ਲੰਡਨ, 17 ਅਕਤੂਬਰ (ਪੋਸਟ ਬਿਊਰੋ)- ਗ੍ਰਹਿ ਵਿਭਾਗ ਦੇ ਅੰਕੜਿਆਂ ਅਨੁਸਾਰ ਬ੍ਰਿਟੇਨ ਵਿੱਚ ਨਫਰਤੀ ਅਪਰਾਧਾਂ ਵਿੱਚ 40 ਫੀਸਦੀ ਵਾਧਾ ਹੋਇਆ ਹੈ। ਪਿਛਲੇ ਸਾਲ 5949 ਨਾਲੋਂ 8336 ਵੱਧ ਮਾਮਲੇ ਸਾਹਮਣੇ ਆਏ ਹਨ, ਜਿਨ੍ਹਾਂ 'ਚੋਂ ਸਭ ਤੋਂ ਵੱਧ ਮੁਸਲਿਮ ਭਾਈਚਾਰੇ ਨੂੰ ਨਿਸ਼ਾਨਾ ਬਣਾਇਆ ਗਿਆ ਹੈ, ਜਿਨ੍ਹਾਂ ਦੀ ਗਿਣਤੀ 52 ਫੀਸਦੀ ਹੈ।
ਅਪ੍ਰੈਲ 2017 ਤੋਂ ਮਾਰਚ 2018 ਤੱਕ 94,098 ਮਾਮਲੇ ਦਰਜ ਕੀਤੇ ਗਏ ਹਨ, ਜੋ ਬੀਤੇ ਵਰ੍ਹੇ ਤੋਂ 17 ਫੀਸਦੀ ਵੱਧ ਹਨ। 71251 ਨੂੰ ਨਸਲੀ ਨਫਰਤ ਵਜੋਂ ਦਰਜ ਕੀਤਾ ਗਿਆ ਹੈ। ਨਫਰਤੀ ਅਪਰਾਧਾਂ ਦੀਆਂ ਵੱਖ-ਵੱਖ ਪਰਿਭਾਸ਼ਾਵਾਂ ਹਨ, ਜਿਨ੍ਹਾਂ 'ਚ ਧਰਮ, ਰੰਗ, ਲਿੰਗ, ਅਪਹਾਜਤਾ ਜਾਂ ਟਰਾਂਸਜ਼ੇਂਡਰ ਸ਼ਾਮਲ ਹਨ। ਇਨ੍ਹਾਂ ਘਟਨਾਵਾਂ ਵਿੱਚ ਗਾਲ੍ਹਾਂ ਕੱਢਣਾ, ਧਮਕੀ ਦੇਣਾ, ਪ੍ਰੇਸ਼ਾਨ ਕਰਨਾ, ਹਮਲਾ ਕਰਨਾ ਅਤੇ ਤਾਨੇ ਕਸਣੇ ਤੋਂ ਇਲਾਵਾ ਜਾਇਦਾਦ ਨੂੰ ਨੁਕਸਾਨ ਪਹੁੰਚਾਉਣਾ ਸ਼ਾਮਲ ਹੈ। ਪੁਲਸ ਵੱਲੋਂ ਧਰਮ ਦੇ ਆਧਾਰ 'ਤੇ ਵਾਪਰੀਆਂ ਨਫਰਤੀ ਅਪਰਾਧਾਂ ਦੀਆਂ ਘਟਨਾਵਾਂ ਦੀ ਸੂਚੀ ਵਿੱਚ ਸਭ ਤੋਂ ਵੱਧ ਕੇਸ ਮੁਸਲਮਾਨਾਂ ਖਿਲਾਫ 2965, ਯਹੂਦੀਆਂ ਖਿਲਾਫ 672, ਈਸਾਈਆਂ ਖਿਲਾਫ 264, ਸਿੱਖਾਂ ਖਿਲਾਫ 117, ਹਿੰਦੂਆਂ ਖਿਲਾਫ 58, ਬੋਧੀਆਂ ਖਿਲਾਫ 19 ਤੋਂ ਇਲਾਵਾ ਹੋਰ ਧਰਮਾਂ ਵਾਲੇ 311, ਬਿਨਾਂ ਧਰਮ ਵਾਲੇ 237 ਅਤੇ ਅਣਪਛਾਤੇ ਧਰਮਾਂ ਵਾਲੇ 1174 ਸਾਹਮਣੇ ਆਏ ਹਨ। ਪੁਲਸ ਵੱਲੋਂ ਜਾਰੀ ਕੀਤੇ ਅੰਕੜਿਆਂ ਅਨੁਸਾਰ 2012/13 ਵਰ੍ਹੇ ਨਾਲੋਂ ਨਫਰਤੀ ਅਪਰਾਧਾਂ 'ਚ ਦੁਗਣਾ ਵਾਧਾ ਹੋਇਆ ਹੈ, ਉਸ ਸਮੇਂ ਇਹ ਗਿਣਤੀ 42255 ਸੀ।