ਫਗਵਾੜਾ, 19 ਸਤੰਬਰ (ਪੋਸਟ ਬਿਊਰੋ)- ਕੱਲ੍ਹ ਇਥੇ ਸਵੇਰੇ ਸੁਖਚੈਨ ਨਗਰ ਵਿੱਚ ਲੁਟੇਰਿਆਂ ਨੇ ਇਕ ਘਰ 'ਚ ਦਾਖਲ ਹੋ ਕੇ ਤੇਜ਼ ਹਥਿਆਰਾਂ ਨਾਲ ਔਰਤ ਦਾ ਕਤਲ ਕਰ ਦਿੱਤਾ। ਮ੍ਰਿਤਕ ਔਰਤ ਦੀ ਪਛਾਣ ਕੁਲਦੀਪ ਕੌਰ (40) ਪਤਨੀ ਨਰਿੰਦਰ ਵਜੋਂ ਹੋਈ ਹੈ, ਜਿਸ ਦਾ ਪਤੀ ਵਿਦੇਸ਼ ਵਿੱਚ ਹੈ।
ਪਤਾ ਲੱਗਾ ਹੈ ਕਿ ਔਰਤ ਆਪਣੇ ਘਰ ਆਪਣੇ 12 ਸਾਲਾ ਪੁੱਤਰ ਸਾਹਿਲਦੀਪ ਨਾਲ ਰਹਿੰਦੀ ਸੀ ਤੇ ਉਸ ਦਾ ਪਤੀ ਦੁਬਈ ਵਿੱਚ ਹੈ। ਉਹ ਕੱਲ੍ਹ ਸਵੇਰੇ ਆਪਣੇ ਲੜਕੇ ਨੂੰ ਸਕੂਲ ਬੱਸ ਤੱਕ ਛੱਡਣ ਲਈ ਘਰ ਨੂੰ ਤਾਲਾ ਲਾ ਕੇ ਗਲੀ ਵੱਲ ਬਾਹਰ ਗਈ ਸੀ, ਜਦੋਂ ਵਾਪਸ ਅੰਦਰ ਗਈ ਤਾਂ ਉਸ ਦੀ ਆਪਣੀ ਭਰਜਾਈ ਮਨਜੀਤ ਕੌਰ ਨਾਲ ਫੋਨ 'ਤੇ ਗੱਲਬਾਤ ਚੱਲ ਰਹੀ ਸੀ ਕਿ ਅਚਾਨਕ ਲੁਟੇਰਿਆਂ ਨੇ ਉਸ ਉੱਤੇ ਹਮਲਾ ਕਰ ਦਿੱਤਾ। ਉਸ ਦੀ ਭਰਜਾਈ ਮਨਜੀਤ ਕੌਰ, ਜੋ ਨੇੜਲੇ ਪੈਂਦੇ ਪਿੰਡ ਨਾਨਕ ਨਗਰ ਰਹਿੰਦੀ ਸੀ, ਆਪਣੇ ਘਰ ਵਾਲੇ ਮਨਜੀਤ ਸਿੰਘ ਨੂੰ ਨਾਲ ਲੈ ਕੇ ਜਦੋਂ ਕੁਲਦੀਪ ਕੌਰ ਦੇ ਘਰ ਪੁੱਜੀ ਤਾਂ ਦੇਖਿਆ ਕਿ ਉਹ ਤੜਫ ਰਹੀ ਸੀ ਜਿਸ ਨੂੰ ਪ੍ਰਾਈਵੇਟ ਹਸਪਤਾਲ ਲਿਆਂਦਾ, ਜਿਥੇ ਉਸ ਨੇ ਦਮ ਤੋੜ ਦਿੱਤਾ। ਇਸ ਦੀ ਸੂਚਨਾ ਮਿਲਦੇ ਸਾਰ ਐਸ ਪੀ ਮਨਵਿੰਦਰ ਸਿੰਘ, ਡੀ ਐਸ ਪੀ ਸੁਰਿੰਦਰ ਚਾਂਦ ਤੇ ਐਸ ਐਚ ਓ ਸਦਰ ਮਨਮੋਹਨ ਸਿੰਘ, ਐਸ ਐਚ ਓ ਰਾਵਲਪਿੰਡੀ ਊਸ਼ਾ ਰਾਣੀ ਘਟਨਾ ਥਾਂ ਪੁੱਜੇ ਅਤੇ ਜਾਂਚ ਸ਼ੁਰੂ ਕੀਤੀ।
ਪੁਲਸ ਦੇ ਮੁਤਾਬਕ ਲੁਟੇਰੇ ਉਸ ਪਾਸੇ ਤੋਂ ਆਏ ਜਿਸ ਪਾਸੇ ਕੋਈ ਵੀ ਸੀ ਸੀ ਟੀ ਵੀ ਕੈਮਰਾ ਨਹੀਂ ਸੀ। ਮ੍ਰਿਤਕ ਦਾ ਲੜਕਾ ਸਾਹਿਲਦੀਪ ਅੱਠਵੀਂ ਕਲਾਸ ਵਿੱਚ ਐਪਲਅੋਰਚਿਡ ਸਕੂਲ ਪੜ੍ਹਦਾ ਹੈ ਤੇ ਉਸ ਦੇ ਪਤੀ ਨੇ ਚਾਰ ਅਕਤੂਬਰ ਨੂੰ ਇੰਡੀਆ ਆਉਣਾ ਸੀ। ਮ੍ਰਿਤਕ ਔਰਤ ਦੇ ਪੇਟ ਉਤੇ 15 ਤੋਂ ਵੱਧ ਥਾਵਾਂ 'ਤੇ ਚਾਕੂਆਂ ਦੇ ਨਿਸ਼ਾਨ ਸਨ ਤੇ ਇਕ ਚਾਕੂ ਉਸ ਦੀ ਗਰਦਨ ਉੱਤੇ ਵੀ ਵੱਜਾ ਸੀ। ਲੁਟੇਰੇ ਜਾਂਦੇ ਹੋਏ ਉਸ ਦੇ ਗਹਿਣੇ ਤਾਂ ਲੈ ਗਏ ਤੇ ਸਸਤੀ ਕੀਮਤ ਦੀ ਘੜੀ ਛੱਡ ਗਏ, ਜਾਂਦੇ ਸਮੇਂ ਘਰ ਦੀਆਂ ਚਾਬੀਆਂ ਦਾ ਗੁੱਛਾ ਗੇਟ ਵਿਚਕਾਰ ਸੁੱਟ ਗਏ।