ਰਾਮਪੁਰ, 3 ਨਵੰਬਰ (ਪੋਸਟ ਬਿਊਰੋ)- ਉੱਤਰ ਪ੍ਰਦੇਸ਼ ਦੇ ਰਾਮਪੁਰ ਸੀ ਆਰ ਪੀ ਐੱਫ ਗਰੁੱਪ ਸੈਂਟਰ ਉੱਤੇ ਅੱਤਵਾਦੀ ਹਮਲੇ ਦੇ ਕੇਸ ਵਿੱਚ ਕੱਲ੍ਹ ਐਡੀਸ਼ਨਲ ਜ਼ਿਲ੍ਹਾ ਜੱਜ ਸੰਜੇ ਕੁਮਾਰ ਦੀ ਅਦਾਲਤ ਨੇ ਫੈਸਲਾ ਸੁਣਾਇਆ ਹੈ। ਇਸ ਕੇਸ ਵਿੱਚ ਦੋ ਪਾਕਿਸਤਾਨੀ ਅੱਤਵਾਦੀਆਂ ਸਮੇਤ ਚਾਰ ਜਣਿਆ ਨੂੰ ਫਾਂਸੀ ਦੀ ਸਜ਼ਾ ਸੁਣਾਈ ਗਈ ਹੈ। ਇਸੇ ਕੇਸ ਵਿੱਚ ਅਦਾਲਤ ਨੇ ਮੁਰਾਦਾਬਾਦ ਦੇ ਜੰਗ ਬਹਾਦੁਰ ਬਾਬਾ ਨੂੰ ਉਮਰ ਕੈਦ ਅਤੇ ਫਰਜ਼ੀ ਪਾਸਪੋਰਟ ਅਤੇ ਪਿਸਟਲ ਦੇ ਨਾਲ ਗ੍ਰਿਫਤਾਰ ਮੁੰਬਈ ਦੇ ਫਾਹੀਮ ਅੰਸਾਰੀ ਨੂੰ 10 ਸਾਲ ਕੈਦ ਦੀ ਸਜ਼ਾ ਸੁਣਾਈ ਹੈ।
31 ਦਸੰਬਰ 2007 ਦੀ ਰਾਤ ਜਦੋਂ ਪੂਰਾ ਸ਼ਹਿਰ ਨਵੇਂ ਸਾਲ ਦੇ ਜਸ਼ਨ ਮਨਾਉਂਦਾ ਪਿਆ ਸੀ ਤਾਂ ਅੱਤਵਾਦੀਆਂ ਨੇ ਤੜਕੇ ਢਾਈ ਵਜੇ ਸੀ ਆਰ ਪੀ ਐੱਫ ਗਰੁੱਪ ਸੈਂਟਰ ਉੱਤੇ ਹਮਲਾ ਕੀਤਾ ਸੀ। ਅੱਤਵਾਦੀ ਦਿੱਲੀ-ਲਖਨਊ ਰੋਡ ਉੱਤੇ ਸੀ ਆਰ ਪੀ ਐੱਫ ਗਰੁੱਪ ਸੈਂਟਰ ਦੇ ਗੇਟ ਨੰਬਰ ਇੱਕ ਤੋਂ ਅੰਦਰ ਵੜੇ ਸਨ। ਉਥੇ ਗੇਟ ਤੋਂ ਪਹਿਲਾਂ ਰੇਲਵੇ ਕਰਾਸਿੰਗ ਵੀ ਹੈ, ਜਿਸ ਦੇ ਗੇਟਮੈਨ ਦੇ ਕੈਬਿਨ ਨੇੜੇ ਤਿੰਨ ਜਵਾਨ ਅੱਗ ਬਾਲ ਕੇ ਬੈਠੇ ਸਨ। ਅੱਤਵਾਦੀਆਂ ਨੇ ਤਿੰਨਾਂ ਨੂੰ ਮਾਰ ਦਿੱਤਾ ਸੀ। ਇਸ ਪਿੱਛੋਂ ਅੱਤਵਾਦੀਆਂ ਨੇ ਸੀ ਆਰ ਪੀ ਐੱਫ ਗੇਟ ਉਤੇ ਮੌਜੂਦ ਜਵਾਨਾਂ ਉਤੇ ਏ ਕੇ 47 ਵਿੱਚੋਂ ਗੋਲੀਆਂ ਚਲਾਈਆਂ ਤੇ ਹੈਂਡ ਗ੍ਰਨੇਡ ਸੁੱਟੇ। ਅੱਤਵਾਦੀ ਸੀ ਆਰ ਪੀ ਐੱਫ ਗਰੁੱਪ ਸੈਂਟਰ ਦੇ ਅੰਦਰ ਗਏ ਅਤੇ ਉਥੇ ਕਤਲੇਆਮ ਕੀਤਾ ਸੀ, ਜਿਸ ਵਿੱਚ ਸੱਤ ਜਵਾਨ ਮਾਰੇ ਗਏ ਹਨ। ਅਦਾਲਤ ਨੇ ਸ਼ਰੀਫ ਉਰਫ ਸੁਹੇਲ, ਸ਼ਹਾਬੂਦੀਨ ਉਰਫ ਸਬਾਉਦੀਨ, ਇਮਰਾਨ ਉਰਫ ਅਜੈ ਵਾਸੀ ਗੁਲਾਮ ਕਸ਼ਮੀਰ ਤੇ ਮੁਹੰਮਦ ਫਾਰੂਖ ਵਾਸੀ ਗੁੱਜਰਾਂਵਾਲਾ, ਪਾਕਿਸਤਾਨ ਨੂੰ ਫਾਂਸੀ ਦੀ ਸਜ਼ਾ ਕੀਤੀ ਹੈ।