ਵਾਸ਼ਿੰਗਟਨ, 17 ਅਕਤੂਬਰ (ਪੋਸਟ ਬਿਊਰੋ)- ਅਮਰੀਕੀ ਰਾਸ਼ਰਪਤੀ ਡੋਨਾਲਡ ਟਰੰਪ ਦੇ ਮੁਰੀਦਾਂ ਲਈ ਬਣਾਏ ਨਵੇਂ ਡੇਟਿੰਗ ਐਪ ‘ਡੋਨਾਲਡ ਡੇਟਰਸ' ਉਤੇ ਆਪਣੀ ਸ਼ੁਰੂਆਤ ਦੇ ਹੀ ਦਿਨ ਇਸ ਦੇ ਯੂਜ਼ਰਜ਼ ਦਾ ਡਾਟਾ ਲੀਕ ਕਰਨ ਦਾ ਦੋਸ਼ ਲੱਗ ਗਿਆਾ ਹੈ। ਇੱਕ ਮੀਡੀਆ ਰਿਪੋਰਟ ਵਿੱਚ ਕੱਲ੍ਹ ਇਹ ਜਾਣਕਾਰੀ ਦਿੱਤੀ ਗਈ।
ਮੇਕ ਅਮਰੀਕਾ ਗ੍ਰੇਟ ਅਗੇਨ (ਅਮਰੀਕਾ ਨੂੰ ਫਿਰ ਮਹਾਨ ਬਣਾਓ) ਦੇ ਨਾਅਰੇ ਦੇ ਨਾਲ ਸ਼ੁਰੂ ਕੀਤੇ ਗਏ ਇਸ ਐਪ ਵਿੱਚ ਅਮਰੀਕਾ ਦੇ ਅਜਿਹੇ ਲੋਕਾਂ ਨੂੰ ਆਕਰਸ਼ਿਤ ਕਰਨ 'ਤੇ ਜ਼ੋਰ ਦਿੱਤਾ ਗਿਆ ਹੈ, ਜੋ ਪ੍ਰੇੇਮੀ, ਦੋਸਤ ਵਗੈਰਾ ਦੀ ਤਲਾਸ਼ ਵਿੱਚ ਹਨ। ਇਹ ਐਪ ਟਰੰਪ ਦੇ ਸਮਰਥਕਾਂ ਨੂੰ ਵੀ ਆਪਸ ਵਿੱਚ ਜੋੜਨ ਦੀ ਕੋਸ਼ਿਸ਼ ਕਰਦਾ ਹੈ। ਤਕਨੀਕ ਨਾਲ ਜੁੜੀਆਂ ਖਬਰਾਂ ਦੇਣ ਵਾਲੀ ਵੈੱਬਸਾਈਟ ਟੇਕ ਕਰਚ ਨੇ ਆਪਣੀ ਇੱਕ ਰਿਪੋਰਟ ਵਿੱਚ ਕਿਹਾ ਕਿ ਐਪ ਦੀ ਸ਼ੁਰੂਆਤ ਦੇ ਪਹਿਲੇ ਹੀ ਦਿਨ ਇਸ ਨਾਲ 1600 ਤੋਂ ਜ਼ਿਆਦਾ ਲੋਕ ਜੁੜ ਗਏ। ਵੈੱਬਸਾਈਟ ਨੇ ਕਿਹਾ ਕਿ ਇਸ ਨੂੰ ਇਸ ਅੰਕੜੇ ਦਾ ਪਤਾ ਇਸ ਲਈ ਲੱਗਾ ਕਿ ਇੱਕ ਫਰਾਂਸੀਸੀ ਸੁਰੱਖਿਆ ਖੋਜਕਰਤਾ ਨੂੰ ਐਪ ਵਿੱਚ ਕੁਝ ਗੜਬੜ ਨਜ਼ਰ ਆਈ। ਉਸ ਨੇ ਦੇਖਿਆ ਕਿ ਐਪ ਇਸਤੇਮਾਲ ਕਰਨ ਵਾਲਿਆਂ ਦਾ ਪੂਰਾ ਡਾਟਾ ਬੇਸ ਡਾਊਨਲੋਡ ਕਰਨਾ ਮੁਮਕਿਨ ਹੈ। ਬਾਅਦ ਵਿੱਚ ਇਸ ਨੂੰ ਖੋਜ ਕਰਤਾ ਨੇ ਵੈੱਬਸਾਈਟ ਦੇ ਨਾਲ ਡਾਟਾ ਬੇਸ ਸਾਂਝਾ ਕੀਤਾ, ਜਿਸ ਵਿੱਚ ਐਪ ਯੂਜ਼ਰਜ਼ ਦੇ ਨਾਂਅ, ਪ੍ਰੋਫਾਈਲ ਤਸਵੀਰਾਂ, ਜੰਤਰਾਂ ਦੀ ਕਿਸਮ, ਉਨ੍ਹਾਂ ਦੇ ਨਿੱਜੀ ਸੰਦੇਸ਼ ਆਦਿ ਸ਼ਾਮਲ ਸਨ।