ਬਰੈਂਪਟਨ, 1 ਅਕਤੂਬਰ (ਪੋਸਟ ਬਿਊਰੋ) : ਲੋਕਲ ਐਨਡੀਪੀ ਉਮੀਦਵਾਰਾਂ ਵੱਲੋਂ ਅੱਜ ਬਰੈਂਪਟਨ ਵਾਸੀਆਂ ਲਈ ਨਵੀਂ ਡੀਲ ਸਾਂਝੀ ਕੀਤੀ ਗਈ। ਇਸ ਤਹਿਤ ਬਰੈਂਪਟਨ ਵਾਸੀਆਂ ਲਈ ਬਿਹਤਰੀਨ ਹੈਲਥ ਕੇਅਰ ਸਰਵਿਸਿਜ਼ ਬਾਰੇ ਜਾਣਕਾਰੀ ਦਿੱਤੀ ਗਈ।
ਬਰੈਂਪਟਨ ਈਸਟ ਤੋਂ ਐਨਡੀਪੀ ਉਮੀਦਵਾਰ ਸਰਨਜੀਤ ਸਿੰਘ ਨੇ ਦੱਸਿਆ ਕਿ ਸਥਾਨਕ ਲੋਕਾਂ ਤੋਂ ਹੀ ਉਨ੍ਹਾਂ ਨੂੰ ਪਤਾ ਲੱਗਿਆ ਹੈ ਕਿ ਆਪਦੀ ਨੁਮਾਇੰਦਗੀ ਲਈ ਜਿਨ੍ਹਾਂ ਲਿਬਰਲਾਂ ਨੂੰ ਉਨ੍ਹਾਂ ਚੁਣਿਆ ਸੀ ਉਨ੍ਹਾਂ ਨੇ ਹੀ ਬਰੈਂਪਟਨ ਵਾਸੀਆਂ ਨੂੰ ਇੱਕਲਿਆਂ ਛੱਡ ਦਿੱਤਾ। ਜਿਨ੍ਹਾਂ ਹੈਲਥ ਕੇਅਰ ਸੇਵਾਵਾਂ ਦੀ ਬਰੈਂਪਟਨ ਵਾਸੀਆਂ ਨੂੰ ਫੌਰੀ ਲੋੜ ਹੈ ਉਹ ਉਨ੍ਹਾਂ ਕੋਲ ਨਹੀਂ ਹਨ। ਉਨ੍ਹਾਂ ਆਖਿਆ ਕਿ ਬੜੇ ਸ਼ਰਮ ਵਾਲੀ ਗੱਲ ਹੈ ਕਿ ਕੈਨੇਡਾ ਵਰਗੇ ਦੇਸ਼ ਵਿੱਚ ਲੋਕਾਂ ਦਾ ਇਲਾਜ ਹਸਪਤਾਲਾਂ ਦੇ ਹਾਲਵੇਅਜ਼ ਵਿੱਚ ਕੀਤਾ ਜਾਂਦਾ ਹੈ ਜਾਂ ਡੈਂਟਿਸਟ ਕੋਲ ਜਾਣਾ ਲੋਕਾਂ ਲਈ ਵਾਰਾ ਨਹੀਂ ਖਾਂਦਾ। ਸਰਨਜੀਤ ਨੇ ਆਖਿਆ ਕਿ ਬਰੈਂਪਟਨ ਵਿੱਚ ਲੋਕਾਂ ਲਈ ਹੈਲਥ ਕੇਅਰ ਸਰਵਿਸਿਜ਼ ਵਿੱਚ ਸੁਧਾਰ ਕਰਨ ਲਈ ਐਨਡੀਪੀ ਕੋਲ ਪੂਰੀ ਯੋਜਨਾ ਹੈ।
