ਅਭਿਸ਼ੇਕ ਬੱਚਨ ਨੇ ਜੇ ਪੀ ਦੱਤਾ ਦੀ ਫਿਲਮ ‘ਰਿਫਿਊਜੀ’ ਨਾਲ ਆਪਣੇ ਕਰੀਅਰ ਦੀ ਸ਼ੁਰੂਆਤ ਕੀਤੀ ਸੀ। ਉਸ ਤੋਂ ਬਾਅਦ ਆਈਆਂ ਉਸ ਦੀਆਂ ਕਈ ਫਿਲਮਾਂ ਬਾਕਸ ਆਫਿਸ 'ਤੇ ਕਮਾਲ ਨਹੀਂ ਦਿਖਾ ਸਕੀਆਂ, ਪਰ ‘ਯੁਵਾ’, ‘ਐੱਲ ਓ ਸੀ : ਕਾਰਗਿਲ’ ਅਤੇ ‘ਰਣ’ ਵਰਗੀਆਂ ਫਿਲਮਾਂ 'ਚ ਅਭਿਨੈ ਨਾਲ ਉਸ ਨੇ ਸਿੱਧ ਕਰ ਦਿੱਤਾ ਕਿ ਉਹ ਇੱਕ ਟੈਲੇਂਟਿਡ ਅਭਿਨੇਤਾ ਹੈ। ਪਿੱਛੇ ਜਿਹੇ ਉਹ ਅਨੁਰਾਗ ਕਸ਼ਯਪ ਦੀ ਫਿਲਮ ‘ਮਨਮਰਜ਼ੀਆਂ’ ਵਿੱਚ ਨਜ਼ਰ ਆਇਆ ਸੀ। ਪੇਸ਼ ਹਨ ਉਸ ਨਾਲ ਹੋਈ ਇੱਕ ਗੱਲਬਾਤ ਦੇ ਕੁਝ ਅੰਸ਼ :
* ਤੁਹਾਡੀਆਂ ਬਹੁਤ ਸਾਰੀਆਂ ਫਿਲਮਾਂ ਨਹੀਂ ਚੱਲੀਆਂ। ਕੀ ਕਾਰਨ ਰਿਹਾ?
- ਅਸਫਲਤਾ ਦੇ ਕਾਰਨਾਂ ਬਾਰੇ ਜੇ ਫਿਲਮ ਨਗਰੀ ਵਿੱਚ ਕਿਸੇ ਕੋਲ ਜਵਾਬ ਹੁੰਦਾ ਤਾਂ ਉਹ ਸਿਰਫ ਹਿੱਟ ਫਿਲਮਾਂ ਹੀ ਬਣਾਉਂਦੇ। ਮੇਰੇ ਖਿਆਲ ਵਿੱਚ ਸਾਨੂੰ ਹਮੇਸ਼ਾ ਚੰਗਾ ਕੰਮ ਕਰਨ ਦੀ ਕੋਸ਼ਿਸ਼ ਕਰਦੇ ਰਹਿਣਾ ਚਾਹੀਦਾ ਹੈ। ਅਸੀਂ ਇਹ ਸੋਚ ਕੇ ਕੰਮ ਕਰਦੇ ਹਾਂ ਕਿ ਉਹ ਸਹੀ ਹੈ। ਸਾਨੂੰ ਇਹ ਨਹੀਂ ਪਤਾ ਹੁੰਦਾ ਕਿ ਲੋਕ ਸਾਡੇ ਉਸ ਕੰਮ ਬਾਰੇ ਕੀ ਸੋਚਦੇ ਹਨ।
* ਤੁਸੀਂ ਆਪਣੇ ਅੱਜ ਤੱਕ ਦੇ ਸਫਰ ਤੋਂ ਕੀ ਸਿਖਿਆ ਹੈ?
