀ ਸਦੀ ਦੇ ਮੁਕਾਬਲੇ ਇਸ ਵੰਨਗੀ ਵਿੱਚ ਸਾਲਾਨਾ 4.2 ਫੀ ਸਦੀ ਦਾ ਵਾਧਾ ਹੋਵੇਗਾ ਤੇ 3.1 ਫੀ ਸਦੀ ਦਾ ਵਾਧਾ ਕ੍ਰਮਵਾਰ ਹਸਪਤਾਲਾਂ ਤੇ ਡਾਕਟਰਾਂ ਲਈ ਹੋਵੇਗਾ। 2018 ਦੇ ਖਰਚੇ ਵਿੱਚੋਂ ਵੱਡਾ ਹਿੱਸਾ ਹਸਪਤਾਲਾਂ ਨੂੰ ਜਾਵੇਗਾ, ਜੋ ਕਿ ਕੁੱਲ ਖਰਚੇ ਦਾ 28.3 ਫੀ ਸਦੀ ਹੋਵੇਗਾ ਜਦਕਿ ਡਾਕਟਰਾਂ ਦੀਆਂ ਸੇਵਾਵਾਂ ਲਈ 15.1 ਫੀ ਸਦੀ ਖਰਚ ਹੋਵੇਗਾ।
ਓਨਟਾਰੀਓ ਦੇ ਸਾਬਕਾ ਸਿਹਤ ਮੰਤਰੀ ਡਾ. ਐਰਿਕ ਹੌਸਕਿਨਜ਼, ਜੋ ਕਿ ਹੁਣ ਨੈਸ਼ਨਲ ਫਾਰਮਾਕੇਅਰ ਐਡਵਾਈਜ਼ਰੀ ਕਾਉਂਸਲ ਦੇ ਚੇਅਰ ਹਨ, ਨੇ ਸੋਮਵਾਰ ਨੂੰ ਇਸ ਰਿਪੋਰਟ ਦੇ ਸਾਹਮਣੇ ਆਉਣ ਤੋਂ ਬਾਅਦ ਆਖਿਆ ਕਿ ਹੈਪੇਟਾਈਟਸ ਸੀ ਦੀਆਂ ਨਵੀਆਂ ਦਵਾਈਆਂ ਬਾਜ਼ਾਰ ਵਿੱਚ ਆਉਣ ਨਾਲ ਇਲਾਜ ਤਾਂ ਸੰਭਵ ਹੋ ਗਿਆ ਹੈ ਪਰ ਨੁਸਖੇ ਵਾਲੀਆਂ ਕਈ ਦਵਾਈਆਂ ਕਾਫੀ ਮਹਿੰਗੀਆਂ ਹੁੰਦੀਆਂ ਹਨ। ਇਸ ਲਈ ਨੈਸ਼ਨਲ ਫਾਰਮਾਕੇਅਰ ਲਈ ਖਰੜਾ ਵਿਕਸਤ ਕੀਤੇ ਜਾਣ ਦੀ ਲੋੜ ਹੈ। ਅਸੀਂ ਇਨ੍ਹਾਂ ਲੋੜੀਂਦੀਆਂ ਦਵਾਈਆਂ ਲਈ ਹੀ ਵੱਡੀ ਰਕਮ ਚੁਕਾ ਰਹੇ ਹਾਂ। ਪ੍ਰਤੀ ਵਿਅਕਤੀ ਖਰਚੇ ਦੇ ਮਾਮਲੇ ਵਿੱਚ ਅਸੀਂ ਦੁਨੀਆਂ ਵਿੱਚ ਤੀਜੇ ਨੰਬਰ ਉੱਤੇ ਹਾਂ।