ਕਈ ਸਾਲਾਂ ਤੱਕ ਲਿਬਰਲਾਂ ਤੇ ਕੰਜ਼ਰਵੇਟਿਵਾਂ ਨੇ ਬਰੈਂਪਟਨਵਾਸੀਆਂ ਦੀ ਕੋਈ ਕਦਰ ਨਹੀਂ ਕੀਤੀ ਤੇ ਜਾਂ ਫਿਰ ਅਜਿਹੀਆਂ ਸੇਵਾਵਾਂ ਵਿੱਚ ਕਟੌਤੀ ਕਰ ਦਿੱਤੀ ਜਿਨ੍ਹਾਂ ਦੀ ਲੋਕਾਂ ਨੂੰ ਬਹੁਤ ਲੋੜ ਸੀ। ਉਨ੍ਹਾਂ ਆਖਿਆ ਕਿ ਪਿਛਲੇ ਸਾਲ ਹਾਲਵੇਅ ਵਿੱਚ ਇਲਾਜ ਕੀਤੇ ਜਾਣ ਦੇ ਬਰੈਂਪਟਨ ਵਿੱਚ 4500 ਤੋਂ ਵੀ ਜਿ਼ਆਦਾ ਮਾਮਲੇ ਮਿਲਦੇ ਹਨ। ਜਗਮੀਤ ਸਿੰਘ ਤੇ ਐਨਡੀਪੀ ਵੱਲੋਂ ਬਰੈਂਪਟਨ ਵਿੱਚ ਦੂਜੇ ਹਸਪਤਾਲ ਦਾ ਨਿਰਮਾਣ ਕਰਨ ਤੇ ਪੀਲ ਮੈਮੋਰੀਅਲ ਨੂੰ ਅਪਗ੍ਰੇਡ ਕਰਨ ਦਾ ਤਹੱਈਆ ਪ੍ਰਗਟਾਇਆ ਗਿਆ ਹੈ। ਅਜਿਹਾ ਇਸ ਲਈ ਕੀਤਾ ਗਿਆ ਹੈ ਤਾਂ ਕਿ ਲੋਕਾਂ ਨੂੰ ਆਪਣੀ ਹੀ ਕਮਿਊਨਿਟੀ ਵਿੱਚ ਰਹਿ ਕੇ ਉਹ ਸਾਂਭ ਸੰਭਾਲ ਮਿਲ ਸਕੇ ਜਿਸ ਦੀ ਉਨ੍ਹਾਂ ਨੂੰ ਲੋੜ ਹੈ।
ਬਰੈਂਪਟਨ ਸਾਊਥ ਤੋਂ ਐਨਡੀਪੀ ਉਮੀਦਵਾਰ ਮਨਦੀਪ ਕੌਰ ਦਾ ਕਹਿਣਾ ਹੈ ਕਿ ਬਰੈਂਪਟਨ ਵਾਸੀ ਇਹ ਸਮਝਦੇ ਹਨ ਕਿ ਜਗਮੀਤ ਸਿੰਘ ਇੱਕ ਫਾਈਟਰ ਹਨ। ਇਨ੍ਹਾਂ ਚੋਣਾਂ ਵਿੱਚ ਐਨਡੀਪੀ ਸਾਡੀ ਸਿਟੀ ਲਈ ਕੁੱਝ ਵੱਖਰਾ ਕਰਨ ਲਈ ਪੂਰੀ ਤਰ੍ਹਾਂ ਤਿਆਰ ਹੈ। ਉਨ੍ਹਾਂ ਆਖਿਆ ਕਿ ਐਨਡੀਪੀ ਨੈਸ਼ਨਲ ਮੈਡੀਕਲ ਕਵਰੇਜ ਵਿੱਚ ਡੈਂਟਲ ਕੇਅਰ ਤੇ ਫਰੀ ਪ੍ਰਿਸਕ੍ਰਿਪਸ਼ਨ ਡਰੱਗ ਨੂੰ ਵੀ ਸ਼ਾਮਲ ਕਰੇਗੀ ਤਾਂ ਕਿ ਕਿਸੇ ਵੀ ਬਰੈਂਪਟਨ ਵਾਸੀ ਨੂੰ ਇਲਾਜ ਪੱਖੋਂ ਕੋਈ ਤਕਲੀਫ ਨਾ ਹੋਵੇ। ਇਸ ਤੋਂ ਇਲਾਵਾ ਐਨਡੀਪੀ ਨੈਸ਼ਨਲ ਆਟਿਜ਼ਮ ਸਟਰੈਟੇਜੀ ਲਿਆ ਕੇ ਉਨ੍ਹਾਂ ਪਰਿਵਾਰਾਂ ਨੂੰ ਵੀ ਰਾਹਤ ਦੇਵੇਗੀ ਜਿਹੜੇ ਇਸ ਸਮੱਸਿਆ ਨਾਲ ਜੂਝ ਰਹੇ ਹਨ।