- ਸਾਨੂੰ ਜ਼ਿੰਦਗੀ 'ਚ ਇਹ ਗੱਲ ਸਮਝ ਲੈਣੀ ਚਾਹੀਦੀ ਹੈ ਕਿ ਜੋ ਚੀਜ਼ ਉਪਰ ਜਾਂਦੀ ਹੈ, ਉਸ ਨੇ ਹੇਠਾਂ ਵੀ ਆਉਣਾ ਹੁੰਦਾ ਹੈ। ਅਸੀਂ ਜੋ ਕਰ ਸਕਦੇ ਹਾਂ, ਉਹ ਇਹ ਹੈ ਕਿ ਕੋਸ਼ਿਸ਼ ਕਰਦੇ ਰਹੋ ਤੇ ਆਪਣੀਆਂ ਗਲਤੀਆਂ ਨੂੰ ਸਮਝੋ। ਨਾਲ ਇਹ ਵੀ ਜਾਣੋ ਕਿ ਉਨ੍ਹਾਂ ਨੂੰ ਸੁਧਾਰਿਆ ਕਿਵੇਂ ਜਾ ਸਕਦਾ ਹੈ, ਬਿਹਤਰ ਕਿਵੇਂ ਕੀਤਾ ਜਾ ਸਕਦਾ ਹੈ। ਸਾਨੂੰ ਸਫਲਤਾ ਦਾ ਕੋਈ ਸਿੱਧਾ ਪ੍ਰੋਸੈਸ ਨਹੀਂ ਪਤਾ ਹੈ।
* ਕੀ ਤੁਹਾਨੂੰ ਕਦੇ ਏਦਾਂ ਲੱਗਾ ਕਿ ਅਮਿਤਾਭ ਜੀ ਨਾਲ ਤੁਹਾਡੀ ਤੁਲਨਾ ਵੱਧ ਕੀਤੀ ਗਈ ਅਤੇ ਇਸੇ ਕਾਰਨ ਤੁਹਾਡੀਆਂ ਫਿਲਮਾਂ ਅਸਫਲ ਰਹੀਆਂ।
- ਜੀ ਨਹੀਂ, ਮੈਨੂੰ ਕਦੇ ਨਹੀਂ ਲੱਗਾ ਕਿ ਪਿਤਾ ਜੀ ਨਾਲ ਆਪਣੀ ਤੁਲਨਾ ਕਾਰਨ ਮੈਂ ਅਸਫਲ ਰਿਹਾ। ਉਂਝ ਵੀ ਜੇ ਉਨ੍ਹਾਂ ਨਾਲ ਮੇਰੀ ਤੁਲਨਾ ਕੀਤੀ ਗਈ ਹੈ ਤਾਂ ਮੇਰੇ ਅੰਦਰ ਜ਼ਰੂਰ ਕੁਝ ਨਾ ਕੁਝ ਹੋਵੇਗਾ।
* ਫਿਲਮ ਫਲਾਪ ਹੋਣ ਤੋਂ ਬਾਅਦ ਇੱਕ-ਦੂਸਰੇ 'ਤੇ ਚਿੱਕੜ ਸੁੱਟਣ ਦੀ ਰਵਾਇਤ ਰਹੀ ਹੈ। ਇਸ ਬਾਰੇ ਕੀ ਕਹੋਗੇ?
- ਜੇ ਕਿਸੇ ਫਿਲਮ 'ਚ ਮੇਰਾ ਕੰਮ ਚੰਗਾ ਹੋਣ 'ਤੇ ਵੀ ਉਹ ਫਿਲਮ ਹਿੱਟ ਨਹੀਂ ਹੋਈ, ਉਹ ਵੀ ਮੇਰੀ ਗਲਤੀ ਹੈ। ਜੇ ਮੇਰਾ ਕੰਮ ਬਹੁਤ ਚੰਗਾ ਹੋਇਆ ਤਾਂ ਫਿਲਮ ਚੰਗੀ ਜਾਏਗੀ। ਜਿਨ੍ਹਾਂ ਫਿਲਮਾਂ ਦਾ ਬਿਜ਼ਨਸ ਬਿਹਤਰ ਰਿਹਾ, ਉਨ੍ਹਾਂ ਦੀ ਸਫਲਤਾ ਦਾ ਕਰੈਡਿਟ ਮੈਂ ਲਿਆ। ਜੋ ਫਿਲਮਾਂ ਅਸਫਲ ਰਹੀਆਂ, ਉਨ੍ਹਾਂ ਦੀ ਜ਼ਿੰਮੇਵਾਰੀ ਵੀ ਮੈਂ ਲਈ। ਫਿਲਮ ਇੱਕ ਟੀਮ ਵਰਕ ਹੈ। ਜੇ ਤੁਹਾਡੀ ਫਿਲਮ ਚੰਗੀ ਚੱਲਦੀ ਹੈ ਤਾਂ ਚੰਗੀ ਗੱਲ ਹੈ। ਜੇ ਚੰਗੀ ਨਹੀਂ ਚੱਲਦੀ ਤਾਂ ਗਲਤੀਆਂ ਤੋਂ ਸਿੱਖੋ, ਉਨ੍ਹਾਂ ਨੂੰ ਸਮਝੋ ਅਤੇ ਅੱਗੇ ਵਧੋ।
* ਕਿਹੋ ਜਿਹੀਆਂ ਫਿਲਮਾਂ ਕਰਨਾ ਪਸੰਦ ਹੈ?
- ਜੇ ਮੈਂ ਕਿਸੇ ਖਾਸ ਫਿਲਮ 'ਚ ਜ਼ਿਆਦਾ ਸਹਿਜ ਮਹਿਸੂਸ ਕਰਾਂਗਾ ਤਾਂ ਫਿਲਮ ਵਿੱਚ ਕੰਮ ਹੀ ਨਹੀਂ ਕਰਾਂਗਾ। ਜੇ ਤੁਸੀਂ ਆਰਾਮ ਦਾਇਕ ਮਾਹੌਲ 'ਚ ਕੰਮ ਕਰਦੇ ਹੋ ਤਾਂ ਇਹ ਤੁਹਾਡੇ ਲਈ ਠੀਕ ਨਹੀਂ ਹੁੰਦਾ। ਮੈਂ ਹੁਣ ਆਪਣੀ ਸਹੂਲਤ ਮੁਤਾਬਕ ਕੰਮ ਨਹੀਂ ਕਰਨਾ ਚਾਹੁੰਦਾ। ਮੈਂ ਹੁਣ ਅਜਿਹਾ ਕੰਮ ਕਰਨਾ ਹੈ, ਜੋ ਮੇਰੇ ਲਈ ਇੱਕ ਚੁਣੌਤੀ ਹੋਵੇ।