ਵਾਸ਼ਿੰਗਟਨ, 25 ਮਈ (ਪੋਸਟ ਬਿਊਰੋ)- ਅਮਰੀਕੀ ਐੱਮ ਪੀਜ਼ ਦੇ ਇੱਕ ਦੋ-ਧਿਰੀ ਗਰੁੱਪ ਨੇ ਪਾਰਲੀਮੈਂਟ ਦੇ ਦੋਵਾਂ ਸਦਨਾਂ ਵਿੱਚ ਸ਼ੁੱਕਰਵਾਰ ਇੱਕ ਅਜਿਹਾ ਬਿੱਲ ਪੇਸ਼ ਕੀਤਾ, ਜੋ ਐੱਚ 1ਬੀ ਵਰਕ ਵੀਜ਼ਾ ਵਿੱਚ ਵੱਡੇ ਸੁਧਾਰਾਂ ਨਾਲ ਜੁੜਿਆ ਹੈ। ਇਸ ਬਿੱਲ ਵਿੱਚ ਵੀਜ਼ਾ ਦੇਣ ਸਮੇਂ ਉਨ੍ਹਾਂ ਪ੍ਰਤਿਭਾਸ਼ਾਲੀ ਨੌਜਵਾਨਾਂ ਨੂੰ ਪਹਿਲ ਦੇਣ ਨੂੰ ਕਿਹਾ ਗਿਆ ਹੈ, ਜੋ ਅਮਰੀਕੀ ਸੰਸਥਾਵਾਂ ਵਿੱਚ ਪੜ੍ਹੇ ਹੋਣ। ਜੇ ਇਹ ਬਿੱਲ ਕਾਨੂੰਨ ਬਣ ਜਾਂਦਾ ਹੈ ਤਾਂ ਉਥੇ ਪੜ੍ਹਦੇ ਭਾਰਤੀ ਵਿਦਿਆਰਥੀਆਂ ਨੂੰ ਫਾਇਦਾ ਹੋਵੇਗਾ। ਐੱਚ 1ਬੀ ਵੀਜ਼ਾ ਗੈਰ ਇਮੀਗਰੇਸ਼ਨ ਵੀਜ਼ਾ ਹੈ, ਜੋ ਵਰਕਰਾਂ ਨੂੰ ਅਜਿਹੇ ਮੁਹਾਰਤ ਦੇ ਕੰਮਾਂ ਵਿੱਚ ਰੁਜ਼ਗਾਰ ਦੇਣ ਦੀ ਇਜਾਜ਼ਤ ਦਿੰਦਾ ਹੈ ਜਿਨ੍ਹਾਂ ਵਿੱਚ ਖਾਸ ਤਰ੍ਹਾਂ ਦੀ ਸਿਧਾਂਤਕ ਅਤੇ ਤਕਨੀਕੀ ਮੁਹਾਰਤ ਦੀ ਲੋੜ ਹੁੰਦੀ ਹੈ।
ਭਾਰਤ ਤੇ ਚੀਨ ਵਰਗੇ ਦੇਸ਼ਾਂ ਵਿੱਚ ਹਰ ਸਾਲ ਹਜ਼ਾਰਾਂ ਕਰਮਚਾਰੀਆਂ ਨੂੰ ਨੌਕਰੀ 'ਤੇ ੱਰਖਣ ਲਈ ਕੰਪਨੀਆਂ ਇਸ ਵੀਜ਼ਾ ਸਹੂਲਤ ਦੀ ਵਰਤੋਂ ਕਰਦੀਆਂ ਹਨ। ਇਸ ਸਾਲ ਇੱਕ ਅਪ੍ਰੈਲ ਨੂੰ ਅਮਰੀਕੀ ਨਾਗਰਿਕਤਾ ਅਤੇ ਇਮੀਗਰੇਸ਼ਨ ਸੇਵਾ (ਯੂ ਐੱਸ ਸੀ ਆਈ ਐੱਸ) ਨੇ ਕਿਹਾ ਸੀ ਕਿ ਤਕਨਾਲੋਜੀ ਦੇ ਵਿਦੇਸ਼ੀ ਪੇਸ਼ੇਵਰਾਂ ਲਈ ਜ਼ਰੂਰੀ ਐੱਚ 1ਬੀ ਵੀਜ਼ੇ ਦੀਆਂ 2,75,000 ਅਰਜ਼ੀਆਂ ਮਿਲੀਆਂ ਹਨ। ਇਨ੍ਹਾਂ ਵਿੱਚੋਂ 67 ਫੀਸਦੀ ਤੋਂ ਵੱਧ ਭਾਰਤ ਵਿੱਚੋਂ ਸਨ। ਅਮਰੀਕਾ ਹਰ ਸਾਲ 85,000 ਐਚ 1ਬੀ ਵੀਜ਼ਾ ਜਾਰੀ ਕਰਦਾ ਹੈ। ਅਮਰੀਕਾ ਵਿੱਚ ਚੀਨ ਪਿੱਛੋਂ ਸਭ ਤੋਂ ਵੱਧ ਵਿਦਿਆਰਥੀ ਭਾਰਤ ਦੇ ਹਨ। ਅਮਰੀਕਾ ਵਿੱਚ ਪੇਸ਼ ਕੀਤੇ ਗਏ ਐੱਚ 1ਬੀ ਵੀਜ਼ਾ ਐਂਡ ਐੱਲ 1 ਵੀਜ਼ਾ ਰਿਫਾਰਮ ਐਕਟ ਹੇਠ ਯੂ ਐੱਸ ਸੀ ਆਈ ਐੱਸ ਨੂੰ ਪਹਿਲੀ ਵਾਰ ਐੱਚ 1ਬੀ ਵੀਜ਼ਾ ਦੀ ਵੰਡ ਪਹਿਲ ਆਧਾਰ 'ਤੇ ਕਰਨੀ ਹੋਵੇਗੀ। ਨਵੀਂ ਪ੍ਰਣਾਲੀ ਹੇਠ ਐੱਚ 1ਬੀ ਵੀਜ਼ੇ ਲਈ ਉਨ੍ਹਾਂ ਪ੍ਰਤਿਭਾਸ਼ਾਲੀ ਵਿਦਿਆਰਥੀਆਂ ਨੂੰ ਪਹਿਲ ਦਿੱਤੀ ਜਾਵੇਗੀ ਜਿਨ੍ਹਾਂ ਨੇ ਅਮਰੀਕੀ ਸੰਸਥਾਵਾਂ ਤੋਂ ਸਿਖਿਆ ਲਈ ਹੈ। ਬਿੱਲ ਵਿੱਚ ਸਾਫ ਕਿਹਾ ਗਿਆ ਹੈ ਕਿ ਐੱਚ 1 ਬੀ ਵੀਜ਼ਾ ਜਾਂ ਐੱਲ 1 ਵੀਜ਼ਾਧਾਰਕ ਕਿਸੇ ਵੀ ਕੀਮਤ 'ਤੇ ਅਮਰੀਕੀ ਵਰਕਰਾਂ ਦਾ ਸਥਾਨ ਨਹੀਂ ਲੈਣਗੇ। ਸੈਨੇਟ ਵਿੱਚ ਇਸ ਬਿੱਲ ਨੂੰ ਸੈਨੇਟਰ ਚਕ ਗ੍ਰੇਸਲੀ ਤੇ ਡਿਕ ਡਰਬਿਨ ਨੇ ਪੇਸ਼ ਕੀਤਾ।