ਜਗਮੀਤ ਸਿੰਘ ਦਾ ਧਿਆਨ ਅੱਠਵੇਂ ਦਿਨ ਵੀ ਬੀਸੀ ’ਚ
ਓਟਵਾ, 1 ਅਕਤੂਬਰ (ਪੋਸਟ ਬਿਊਰੋ) : ਜਗਮੀਤ ਸਿੰਘ ਦਾ ਬ੍ਰਿਟਿਸ਼ ਕੋਲੰਬੀਆ ਨਾਲ ਪਿਆਰ ਲਗਾਤਾਰ ਅੱਠਵੇਂ ਦਿਨ ਵੀ ਬਰਕਰਾਰ ਰਿਹਾ। ਐਨਡੀਪੀ ਆਗੂ ਵੱਲੋਂ ਐਨੇ ਦਿਨਾਂ ਤੋਂ ਵੈਸਟ ਕੋਸਟ ਉੱਤੇ ਹੀ ਆਪਣਾ ਚੋਣ ਪ੍ਰਚਾਰ ਕੀਤਾ ਜਾ ਰਿਹਾ ਹੈ।
ਆਪਣੇ 10 ਬਿਲੀਅਨ ਡਾਲਰ ਦੇ ਯੂਨੀਵਰਸਲ ਚਾਈਲਡ ਕੇਅਰ ਪਲੈਨ ਦੀ ਪ੍ਰਮੋਸ਼ਨ ਲਈ ਜਗਮੀਤ ਸਿੰਘ ਉੱਥੋਂ ਦੇ ਪਰਿਵਾਰਾਂ ਨਾਲ ਬ੍ਰੇਕਫਾਸਟ ਵੀ ਕਰ ਰਹੇ ਹਨ। ਐਨਡੀਪੀ ਨੂੰ ਇੱਥੋਂ ਕੁੱਝ ਸੀਟਾਂ ਹੱਥ ਲੱਗਣ ਦੀ ਆਸ ਹੈ। ਇਸੇ ਲਈ ਜਗਮੀਤ ਸਿੰਘ ਵੱਲੋਂ ਬਹੁਤਾ ਜੋ਼ਰ ਇੱਥੇ ਲਾਇਆ ਜਾ ਰਿਹਾ ਹੈ। ਪਰ ਬਾਕੀ ਪਾਰਟੀਆਂ ਦੇ ਆਗੂ ਅੱਜਕੱਲ੍ਹ ਟੋਰਾਂਟੋ ਉੱਤੇ ਆਪੋ ਆਪਣਾ ਧਿਆਨ ਕੇਂਦਰਿਤ ਕਰ ਰਹੇ ਹਨ।
ਲਿਬਰਲ ਆਗੂ ਜਸਟਿਨ ਟਰੂਡੋ ਤੇ ਕੰਜ਼ਰਵੇਟਿਵ ਆਗੂ ਐਂਡਰਿਊ ਸ਼ੀਅਰ ਵੱਲੋਂ ਗ੍ਰੇਟਰ ਟੋਰਾਂਟੋ ਏਰੀਆ ਵਿੱਚ ਸਵੇਰ ਵੇਲੇ ਨਵੇਂ ਤੋਂ ਨਵੇਂ ਐਲਾਨ ਕੀਤੇ ਜਾ ਰਹੇ ਹਨ। ਟਰੂਡੋ ਵੱਲੋਂ ਗੰਨ ਕੰਟਰੋਲ ਨੀਤੀ ਉੱਤੇ ਦੂਜਾ ਦਿਨ ਖਰਚਿਆ ਜਾ ਰਿਹਾ ਹੈ। ਇਸ ਸਬੰਧ ਵਿੱਚ ਉਨ੍ਹਾਂ ਵੱਲੋਂ ਰਿਚਮੰਡ ਹਿੱਲ, ਓਨਟਾਰੀਓ ਵਿੱਚ ਟੋਰਾਂਟੋ ਦੇ ਸਬਅਰਬਜ਼ ਦੇ ਮੇਅਰਜ਼ ਨਾਲ ਵੀ ਮੁਲਾਕਾਤ ਕੀਤੀ ਜਾ ਰਹੀ ਹੈ। ਦੂਜੇ ਪਾਸੇ ਸ਼ੀਅਰ ਵੱਲੋਂ ਟੋਰਾਂਟੋ ਦੇ ਐਗਜ਼ੀਬਿਸ਼ਨ ਗ੍ਰਾਊਂਡਜ਼ ਉੱਤੇ ਸਥਿਤ ਲੇਕਫਰੰਟ ਹੋਟਲ ਵਿੱਚ ਐਲਾਨ ਕੀਤਾ ਜਾ ਰਿਹਾ ਹੈ।
ਗ੍ਰੀਨ ਪਾਰਟੀ ਦੀ ਆਗੂ ਐਲਿਜ਼ਾਬੈੱਥ ਮੇਅ ਸ਼ਾਮ ਨੂੰ ਇੱਕ ਰੈਲੀ ਵਿੱਚ ਹਿੱਸਾ ਲੈਣ ਲਈ ਮਾਂਟਰੀਅਲ ਜਾਣ ਤੋਂ ਪਹਿਲਾਂ ਰਾਇਰਸਨ ਯੂਨੀਵਰਸਿਟੀ ਵਿਖੇ ਪੋਸਟ ਸੈਕੰਡਰੀ ਐਜੂਕੇਸ਼ਨ ਸਬੰਧੀ ਪਾਰਟੀ ਦੀ ਨੀਤੀ ਬਾਰੇ ਗੱਲ ਕਰ ਰਹੀ ਹੈ। ਪੀਪਲਜ਼ ਪਾਰਟੀ ਦੇ ਆਗੂ ਮੈਕਸਿਮ ਬਰਨੀਅਰ ਦੱਖਣਪੱਛਮ ਓਨਟਾਰੀਓ ਵਿੱਚ ਕਈ ਥਾਵਾਂ ਉੱਤੇ ਜਾ ਕੇ ਆਪਣੀ ਪਾਰਟੀ ਦੀਆਂ ਨੀਤੀਆਂ ਦਾ ਪ੍ਰਚਾਰ ਕਰ ਰਹੇ ਹਨ।