ਭੋਪਾਲ, 18 ਸਤੰਬਰ (ਪੋਸਟ ਬਿਊਰੋ)- ਮੱਧ ਪ੍ਰਦੇਸ਼ ਦੇ ਸਾਬਕਾ ਮੁੱਖ ਮੰਤਰੀ ਦਿਗਵਿਜੇ ਸਿੰਘ ਨੇ ਇੱਕ ਵਾਰ ਫਿਰ ਭਗਵਾ ਚੋਲਿਆਂ ਬਾਰੇ ਵਿਵਾਦ ਪੂਰਨ ਬਿਆਨ ਦੇ ਕੇ ਵਿਵਾਦ ਖੜਾ ਕਰ ਦਿੱਤਾ ਹੈ।
ਕੱਲ੍ਹ ਭੋਪਾਲ ਵਿੱਚ ਇੱਕ ਸੰਤ ਸਮਾਗਮ ਵਿੱਚ ਦਿਗਵਿਜੇ ਸਿੰਘ ਨੇ ਕਿਹਾ ਕਿ ਭਗਵੇਂ ਕੱਪੜੇ ਪਾ ਕੇੇ ਮੰਦਰਾਂ ਵਿੱਚ ਬਲਾਤਕਾਰ ਹੋ ਰਹੇ ਹਨ। ਭਗਵੇਂ ਕੱਪੜੇ ਪਾ ਕੇ ਲੋਕ ਚੂਰਨ ਵੇਚ ਰਹੇ ਹਨ। ਜਿਨ੍ਹਾਂ ਲੋਕਾਂ ਨੇ ਸਨਾਤਨ ਧਰਮ ਨੂੰ ਬਦਨਾਮ ਕੀਤਾ ਹੈ, ਉਨ੍ਹਾਂ ਨੂੰ ਭਗਵਾਨ ਕਦੇ ਮੁਆਫ ਨਹੀਂ ਕਰੇਗਾ। ਉਨ੍ਹਾਂ ਨੇ ਜੈ ਸ੍ਰੀ ਰਾਮ ਬੋਲਣ ਉਤੇ ਵੀ ਇਤਰਾਜ਼ ਜਤਾਇਆ। ਦਿਗਵਿਜੇ ਸਿੰਘ ਨੇ ਕਿਹਾ ਕਿ ਇਸ ਨੂੰ ‘ਜੈ ਸੀਆਰਾਮ’ ਹੋਣਾ ਚਾਹੀਦਾ ਹੈ, ਰਾਜਨੀਤਕ ਲੋਕਾਂ ਨੇ ਜੈ ਸ੍ਰੀ ਰਾਮ ਨੂੰ ਸੰਬੋਧਨ ਬਣਾ ਲਿਆ ਹੈ। ਉਨ੍ਹਾਂ ਕਿਹਾ ਕਿ ਧਰਮ ਦੀ ਵਰਤੋਂ ਰਾਜਨੀਤੀ ਵਿੱਚ ਨਹੀਂ ਹੋਣੀ ਚਾਹੀਦੀ। ਧਰਮ ਸਭ ਦਾ ਹੈ। ਰਾਜਨੀਤੀ ਵਿੱਚ ਵੰਡ ਦੇਣਗੇ ਤਾਂ ਇਹ ਧਰਮ ਦੇ ਨਾਲ ਅਨਿਆਂ ਹੈ।
ਦਿਗਵਿਜੇ ਸਿੰਘ ਨੇ ਕਿਹਾ ਕਿ ਸਨਾਤਨ ਧਰਮ ਸੰਸਾਰ ਵਿੱਚ ਸਭ ਤੋਂ ਪੁਰਾਣਾ ਹੈ। ਇਨਸਾਨ ਪਰਵਾਰ ਛੱਡ ਕੇ ਸਾਧੂ ਬਣਦਾ ਹੈ, ਪਰ ਅੱਜ ਭਗਵੇਂ ਕੱਪੜੇ ਪਹਿਨ ਕੇ ਲੋਕ ਚੂਰਨ ਵੇਚ ਰਹੇ ਹਨ। ਮੰਦਰਾਂ ਵਿੱਚ ਬਲਾਤਕਾਰ ਹੋ ਰਹੇ ਹਨ। ਕੀ ਇਹੀ ਧਰਮ ਹੈ। ਸਾਬਕਾ ਮੁੱਖ ਮੰਤਰੀ ਨੇ ਕਿਹਾ ਕਿ ਅੱਜ ਇਸ ਦੇਸ਼ ਵਿੱਚ ਇਹ ਯਤਨ ਹੋ ਰਹੇ ਹਨ ਕਿ ਕਿਵੇਂ ਮੱਠ-ਮੰਦਰਾਂ 'ਤੇ ਕਬਜ਼ਾ ਕੀਤਾ ਜਾਏ। ਉਨ੍ਹਾਂ ਨੂੰ ਰਾਜਨੀਤੀ ਦਾ ਅੱਡਾ ਬਣਾਇਆ ਜਾਏ। ਉਨ੍ਹਾਂ ਨੇ ਸਨਾਤਨ ਧਰਮ ਦੇ ਸੰਤਾ ਨੂੰ ਅਪੀਲ ਕੀਤੀ ਕਿ ਉਹ ਆਪਣੇ ਆਪ ਦਾ ਰਾਜਨੀਤਕ ਉਪਯੋਗ ਨਾ ਹੋਣ ਦੇਣ। ਭਾਜਪਾ 'ਤੇ ਨਿਸ਼ਾਨਾ ਵਿੰਨ੍ਹਦੇ ਹੋਏ ਕਿਹਾ ਕਿ ਜਿਨ੍ਹਾਂ ਲੋਕਾਂ ਨੇ ਧਰਮ ਦੇ ਨਾਂਅ 'ਤੇ ਸੱਤਾ ਹਥਿਆਈ, ਉਨ੍ਹਾਂ ਨੇ ਹੀ ਵੇਦ ਪਾਠਸ਼ਾਲਾਵਾਂ ਦਾ ਫੰਡ ਰੋਕ ਦਿੱਤਾ ਹੈ।
ਇਸ ਸਮਾਗਮ ਵਿੱਚ ਮੱਠ-ਮੰਦਰ ਸਲਾਹਕਾਰ ਕਮੇਟੀ ਦੇ ਪ੍ਰਧਾਨ ਸਵਾਮੀ ਸੁਬੁੱਧਾਨੰਦ ਨੇ ਭਾਜਪਾ 'ਤੇ ਨਿਸ਼ਾਨਾ ਸਾਧਿਆ। ਉਨ੍ਹਾਂ ਨੇ ਕਿਹਾ ਕਿ ਭਾਜਪਾ ਬੰਬ ਸੁੱਟਣ ਵਾਲਿਆਂ ਨੂੰ ਸੰਸਦ ਮੈਂਬਰ ਬਣਾਉਂਦੀ ਹੈ। ਜੋਸ਼ ਨਾਲ ਕਹਿੰਦੇ ਹਨ ਕਿ ਰਾਮ ਮੰਦਰ ਬਣਾਵਾਂਗੇ। ਅਜਿਹੇ ਲੋਕਾਂ ਤੋਂ ਸਾਵਧਾਨ ਰਹਿਣਾ ਚਾਹੀਦਾ ਹੈ।