ਲੱਗਦਾ ਮੰਡੀ ਦਾ ਰੱਫੜ ਨਾ ਕਿਸੇ ਪਾਸੇ,
ਡਾਢੀ ਪੰਜਾਬ ਦੀ ਫਸੀ ਸਰਕਾਰ ਮੀਆਂ।
ਸੜਕਾਂ ਉੱਪਰ ਕਿਸਾਨਾਂ ਨੇ ਲਾਏ ਧਰਨੇ,
ਜਿਨ੍ਹਾਂ ਦੀ ਸੁਣੀ ਨਾ ਜਾਏ ਪੁਕਾਰ ਮੀਆਂ।
ਮਾਰੇ ਮੰਡੀ ਦੀ ਲੇਬਰ ਪਈ ਆਪ ਚੀਕਾਂ,
ਦੁਖੀਏ ਮਗਰ ਨੇ ਬਾਲ-ਪਰਵਾਰ ਮੀਆਂ।
ਪਾਉਂਦੇ ਬੱਦਲ ਵੀ ਘਾਬਰਾਂ ਆਣ ਓਧਰ,
ਕਰਦਾ ਮੌਸਮ ਵੀ ਨਿੱਤ ਆ ਮਾਰ ਮੀਆਂ।
ਸਾਰੀਆਂ ਧਿਰਾਂ ਥੀਂ ਚਾਹੀਦਾ ਸਿਰ ਜੋੜਨ,
ਪਾਸੇ ਕਿਸੇ ਤਾਂ ਲਾਉਣ ਕੁਝ ਗੱਲ ਮੀਆਂ।
ਲਮਕਦੀ ਗੱਲ ਨੇ ਬਹੁਤ ਨੁਕਸਾਨ ਕੀਤਾ,
ਜਿੱਦਾਂ ਸੁੱਝਦਾ, ਭਾਲਣ ਕੋਈ ਹੱਲ ਮੀਆਂ।
-ਤੀਸ ਮਾਰ ਖਾਂ