ਵਾਸ਼ਿੰਗਟਨ, 17 ਅਕਤੂਬਰ (ਪੋਸਟ ਬਿਊਰੋ)- ਮੈਥ ਅਤੇ ਸਾਇੰਸ ਪ੍ਰਤੀ ਜਨੂੰਨ ਰੱਖਣ ਵਾਲੇ ਨੌਜਵਾਨਾਂ ਲਈ ਅਮਰੀਕਾ 'ਚ ਹੋਣ ਵਾਲੀ ਮਸ਼ਹੂਰ ਸਾਲਾਨਾ ਕੌਮਾਂਤਰੀ ਵਿਗਿਆਨ ਮੁਕਾਬਲੇਬਾਜ਼ੀ ‘ਬ੍ਰੇਕਥਰੂ ਜੂਨੀਅਰ ਚੈਲੰਜ' ਦੇ ਆਖਰੀ ਪੜਾਅ 'ਚ ਤਿੰਨ ਭਾਰਤੀ ਵਿਦਿਆਰਥੀਆਂ ਨੇ ਥਾਂ ਬਣਾਈ ਹੈ। ਇਸ ਦੇ ਆਖਰੀ ਦੌਰ ਵਿੱਚ ਕੁੱਲ 15 ਮੁਕਾਬਲੇਬਾਜ਼ਾਂ ਨੂੰ ਚੁਣਿਆ ਗਿਆ ਹੈ, ਜਿਸ ਵਿੱਚ ਤਿੰਨ ਭਾਰਤੀ ਵਿਦਿਆਰਥੀ ਸ਼ਾਮਲ ਹਨ। ਇਹ ਬੰਗਲੌਰ ਤੋਂ ਸਮਯ ਗੋਦਿਕਾ (16) ਅਤੇ ਨਿਖਿਆ ਸ਼ਮਸ਼ੇਰ (16) ਅਤੇ ਦਿੱਲੀ ਤੋਂ ਕਾਵਿਆ ਨੇਗੀ (18) ਹਨ।
ਮੁਕਾਬਲੇ ਲਈ ਦੁਨੀਆ ਭਰ ਤੋਂ 12000 ਤੋਂ ਵੱਧ ਵਿਦਿਆਰਥੀਆਂ ਨੇ ਰਜਿਸਟਰੇਸ਼ਨ ਕਰਵਾਈ ਸੀ, ਜਿਨ੍ਹਾਂ ਨੇ ਫਿਜਿ਼ਕਸ ਜਾਂ ਬਾਇਆਲੋਜੀ ਨਾਲ ਸੰਬੰਧਤ ਦਿਲਚਸਪ ਵੀਡੀਓ ਸੌਂਪੇ ਸਨ। ਜੇਤੂ ਦੇ ਨਾਂਅ ਦਾ ਐਲਾਨ ਸਿਲੀਕਾਨ ਵੈਲੀ ਵਿੱਚ ਚਾਰ ਨਵੰਬਰ ਨੂੰ ਐਲਾਨ ਕੀਤਾ ਜਾਵੇਗਾ। ਉਸ ਨੂੰ ਕਾਲਜ ਸਕਾਲਰਸ਼ਿਪ ਵਿੱਚ 250000 ਅਮਰੀਕੀ ਡਾਲਰ ਦੀ ਰਕਮ ਦਿੱਤੀ ਜਾਵੇਗੀ। ਜੇਤੂ ਵਿਦਿਆਰਥੀ ਨੂੰ ਇਸ ਲਈ ਪ੍ਰੇਰਿਤ ਕਰਨ ਅਤੇ ਉਸ ਨੂੰ ਤਿਆਰ ਕਰਨ ਵਾਲੇ ਅਧਿਆਪਕ ਨੂੰ ਇਨਾਮ ਦੇ ਰੂਪ ਵਿੱਚ 50 ਹਜ਼ਾਰ ਅਮਰੀਕੀ ਡਾਲਰ ਦੀ ਰਾਸ਼ੀ ਦਿੱਤੀ ਜਾਵੇਗੀ। ਜੇਤੂ ਵਿਦਿਆਰਥੀਆਂ ਦੇ ਸਕੂਲ ਨੂੰ 100000 ਅਮਰੀਕੀ ਡਾਲਰ ਦੀ ਲਾਗਤ ਵਾਲੀ ਇੱਕ ਅਤਿਆਧੁਨਿਕ ਵਿਗਿਆਨ ਪ੍ਰਯੋਗਸ਼ਾਲਾ ਮਿਲੇਗੀ।