ਰਾਮਨਾਥਪੁਰਮ, 18 ਸਤੰਬਰ (ਪੋਸਟ ਬਿਊਰੋ)- ਖਿਡਾਰੀਆਂ ਲਈ ਫੈਨਸ ਦੀ ਦੀਵਾਨਗੀ ਦੇ ਕਈ ਕਿੱਸੇ ਸਾਹਮਣੇ ਆਏ ਹੋਣਗੇ, ਪਰ ਇੱਕ ਆਦਮੀ ਦੀ ਦੀਵਾਨਗੀ ਦੀ ਖਬਰ ਹੈਰਾਨੀ ਵਾਲੀ ਹੈ।
ਤਾਮਿਲ ਨਾਡੂ ਦੇ ਸੱਤਰ ਸਾਲ ਦੇ ਇੱਕ ਬਜ਼ੁਰਗ ਨੇ ਬੈਡਮਿੰਟਨ ਦੀ ਸੋਨ ਤਮਗਾ ਜੇਤੂ ਪੀ ਵੀ ਸਿੰਧੂ ਨਾਲ ਵਿਆਹ ਕਰਨ ਦੀ ਇੱਛਾ ਜ਼ਾਹਰ ਕੀਤੀ ਹੈ। ਉਹ ਵਿਆਹ ਕਰਾਉਣ ਦਾ ਇੱਕ ਅਰਜ਼ੀ ਲੈ ਕੇ ਕੁਲੈਕਟ੍ਰੇਟ ਦਫਤਰ ਪਹੁੰਚ ਗਿਆ। ਮਲਾਯਸਾਮੀ ਨਾਂਅ ਦੇ ਬਜ਼ੁਰਗ ਨੇ ਕਿਹਾ ਹੈ ਕਿ ਜੇ ਵਿਆਹ ਲਈ ਜ਼ਰੂਰੀ ਇੰਤਜ਼ਾਮ ਨਾ ਕੀਤੇ ਤਾਂ ਉਹ ਸਿੰਧੂ ਨੂੰ ਅਗਵਾ ਕਰ ਲਵੇਗਾ। ਮਿਲੀ ਖਬਰ ਮੁਤਾਬਕ ਜਨਤਕ ਸੁਣਵਾਈ ਦੌਰਾਨ ਕੁਲੈਕਟ੍ਰੇਟ ਦਫਤਰ ਗਏ ਮਲਾਯਸਾਮੀ ਨੇ ਬੈਡਮਿੰਟਨ ਦੀ ਸੋਨ ਤਮਗਾ ਜੇਤੂ ਪੀ ਵੀ ਸਿੰਧੂ ਅਤੇ ਆਪਣੀ ਤਸਵੀਰ ਨਾਲ ਇੱਕ ਪੱਤਰ ਦਿੰਦੇ ਹੋਏ ਕੁਲੈਕਟਰ ਕੋਲ ਸਿੰਧੂ ਨਾਲ ਵਿਆਹ ਕਰਨ ਦੀ ਇੱਛਾ ਜ਼ਾਹਰ ਕੀਤੀ। ਇਸ ਦੌਰਾਨ ਉਸ ਨੇ ਦਾਅਵਾ ਕੀਤਾ ਕਿ ਉਹ ਸੱਤਰ ਸਾਲ ਦਾ ਨਹੀਂ, ਮਸਾਂ 16 ਸਾਲ ਦਾ ਲੜਕਾ ਹੈ ਤੇ ਚਾਰ ਅਪ੍ਰੈਲ 2004 ਨੂੰ ਪੈਦਾ ਹੋਇਆ ਸੀ। ਕੁਲੈਕਟਰ ਦਫਤਰ ਨੇ ਉਸ ਦੀ ਅਰਜ਼ੀ ਰੱਦ ਕਰ ਦਿੱਤੀ ਅਤੇ ਕਿਹਾ ਕਿ ਇਸ ਮਾਮਲੇ ਦੀ ਜਾਂਚ ਕੀਤੀ ਜਾਏਗੀ ਕਿ ਵਿਅਕਤੀ ਦਾ ਮਾਨਸਿਕ ਸਥਿਤੀ ਸਹੀ ਹੈ ਜਾਂ ਨਹੀਂ।