· ਗੰਨ ਹਿੰਸਾ ਰੋਕਣ ਲਈ ਚੁੱਕਾਂਗੇ ਠੋਸ ਕਦਮ
ਓਟਵਾ, 30 ਸਤੰਬਰ (ਪੋਸਟ ਬਿਊਰੋ) : ਫੈਡਰਲ ਲਿਬਰਲਾਂ ਵੱਲੋਂ ਚੋਣਾਂ ਸਬੰਧੀ ਆਪਣਾ ਪਲੇਟਫਾਰਮ ਜਾਰੀ ਕਰ ਦਿੱਤਾ ਗਿਆ ਹੈ। ਇਸ ਨਾਲ ਨਾ ਸਿਰਫ ਜਸਟਿਨ ਟਰੂਡੋ ਬਾਰੇ ਸਗੋਂ ਉਨ੍ਹਾਂ ਦੇ ਵਿਰੋਧੀਆਂ ਬਾਰੇ ਵੀ ਗੱਲ ਕਰਨ ਦਾ ਮੌਕਾ ਮਿਲ ਗਿਆ ਹੈ।
ਕੰਜ਼ਰਵੇਟਿਵਾਂ ਦੀ ਢਾਹ ਭੰਨ੍ਹ ਮੁਤਾਬਕ ਲਿਬਰਲਾਂ ਵੱਲੋਂ 57 ਬਿਲੀਅਨ ਡਾਲਰ ਦਾ ਨਵਾਂ ਖਰਚਾ ਕਰਨ ਦਾ ਵਾਅਦਾ ਆਪਣੇ ਪਲੇਟਫਾਰਮ ਵਿੱਚ ਕੀਤਾ ਗਿਆ ਹੈ। ਇਹ ਵੀ ਆਖਿਆ ਜਾ ਰਿਹਾ ਹੈ ਕਿ ਅਮੀਰਾਂ, ਵੱਡੀਆ ਕੌਮਾਂਤਰੀ ਕਾਰਪੋਰੇਸ਼ਨਾਂ, ਵਿਦੇਸ਼ੀ ਹਾਊਸਿੰਗ ਸੱਟੇਬਾਜ਼ਾਂ ਤੇ ਟੈਕਨੀਕਲ ਜਾਇੰਟਜ਼ ਉੱਤੇ ਨਵੇਂ ਟੈਕਸ ਲਾ ਕੇ ਇਹ ਨਵਾਂ ਖਰਚਾ ਕੱਢਿਆ ਜਾਵੇਗਾ। ਇਸ ਪਲੇਟਫਾਰਮ ਵਿੱਚ ਅਗਲੇ ਸਾਲ 27.4 ਬਿਲੀਅਨ ਡਾਲਰ ਦਾ ਘਾਟਾ ਵੀ ਦਰਸਾਇਆ ਗਿਆ ਹੈ। ਇਹ ਵੀ ਆਖਿਆ ਗਿਆ ਹੈ ਕਿ ਅਗਲੇ ਚਾਰ ਸਾਲਾਂ ਵਿੱਚ ਇਹ ਘਾਟਾ ਘੱਟ ਕੇ 21 ਬਿਲੀਅਨ ਡਾਲਰ ਰਹਿ ਜਾਵੇਗਾ।
ਟਰੂਡੋ ਅੱਜ ਹੈਲਥ ਕੇਅਰ ਪ੍ਰੋਫੈਸ਼ਨਲਜ਼ ਨਾਲ ਗੱਲ ਕਰਨ ਲਈ ਟੋਰਾਂਟੋ ਵਿੱਚ ਹੋਣਗੇ। ਉਨ੍ਹਾਂ ਵੱਲੋਂ ਇਹ ਵੀ ਆਖਿਆ ਜਾ ਰਿਹਾ ਹੈ ਕਿ ਦੁਬਾਰਾ ਸੱਤਾ ਵਿੱਚ ਆਉਣ ਉੱਤੇ ਉਹ ਗੰਨ ਹਿੰਸਾ ਰੋਕਣ ਲਈ ਵੀ ਠੋਸ ਕਦਮ ਚੁੱਕਣਗੇ। ਟੋਰਾਂਟੋ ਦੇ ਪੁਲਿਸ ਡਾਟਾ ਅਨੁਸਾਰ ਇਸ ਸਮੇਂ ਗੰਨ ਹਿੰਸਾ ਦਾ ਮੁੱਦਾ ਸਿਟੀ ਦਾ ਮੁੱਖ ਮੁੱਦਾ ਬਣਿਆ ਹੋਇਆ ਹੈ। ਇੱਕਲੇ ਇਸ ਸਾਲ ਹੀ ਸ਼ੂਟਿੰਗ ਦੇ 325 ਮਾਮਲੇ ਸਾਹਮਣੇ ਆਏ ਜਿਨ੍ਹਾਂ ਵਿੱਚੋਂ 26 ਘਾਤਕ ਸਿੱਧ ਹੋਏ।
ਸ਼ੀਅਰ ਵੀ ਇਸ ਸਮੇਂ ਟੋਰਾਂਟੋ ਵਿੱਚ ਹੀ ਹਨ ਤੇ ਉਨ੍ਹਾਂ ਨੂੰ ਵੀ ਕਈ ਸਵਾਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਲਿਬਰਲਾਂ ਦਾ ਕਹਿਣਾ ਹੈ ਕਿ ਕੰਜ਼ਰਵੇਟਿਵ ਆਗੂ ਸਿਆਸਤ ਵਿੱਚ ਆਉਣ ਤੋਂ ਪਹਿਲਾਂ ਇੰਸ਼ੋਰੈਂਸ ਬ੍ਰੋਕਰ ਹੋਣ ਦਾ ਦਾਅਵਾ ਕਰਦੇ ਰਹੇ ਹਨ ਪਰ ਲਿਬਰਲਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਇਸ ਸਬੰਧ ਵਿੱਚ ਕਦੇ ਆਪਣੀ ਲਾਇਸੰਸਿੰਗ ਪ੍ਰਕਿਰਿਆ ਪੂਰੀ ਨਹੀਂ ਕੀਤੀ। ਐਨਡੀਪੀ ਆਗੂ ਜਗਮੀਤ ਸਿੰਘ ਹਾਲ ਦੀ ਘੜੀ ਵੈਨਕੂਵਰ ਇਲਾਕੇ ਉੱਤੇ ਹੀ ਆਪਣਾ ਧਿਆਨ ਕੇਂਦਰਿਤ ਕਰ ਰਹੇ ਹਨ ਤੇ ਨਾਲ ਹੀ ਲਿਬਰਲਾਂ ਉੱਤੇ ਵੀ ਆਪਣੇ ਵਾਰ ਜਾਰੀ ਰੱਖਣਗੇ। ਗ੍ਰੀਨ ਪਾਰਟੀ ਦੀ ਆਗੂ ਐਲਿਜ਼ਾਬੈੱਥ ਮੇਅ ਵੀ ਵੈਨਕੂਵਰ ਵਿੱਚ ਹੀ ਆਪਣੇ ਦਿਨ ਦੀ ਸ਼ੁਰੂਆਤ ਕਰ ਰਹੀ ਹੈ ਜਦਕਿ ਪੀਪਲਜ਼ ਪਾਰਟੀ ਆਗੂ ਮੈਕਸਿਮ ਬਰਨੀਅਰ ਵਿੰਡਸਰ, ਓਨਟਾਰੀਓ ਦਾ ਦੌਰਾ ਕਰਨਗੇ।