ਇਸਲਾਮਾਬਾਦ, 19 ਸਤੰਬਰ (ਪੋਸਟ ਬਿਊਰੋ)- ਪਾਕਿਸਤਾਨ ਮੁਸਲਿਮ ਲੀਗ (ਐਨ) ਦੇ ਇੱਕ ਪਾਰਲੀਮੈਂਟ ਮੈਂਬਰ ਖੇਲ ਦਾਸ ਕੋਹਿਸਤਾਨੀ ਨੇ ਪਾਰਲੀਮੈਂਟ ਵਿੱਚ ਇਮਰਾਨ ਖਾਨ ਦੀ ਪੋਲ ਖੋਲ੍ਹਦਿਆਂ ਕਿਹਾ ਕਿ ਪਿਛਲੇ ਚਾਰ ਮਹੀਨਿਆਂ ਦੌਰਾਨ 25 ਤੋਂ 30 ਹਿੰਦੂ ਕੁੜੀਆਂ ਅਗਵਾ ਹੋ ਚੁੱਕੀਆਂ ਹਨ, ਜੋ ਅਜੇ ਤੱਕ ਆਪਣੇ ਘਰੀਂ ਨਹੀਂ ਪਰਤੀਆਂ।
ਕੋਹਿਸਤਾਨੀ ਨੇ ਪੁੱਛਿਆ ਕਿ ਇਹ ਜ਼ੁਲਮ ਕਦੋਂ ਤੱਕ ਜਾਰੀ ਰਹੇਗਾ ਅਤੇ ਹਿੰਦੂ ਲੋਕ ਕਦੋਂ ਤੱਕ ਲਾਸ਼ਾਂ ਚੁੱਕਦੇ ਰਹਿਣਗੇ? ਕਦੋਂ ਤੱਕ ਮੰਦਰਾਂ ਨੂੰ ਸਾੜਿਆ ਜਾਂਦਾ ਰਹੇਗਾ? ਉਨ੍ਹਾਂ ਪੁੱਛਿਆ ਕਿ ਏਦਾਂ ਦੀਆਂ ਘਟਨਾਵਾਂ ਸਿਰਫ ਸਿੰਧ ਸੂਬੇ ਦੇ ਘੋਟਕੀ ਤੇ ਉਮਰਕੋਟ ਵਿਖੇ ਕਿਉਂ ਵਾਪਰਦੀਆਂ ਹਨ? ਇਹ ਅੱਗ ਨਾ ਰੋਕੀ ਤਾਂ ਪੂਰੇ ਸਿੰਧ ਵਿੱਚ ਫੈਲ ਜਾਏਗੀ। ਇਨ੍ਹਾਂ ਘਟਨਾਵਾਂ ਲਈ ਸਿੰਧ ਵਿੱਚ ਕੁਝ ਲੋਕ ਜਿ਼ਮੇਵਾਰ ਹਨ, ਜਿਨ੍ਹਾਂ ਨੂੰ ਗ੍ਰਿਫਤਾਰ ਕੀਤਾ ਜਾਣਾ ਚਾਹੀਦਾ ਹੈ। ਸਰਕਾਰ ਦੀ ਇਹ ਜ਼ਿੰਮੇਵਾਰੀ ਹੈ ਕਿ ਉਹ ਅਜਿਹੇ ਲੋਕਾਂ ਦਾ ਸ਼ਿਕੰਜਾ ਕੱਸੇ।
ਵਰਨਣ ਯੋਗ ਹੈ ਕਿ ਖੇਲ ਦਾਸ ਕੋਹਿਸਤਾਨੀ ਦਾ ਇਹ ਬਿਆਨ ਉਦੋਂ ਆਇਆ ਹੈ, ਜਦੋਂ ਸਿੰਧ ਸੂਬੇ ਦੇ ਲੜਕਾਣਾ ਵਿਖੇ ਇੱਕ ਹਿੰਦੂ ਵਿਦਿਆਰਥਣ ਦੀ ਸ਼ੱਕੀ ਹਾਲਾਤ ਵਿੱਚ ਮੌਤ ਹੋ ਗਈ ਸੀ। ਜਿੱਥੇ ਕਾਲਜ ਦੇ ਪ੍ਰਬੰਧਕ ਇਸ ਨੂੰ ਖੁਦਕੁਸ਼ੀ ਕਹਿ ਰਹੇ ਹਨ, ਉਥੇ ਵਿਦਿਆਰਥਣ ਦੇ ਪਰਵਾਰਕ ਮੈਂਬਰ ਕਤਲ ਦਾ ਦੋਸ਼ ਲਾ ਰਹੇ ਹਨ।