ਓਟਵਾ, ਓਨਟਾਰੀਓ, 18 ਸਤੰਬਰ (ਪੋਸਟ ਬਿਊਰੋ) : ਅਮਰੀਕਾ ਵਿੱਚ ਹੜਤਾਲ ਹੋਣ ਤੋਂ ਬਾਅਦ ਓਸ਼ਵਾ, ਓਨਟਾਰੀਓ ਸਥਿਤ ਜਨਰਲ ਮੋਟਰਜ਼ ਦੇ ਅਸੈਂਬਲੀ ਪਲਾਂਟ ਉੱਤੇ ਕੰਮ ਕਰਦੇ 1200 ਕਰਮਚਾਰੀਆਂ ਨੂੰ ਆਰਜ਼ੀ ਤੌਰ ਉੱਤੇ ਨੌਕਰੀ ਤੋਂ ਕੱਢ ਦਿੱਤਾ ਗਿਆ ਹੈ। ਅਜੇ ਕੰਪਨੀ ਵੱਲੋਂ ਹੋਰ ਛਾਂਟੀ ਕੀਤੇ ਜਾਣ ਦੀ ਸੰਭਾਵਨਾ ਹੈ।
ਓਸ਼ਵਾ ਟਰੱਕ ਲਾਈਨ ਉੱਤੇ ਕੰਮ ਕਰਦੇ ਕਈ ਕਾਮਿਆਂ ਨੂੰ ਅਜੇ ਵੀ ਪੂਰੀਆਂ ਤਨਖਾਹਾਂ ਮਿਲ ਰਹੀਆਂ ਹਨ ਜਦਕਿ ਅਮਰੀਕਾ ਵਿੱਚ ਜੀਐਮ ਦੇ 48000 ਕਾਮਿਆਂ ਦੀ ਹੜਤਾਲ ਜਾਰੀ ਹੈ। ਯੂਨੀਫੌਰ ਦੇ ਪ੍ਰੈਜ਼ੀਡੈਂਟ ਜੈਰੀ ਡਾਇਸ ਨੇ ਆਖਿਆ ਕਿ ਉਸ ਨੂੰ ਉਮੀਦ ਹੈ ਕਿ ਅਮਰੀਕਾ ਤੋਂ ਗੱਡੀਆਂ ਦੇ ਕਈ ਹਿੱਸੇ ਨਾ ਪਹੁੰਚਣ ਕਾਰਨ ਓਸ਼ਵਾ ਪਲਾਂਟ ਦੀ ਸੈਕਿੰਡ ਲਾਈਨ ਦਾ ਕੰਮ ਵੀ ਵੀਰਵਾਰ ਤੱਕ ਠੱਪ ਹੋ ਸਕਦਾ ਹੈ। ਇਸ ਕਾਰਨ 2600 ਕਾਮਿਆਂ ਦੇ ਰੋਜ਼ਗਾਰ ਉੱਤੇ ਤਲਵਾਰ ਲਟਕ ਰਹੀ ਹੈ।
ਉਨ੍ਹਾਂ ਆਖਿਆ ਕਿ ਹੜਤਾਲ ਕਾਰਨ ਅਗਲੇ ਹਫਤੇ ਦੇ ਸ਼ੁਰੂ ਤੱਕ ਇੰਗਰਸੋਲ, ਓਨਟਾਰੀਓ ਵਿੱਚ ਜੀਐਮ ਦੇ ਕੈਮੀ ਪਲਾਂਟ ਦਾ ਦੋ ਤਿਹਾਈ ਹਿੱਸਾ ਵੀ ਬੰਦ ਹੋਣ ਦੀ ਸੰਭਾਵਨਾ ਹੈ ਜਦਕਿ ਇਸ ਦੇ ਸੇਂਟ ਕੈਥਰੀਨਜ਼, ਓਨਟਾਰੀਓ ਉੱਤੇ ਕੰਮਕਾਜ ਅਗਲੇ ਹਫਤੇ ਦੇ ਮੱਧ ਤੱਕ ਬੰਦ ਹੋ ਸਕਦਾ ਹੈ। ਡਾਇਸ ਨੇ ਆਖਿਆ ਕਿ ਕਈ ਹੋਰਨਾਂ ਥਾਂਵਾਂ ਉੱਤੇ ਵੀ ਆਰਜ਼ੀ ਤੌਰ ਉੱਤੇ ਕਾਮਿਆਂ ਦੀ ਛੁੱਟੀ ਕੀਤੀ ਜਾ ਰਹੀ ਹੈ। ਇਨ੍ਹਾਂ ਵਿੱਚ ਵਿੰਡਸਰ ਦੀ ਟਰੱਕਿੰਗ ਕੰਪਨੀ ਵੀ ਸ਼ਾਮਲ ਹੈ ਪਰ ਅਸਲ ਨੁਕਸਾਨ ਤਾਂ ਜੀਐਮ ਦੇ ਪਲਾਂਟਜ਼ ਨੂੰ ਹੀ ਹੋ ਰਿਹਾ ਹੈ।
ਜਿ਼ਕਰਯੋਗ ਹੈ ਕਿ ਅਮਰੀਕਾ ਵਿੱਚ ਜੀਐਮ ਦੇ ਵਰਕਰਜ਼ ਸੋਮਵਾਰ ਨੂੰ ਦਹਾਕੇ ਤੋਂ ਵੀ ਵੱਧ ਸਮੇਂ ਵਿੱਚ ਪਹਿਲੀ ਵਾਰੀ ਭੱਤਿਆਂ, ਹੈਲਥ ਕੇਅਰ ਤੇ ਜੌਬ ਸਕਿਊਰਿਟੀ ਵਰਗੇ ਮੁੱਦਿਆਂ ਨੂੰ ਲੈ ਕੇ ਹੜਤਾਲ ਉੱਤੇ ਚਲੇ ਗਏ ਸਨ।