ਵੈਨਕੂਵਰ, 22 ਅਕਤੂਬਰ (ਪੋਸਟ ਬਿਊਰੋ) : ਪੈਸੇਫਿਕ ਓਸ਼ਨ ਦੇ ਨਾਲ ਲੱਗਦੇ ਵੈਨਕੂਵਰ ਆਈਲੈਂਡ ਦੇ ਤੱਟੀ ਇਲਾਕੇ ਵਿੱਚ ਐਤਵਾਰ ਰਾਤ ਨੂੰ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ ਗਏ।
ਯੂਐਸ ਜਿਓਲਾਜੀਕਲ ਸਰਵੇਖਣ ਵੱਲੋਂ ਜਾਰੀ ਕੀਤੀ ਗਈ ਰਿਪੋਰਟ ਅਨੁਸਾਰ ਟੋਫੀਨੋ ਤੋਂ 260 ਕਿਲੋਮੀਟਰ ਪੱਛਮ ਵੱਲ ਭੂਚਾਲ ਦਾ ਪਹਿਲਾ ਵੱਡਾ ਝਟਕਾ ਮਹਿਸੂਸ ਕੀਤਾ ਗਿਆ, ਜਿਸ ਦੀ ਗਤੀ ਰਿਕਟਰ ਪੈਮਾਨੇ ਉੱਤੇ 6.6 ਮਾਪੀ ਗਈ। ਦੂਜੇ ਝਟਕੇ ਦੀ ਗਤੀ 6.8 ਮਾਪੀ ਗਈ ਜਦਕਿ ਤੀਜੇ ਝਟਕੇ ਦੀ ਗਤੀ 6.5 ਮਾਪੀ ਗਈ। ਸਰਵੇ ਜਿਓਫਿਜਿ਼ਸਟ ਜ਼ਖਾਰੀ ਰੀਵਜ਼ ਨੇ ਦੱਸਿਆ ਕਿ ਇਹ ਤਿੰਨੇ ਝਟਕੇ ਇੱਕ ਇਲਾਕੇ ਵਿੱਚ ਹੀ ਇੱਕ ਘੰਟੇ ਦੇ ਫਰਕ ਨਾਲ ਮਹਿਸੂਸ ਕੀਤੇ ਗਏ। ਇਨ੍ਹਾਂ ਦੀ ਡੂੰਘਾਈ ਜ਼ਮੀਨ ਤੋਂ 10 ਕਿਲੋਮੀਟਰ ਹੇਠਾਂ ਦਰਜ ਕੀਤੀ ਗਈ।
ਗੋਲਡਨ ਵਿੱਚ ਕੋਲੋਰਾਡੋ ਸਥਿਤ ਰੀਵਜ਼ ਨੇ ਇਨ੍ਹਾਂ ਭੂਚਾਲ ਦੇ ਝਟਕਿਆਂ ਨੂੰ ਕਾਫੀ ਖਤਰਨਾਕ ਦੱਸਿਆ। ਐਮਰਜੰਸੀ ਇੰਫੋ ਬੀਸੀ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਭੂਚਾਲ ਦੇ ਇਹ ਝਟਕੇ ਪ੍ਰੋਵਿੰਸ ਵਿੱਚ ਕਈ ਥਾਂ ਉੱਤੇ ਮਹਿਸੂਸ ਕੀਤੇ ਗਏ ਪਰ ਕਿਸੇ ਕਿਸਮ ਦੇ ਨੁਕਸਾਨ ਜਾਂ ਕਿਸੇ ਦੇ ਜ਼ਖ਼ਮੀ ਹੋਣ ਦੀ ਜਾਣਕਾਰੀ ਨਹੀਂ ਹੈ। ਇਹ ਵੀ ਦੱਸਿਆ ਗਿਆ ਕਿ ਕਿਸੇ ਤਰ੍ਹਾਂ ਦੀ ਸੁਨਾਮੀ ਸਬੰਧੀ ਚੇਤਾਵਨੀ ਵੀ ਜਾਰੀ ਨਹੀਂ ਕੀਤੀ ਗਈ ਹੈ।