(SUBHEAD

ਟੋਰਾਂਟੋ, 14 ਨਵੰਬਰ (ਪੋਸਟ ਬਿਊਰੋ) : ਉੱਤਰੀ ਟੋਰਾਂਟੋ ਵਿੱਚ ਐਤਵਾਰ ਸ਼ਾਮ ਨੂੰ ਚਾਰ ਯਹੂਦੀ ਟੀਨੇਜਰਜ਼ ਉੱਤੇ ਹੋਇਆ ਹਮਲਾ ਅਸਲ ਵਿੱਚ ਹੇਟ ਕ੍ਰਾਈਮ ਹੀ ਸੀ, ਇਸ ਦੀ ਪੁਸ਼ਟੀ ਟੋਰਾਂਟੋ ਪੁਲਿਸ ਵੱਲੋਂ ਕੀਤੀ ਗਈ ਹੈ।
ਪੁਲਿਸ ਚੀਫ ਮਾਰਕ ਸਾਂਡਰਜ਼ ਨੇ ਮੰਗਲਵਾਰ ਨੂੰ ਕ੍ਰਾਈਮ ਸੀਨ ਦਾ ਮੁਆਇਨਾ ਕਰਨ ਉਪਰੰਤ ਆਖਿਆ ਕਿ 11 ਨਵੰਬਰ ਦਿਨ ਐਤਵਾਰ ਨੂੰ ਰਾਤੀਂ 8:00 ਵਜੇ ਚਾਰ ਨੌਜਵਾਨ ਬਾਥਰਸਟ ਤੇ ਲਾਰੈਂਸ ਨੇੜੇ ਤੁਰੇ ਜਾ ਰਹੇ ਸਨ ਜਦੋਂ ਉਨ੍ਹਾਂ ਉੱਤੇ ਹਮਲਾ ਹੋਇਆ। ਟੋਰਾਂਟੋ ਪੁਲਿਸ ਸਰਵਿਸ ਨੇ ਇਸ ਦੀ ਪੁਸ਼ਟੀ ਕੀਤੀ ਕਿ ਇਹ ਹੇਟ ਕ੍ਰਾਈਮ ਹੀ ਸੀ। ਉਨ੍ਹਾਂ ਆਖਿਆ ਕਿ ਇਨ੍ਹਾਂ ਚਾਰ ਨੌਜਵਾਨਾਂ ਉੱਤੇ ਨੌ ਹੋਰਨਾਂ ਲੜਕਿਆਂ ਨੇ ਹਮਲਾ ਕੀਤਾ। ਪਹਿਲਾਂ ਉਨ੍ਹਾਂ ਉੱਤੇ ਭੱਦੀਆਂ ਟਿੱਪਣੀਆਂ ਕੀਤੀਆਂ ਗਈਆਂ ਫਿਰ ਉਨ੍ਹਾਂ ਦੇ ਯਹੂਦੀ ਕੱਪੜਿਆਂ ਉੱਤੇ ਧਾਰਮਿਕ ਟਿੱਪਣੀਆਂ ਕੀਤੀਆਂ ਗਈਆਂ। ਇਸ ਮਗਰੋਂ ਦੋ ਯਹੂਦੀ ਲੜਕਿਆਂ ਨੂੰ ਕੁੱਟਿਆ ਵੀ ਗਿਆ। ਇੱਕ ਯਹੂਦੀ ਲੜਕੇ ਤੋਂ ਜਾਣ ਲੱਗੇ ਹਮਲਾਵਰ ਲੜਕੇ ਗੌਗਲਜ਼ ਵੀ ਖੋਹ ਕੇ ਲੈ ਗਏ।
ਇਸ ਮਗਰੋਂ ਵਿੱਢੀ ਗਈ ਜਾਂਚ ਦੌਰਾਨ 17 ਸਾਲਾ ਮਸ਼ਕੂਕ ਨੂੰ ਗ੍ਰਿਫਤਾਰ ਵੀ ਕਰ ਲਿਆ ਗਿਆ ਪਰ ਬਾਕੀ ਸਾਰੇ ਫਰਾਰ ਹੋਣ ਵਿੱਚ ਕਾਮਯਾਬ ਹੋ ਗਏ। ਸਾਂਡਰਜ਼ ਨੇ ਆਖਿਆ ਕਿ ਸਾਰਿਆਂ ਨੂੰ ਫੜ੍ਹਨ ਲਈ ਪੁਲਿਸ ਕੋਈ ਵੀ ਕਸਰ ਬਾਕੀ ਨਹੀਂ ਛੱਡੇਗੀ। ਸਾਂਡਰਜ਼ ਨੇ ਆਖਿਆ ਕਿ ਸਿਟੀ ਵਿੱਚ ਸਿਰਫ ਹੇਟ ਕ੍ਰਾਈਮ ਉੱਤੇ ਹੀ ਅਸੀਂ ਨਕੇਲ ਨਹੀਂ ਕੱਸ ਸਕੇ ਹਾਂ। ਉਨ੍ਹਾਂ ਆਖਿਆ ਕਿ ਇਹ ਮਸਲਾ ਹੱਲ ਕਰਨ ਲਈ ਉਹ ਆਪਣੀ ਪੂਰੀ ਵਾਹ ਲਾਉਣਗੇ।
ਇਸ ਦੌਰਾਨ ਮੇਅਰ ਜੌਹਨ ਟੋਰੀ ਨੇ ਵੀ ਟਵਿੱਟਰ ਉੱਤੇ ਆਖਿਆ ਕਿ ਕਿਸੇ ਦੇ ਧਰਮ ਲਈ ਉਸ ਉੱਤੇ ਹੋਣ ਵਾਲੇ ਹਮਲੇ ਨੂੰ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ। ਪ੍ਰੀਮੀਅਰ ਡੱਗ ਫੋਰਡ ਤੇ ਫੈਡਰਲ ਵਿਰੋਧੀ ਧਿਰ ਦੇ ਆਗੂ ਐਂਡਰਿਊ ਸ਼ੀਅਰ ਨੇ ਵੀ ਇਹੋ ਆਖਿਆ ਕਿ ਕਿਸੇ ਵੀ ਕਿਸਮ ਦਾ ਹੇਟ ਕ੍ਰਾਈਮ ਬਰਦਾਸ਼ਤ ਨਹੀਂ ਕੀਤਾ ਜਾਵੇਗਾ।