ਬਰੱਸਲਜ਼, 17 ਅਕਤੂਬਰ (ਪੋਸਟ ਬਿਊਰੋ)- ਬ੍ਰੈਗਜ਼ਿਟ (ਬ੍ਰਿਟੇਨ ਐਗਜਿ਼ਟ ਯੂਰਪੀ ਯੂਨੀਅਨ) ਸਮਝੌਤੇ ਬਾਰੇ ਬ੍ਰਿਟੇਨ ਤੇ ਯੂਰਪੀ ਯੂਨੀਅਨ (ਈ ਯੂ) ਵਿਚਾਲੇ ਅੜਿੱਕਾ ਜਾਰੀ ਹੈ। ਇਸ ਦੇ ਹੱਲ ਲਈ ਬ੍ਰਿਟੇਨ ਦੀ ਪ੍ਰਧਾਨ ਮੰਤਰੀ ਥੈਰੇਸਾ ਅੱਜ ਏਥੇ ਯੂਰਪੀ ਯੂਨੀਅਨ ਦੇ ਨੇਤਾਵਾਂ ਨਾਲ ਗੱਲਬਾਤ ਕਰਨ ਲਈ ਪਹੁੰਚ ਗਈ ਹੈ। ਉਹ ਈ ਯੂ ਤੋਂ ਵੱਖ ਹੋਣ ਦੇ ਸਮਝੌਤੇ ਉੱਤੇ ਸਹਿਮਤੀ ਬਣਾਉਣ ਦੇ ਮਸਲੇ ਉੱਤੇ ਆਪਣੀ ਗੱਲ ਰੱਖਣਗੇ।
ਵਰਨਣ ਯੋਗ ਹੈ ਕਿ ਯੂਰਪੀ ਯੂਨੀਅਨ ਤੋਂ ਬ੍ਰਿਟੇਨ ਦੇ ਹਟਣ ਦੇ ਫ਼ੈਸਲੇ ਸਬੰਧੀ ਇਸ ਹਫ਼ਤੇ ਬਰੱਸਲਸ ਵਿੱਚ ਹੋ ਰਹੇ ਸਿਖਰ ਸੰਮੇਲਨ ਵਿੱਚ ਕੁਝ ਠੋਸ ਨਤੀਜਾ ਨਿਕਲਣ ਦੀ ਆਸ ਪ੍ਰਗਟਾਈ ਗਈ ਹੈ। ਇਹ ਸੱਚਾਈ ਹੈ ਕਿ ਦੋਵਾਂ ਪੱਖਾਂ `ਚ ਬ੍ਰੈਗਜ਼ਿਟ ਮੁੱਦੇ `ਤੇ ਹਾਲੇ ਕੋਈ ਸਹਿਮਤੀ ਨਹੀਂ ਬਣ ਸਕੀ। ਈ ਯੂ ਦੇ ਮੁਖੀ ਡੋਨਾਲਡ ਟਸਕ ਨੇ ਕਿਹਾ ਹੈ, ‘ਮੈਂ ਕੱਲ੍ਹ ਪ੍ਰਧਾਨ ਮੰਤਰੀ ਥੈਰੇਸਾ ਮੇਅ ਤੋਂ ਇਹ ਪੁੱਛਣ ਜਾ ਰਿਹਾ ਹਾਂ ਕਿ ਕੀ ਉਨ੍ਹਾਂ ਕੋਲ ਇਸ ਅੜਿੱਕੇ ਨੂੰ ਦੂਰ ਕਰਨ ਦੀ ਕੋਈ ਠੋਸ ਤਜਵੀਜ਼ ਹੈ?` ਇਸ ਸੰਮੇਲਨ ਵਿੱਚ ਥੈਰੇਸਾ ਮੇਅ ਈ ਯੂ ਦੇ 27 ਹੋਰ ਦੇਸ਼ਾਂ ਦੇ ਮੁਖੀਆਂ ਸਾਹਮਣੇ ਆਪਣੀ ਗੱਲ ਰੱਖਣਗੇ।
ਡੋਨਾਲਡ ਟਸਕ ਨੇ ਸਾਫ਼ ਕੀਤਾ ਹੈ ਕਿ ਜੇ ਯੂਰਪੀ ਯੂਨੀਅਨ ਦੇ ਵਾਰਤਾਕਾਰ ਮਾਈਕਲ ਬਾਰਨੀਅਰ ਅਤੇ ਥੈਰੇਸਾ ਮੇਅ ਇਸ ਸਮਝੌਤਾ ਖਰੜੇ ਦਾ ਕੋਈ ਠੋਸ ਸੰਕੇਤ ਦਿੰਦੇ ਹਨ ਤਾਂ ਉਹ ਬ੍ਰੈਗਜ਼ਿਟ `ਤੇ ਦਸਖਤ ਲਈ ਨਵੰਬਰ `ਚ ਸਿਖਰ ਸੰਮੇਲਨ ਨਹੀਂ ਸੱਦਣਗੇ। ਜੇ ਅਜਿਹਾ ਹੋਇਆ ਤਾਂ ਇਹ ਪੂਰੀ ਪ੍ਰਕਿਰਿਆ ਦਸੰਬਰ ਤੱਕ ਟਲ਼ ਜਾਵੇਗੀ। ਇਸ ਤੋਂ ਪਹਿਲਾਂ ਦੋਵਾਂ ਧਿਰਾਂ `ਚ ਸਹਿਮਤੀ ਬਣੀ ਸੀ ਕਿ ਕਿਸੇ ਸਮਝੌਤੇ ਤੇ ਭਵਿੱਖ ਦੀ ਰੂਪ ਰੇਖਾ ਦੇ ਬਗ਼ੈਰ ਬ੍ਰਿਟੇਨ ਦਾ ਯੂਰਪੀ ਯੂਨੀਅਨ ਤੋਂ 29 ਮਾਰਚ 2019 ਨੂੰ ਬਾਹਰ ਨਿਕਲਣਾ ਆਰਥਿਕ ਤੇ ਸਿਆਸੀ ਸੰਕਟ ਹੋਵੇਗਾ। ਬ੍ਰਿਟੇਨ ਅਤੇ ਯੂਰਪੀ ਯੂਨੀਅਨ ਵਿਚਕਾਰ ਅਸਹਿਮਤੀ ਦਾ ਕਾਰਨ ਇਹ ਹੈ ਕਿ ਬ੍ਰੈਗਜ਼ਿਟ ਤੋਂ ਬਾਅਦ ਆਇਰਲੈਂਡ ਦੀ ਸਰਹੱਦ ਨੂੰ ਕਿੱਦਾਂ ਖੁੱਲ੍ਹਾ ਰੱਖਿਆ ਜਾਵੇਗਾ। ਇਸ ਮਸਲੇ ਉਤੇ ਬ੍ਰਿਟੇਨ `ਚ ਵੀ ਹਾਲਾਤ ਚੰਗੇ ਨਹੀਂ। ਥੈਰੇਸਾ ਮੇ ਨੂੰ ਆਪਣੇ ਦੇਸ਼ `ਚ ਵਿਰੋਧੀ ਧਿਰ ਦੇ ਨਾਲ-ਨਾਲ ਆਪਣੀ ਹੀ ਪਾਰਟੀ ਤੇ ਕੈਬਨਿਟ ਸਹਿਯੋਗੀਆਂ ਦੇ ਵਿਰੋਧ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।