ਅੰਮ੍ਰਿਤਸਰ, 17 ਅਕਤੂਬਰ (ਪੋਸਟ ਬਿਊਰੋ)- ਪੁਲਸ ਪਾਰਟੀ 'ਤੇ ਹਮਲਾ ਕਰਨ ਦੇ ਅੱਠ ਸਾਲ ਤੋਂ ਚੱਲ ਰਹੇ ਕੇਸ ਵਿੱਚ ਕੱਲ੍ਹ ਅਦਾਲਤ ਨੇ ਗੈਂਗਸਟਰ ਭੁਪਿੰਦਰ ਸਿੰਘ ਉਰਫ ਸੋਨੂੰ ਕੰਗਲਾ ਅਤੇ ਉਸ ਦੇ ਨਾਲ ਰਮਣੀਕ ਸਿੰਘ, ਸੋਨੂ ਮੋਟਾ, ਵਿਜੇ ਕੁਮਾਰ ਉਰਫ ਟੋਪੀ, ਪ੍ਰਹਿਲਾਦ ਕੁਮਾਰ ਅਤੇ ਸਿਮਰਨਜੀਤ ਸਿੰਘ ਨੂੰ ਬਰੀ ਕਰ ਦਿੱਤਾ ਹੈ। ਸਬੂਤਾਂ ਦੀ ਘਾਟ ਕਾਰਨ ਉਕਤ ਤਿੰਨੇ ਗੈਂਗਸਟਰ ਬੇਕਸੂਰ ਸਾਬਤ ਹੋ ਗਏ। ਇਸ ਮਾਮਲੇ ਵਿੱਚ ਜਿਨ੍ਹਾਂ ਪੁਲਸ ਅਧਿਕਾਰੀਆਂ ਦੇ ਬਿਆਨਾਂ 'ਤੇ ਕੇਸ ਦਰਜ ਹੋਇਆ ਸੀ, ਬਾਅਦ ਵਿੱਚ ਉਹ ਖੁਦ ਹੀ ਇਸ ਨੂੰ ਅੱਗੇ ਨਹੀਂ ਵਧਾ ਸਕੇ।
ਥਾਣਾ ਸੁਲਤਾਨਵਿੰਡ ਵਿੱਚ 2010 ਵਿੱਚ ਦਰਜ ਐੱਫ ਆਈ ਆਰ ਵਿੱਚ ਸ਼ਿਕਾਇਤ ਕਰਤਾ ਸਬ ਇੰਸਪੈਕਟਰ ਤਾਰਾ ਚੰਦ ਨੇ ਦੱਸਿਆ ਸੀ ਕਿ ਉਹ ਥਾਣਾ ਕਰਤਾਰਪੁਰ ਵਿੱਚ ਸਹਾਇਕ ਇੰਚਾਰਜ ਸਨ। ਉਨ੍ਹਾਂ ਨੇ ਚੋਰੀ ਦੇ ਕੇਸ ਵਿੱਚ ਮਨਿੰਦਰ ਉਰਫ ਸੋਨੂੰ ਨੂੰ ਗ੍ਰਿਫਤਾਰ ਕੀਤਾ ਸੀ ਅਤੇ ਚੋਰੀ ਦੇ ਸਾਮਾਨ ਦੀ ਰਿਕਵਰੀ ਲਈ ਉਹ ਇੰਸਪੈਕਟਰ ਇੰਦਰਜੀਤ ਸਿੰਘ ਅਤੇ ਹੋਰਾਂ ਮੁਲਾਜ਼ਮਾਂ ਨਾਲ ਦੋਸ਼ੀ ਦੀ ਦੱਸੀ ਜਗ੍ਹਾ ਉਤੇ ਰੇਡ ਕਰਨ ਗਏ ਸਨ। ਉਹ ਦੋਸ਼ੀ ਨੂੰ ਲੈ ਕੇ ਸਰਕਾਰੀ ਗੱਡੀ ਵਿੱਚ ਸਨ ਅਤੇ ਥਾਣਾ ਇੰਚਾਰਜ ਇੰਦਰਜੀਤ ਸਿੰਘ ਵੱਖਰੀ ਗੱਡੀ ਵਿੱਚ ਅੱਗੇ ਜਾ ਰਹੇ ਸਨ। ਥਾਣਾ ਸੁਲਤਾਨਵਿੰਡ ਰੋਡ 'ਤੇ ਮੋਟਰ ਸਾਈਕਲਾਂ 'ਤੇ ਆਏ 20-25 ਨੌਜਵਾਨਾਂ ਨੇ ਉਨ੍ਹਾਂ ਤੇ ਹਮਲਾ ਕਰ ਕੇ ਦੋਸ਼ੀ ਮਨਿੰਦਰ ਸਿੰਘ ਨੂੰ ਛੁਡਾਉਣ ਦੀ ਕੋਸ਼ਿਸ਼ ਕੀਤੀ। ਬਾਅਦ ਵਿੱਚ ਪਤਾ ਲੱਗਾ ਕਿ ਇਸ ਮੌਕੇ ਹਮਲਾ ਕਰਨ ਵਾਲੇ ਸੋਨੂੰ ਕੰਗਲਾ, ਸੋਨੂੰ ਮੋਟਾ, ਵਿਜੇ ਟੋਪੀ, ਪ੍ਰਹਿਲਾਦ ਕੁਮਾਰ, ਸਿਮਰਨਜੀਤ ਸਿੰਘ ਆਦਿ ਸਨ। ਅਦਾਲਤ ਵਿੱਚ ਪੁਲਸ ਕੇਸ ਸਾਬਤ ਨਹੀਂ ਕਰ ਸਕੀ।