ਲੁਧਿਆਣਾ, 17 ਅਕਤੂਬਰ (ਪੋਸਟ ਬਿਊਰੋ)- ਸ਼੍ਰੋਮਣੀ ਅਕਾਲੀ ਦਲ ਲੁਧਿਆਣਾ ਲੋਕ ਸਭਾ ਸੀਟ 'ਤੇ ਇਸ ਵਾਰ ਫਿਲਮੀ ਹੀਰੋ ਸੰਨੀ ਦਿਓਲ ਉਤੇ ਟੇਕ ਰੱਖ ਕੇ ਚੱਲ ਰਿਹਾ ਸੀ ਤਾਂ ਕਿ ਉਸ ਨੂੰ ਉਮੀਦਵਾਰ ਬਣਾ ਕੇ ਕਾਂਗਰਸੀ ਐੱਮ ਪੀ ਰਵਨੀਤ ਸਿੰਘ ਬਿੱਟੂ ਦਾ ਮੁਕਾਬਲਾ ਕੀਤਾ ਜਾਵੇ, ਪਰ ਜਾਣਕਾਰ ਸੂਤਰਾਂ ਮੁਤਾਬਕ ਸੰਨੀ ਦਿਓਲ ਨੇ ਅਕਾਲੀ ਟਿਕਟ 'ਤੇ ਚੋਣ ਲੜਨ ਤੋਂ ਸਾਫ ਨਾਂਹ ਕਰ ਦਿੱਤੀ ਹੈ। ਪਤਾ ਲੱਗਾ ਹੈ ਕਿ ਉਨ੍ਹਾਂ ਭਾਜਪਾ ਟਿਕਟ 'ਤੇ ਹਾਮੀ ਭਰੀ ਹੈ, ਪਰ ਭਾਜਪਾ ਕਿਸੇ ਕੀਮਤ 'ਤੇ ਅੰਮ੍ਰਿਤਸਰ ਸੀਟ ਛੱਡ ਕੇ ਲੁਧਿਆਣਾ ਲੈਣ ਦੇ ਮੂਡ 'ਚ ਨਹੀਂ ਦੱਸੀ ਜਾਂਦੀ, ਜਿਸ ਕਾਰਨ ਸ਼੍ਰੋਮਣੀ ਅਕਾਲੀ ਦਲ ਨੇ ਸਾਬਕਾ ਮੰਤਰੀ ਮਹੇਸ਼ਇੰਦਰ ਸਿੰਘ ਗਰੇਵਾਲ ਨੂੰ ਥਾਪੜਾ ਦੇ ਦਿੱਤਾ ਹੈ।
ਲੁਧਿਆਣਾ ਸੀਟ ਬਾਰੇ ਸਿਆਸੀ ਮਾਹਰਾਂ ਦੀ ਰਾਏ ਹੈ ਕਿ ਕਾਂਗਰਸੀ ਐੱਮ ਪੀ ਦੇ ਮੁਕਾਬਲੇ ਮਹੇਸ਼ਇੰਦਰ ਸਿੰਘ ਗਰੇਵਾਲ ਦੀ ਚੋਣ ਤਾਂ ਅਕਾਲੀ ਦਲ ਨੇ ਕਰ ਲਈ ਹੈ, ਪਰ ਲੁਧਿਆਣਾ ਵਿਚਲੀ ਅਕਾਲੀ ਲੀਡਰਸ਼ਿਪ ਗਰੇਵਾਲ ਦੀ ਮਦਦ 'ਤੇ ਕਿੰਨੀ ਖਰੀ ਉਤਰਦੀ ਹੈ, ਇਹ ਤਾਂ ਸਮਾਂ ਹੀ ਦੱਸੇਗਾ। ਗਰੇਵਾਲ ਲੰਬੇ ਸਮੇਂ ਬਾਅਦ ਲੁਧਿਆਣਾ ਤੋਂ ਚੋਣ ਲੜਨ ਲੱਗੇ ਹਨ। ਉਨ੍ਹਾਂ 1997 ਵਿੱਚ ਪਹਿਲੀ ਚੋਣ ਲੁਧਿਆਣਾ ਪੱਛਮੀ ਤੋਂ ਲੜੀ ਸੀ ਅਤੇ ਢਾਈ ਸਾਲ ਵਜ਼ੀਰ ਰਹੇ ਸਨ। ਜ਼ਿਆਦਾਤਰ ਉਨ੍ਹਾਂ ਕੋਲ ਪ੍ਰਕਾਸ਼ ਸਿੰਘ ਬਾਦਲ ਦੇ ਸਲਾਹਕਾਰ ਦੀ ਕੁਰਸੀ ਰਹੀ ਹੈ। ਉਸ ਦੀ ਹਿੰਦੂ ਭਾਈਚਾਰੇ ਵਿੱਚ ਪਕੜ ਵੀ ਦੱਸੀ ਜਾਂਦੀ ਹੈ ਤੇ ਲੁਧਿਆਣਾ ਬੈਠੇ ਦੋ ਆਜ਼ਾਦ ਬੈਂਸ ਭਰਾ ਵੀ ਉਨ੍ਹਾਂ ਦੇ ਕਿਸੇ ਵੇਲੇ ਦੇ ਚੰਗੇ ਮਿੱਤਰ ਹਨ। ਉਨ੍ਹਾਂ ਦੇ ਘਰ ਬਾਦਲ ਨੂੰ ਲਿਜਾਣ ਵਿੱਚ ਵੀ ਗਰੇਵਾਲ ਦੀ ਵੱਡੀ ਭੂਮਿਕਾ ਸੀ, ਇਸ ਲਈ ਸ਼ਾਇਦ ਉਹ ਖੁੱਲ੍ਹਦਿਲੀ ਦਿਖਾਉਣ, ਪਰ ਜਿੰਨਾ ਚਿਰ ਗਰੇਵਾਲ ਸ਼ਹਿਰ ਦੇ ਅੱਧੀ ਦਰਜਨ ਆਗੂਆਂ ਨੂੰ ਭਰੋਸੇ ਵਿੱਚ ਨਹੀਂ ਲੈਂਦੇ, ਓਨਾ ਚਿਰ ਕੁਝ ਕਹਿਣਾ ਔਖਾ ਹੋਵੇਗਾ।