ਰੈਕਸਡੇਲ, 12 ਸਤੰਬਰ (ਪੋਸਟ ਬਿਊਰੋ)- ਸਿੱਖ ਸਪਿਰਚੂਅਲ ਸੈਂਟਰ ਦੇ ਪ੍ਰਬੰਧਕਾਂ ਕੋਲੋਂ ਪਤਾ ਲੱਗਿਆ ਹੈ ਕਿ ਜੰਮੂ ਵਾਲੇ ਰਾਗੀ ਜਥੇ ਦੇ ਮੁਖੀ ਭਾਈ ਜਨਕ ਸਿੰਘ ਬੀਤੇ ਕੁੱਝ ਦਿਨਾਂ ਤੋਂ ਲਾਪਤਾ ਹਨ। ਉਨ੍ਹਾਂ ਨੇ ਆਉਣ ਵਾਲੀ 16 ਤਰੀਕ ਨੂੰ ਵਾਪਸ ਪੰਜਾਬ ਪਰਤਣਾ ਸੀ। ਪਰ ਇਸ ਸਮੇਂ ਗੁਰੂ ਘਰ ਵਲੋਂ ਉਨ੍ਹਾਂ ਨੂੰ ਸੌਂਪੀਆਂ ਗਈਆਂ ਜ਼ਿੰਮੇਵਾਰੀਆਂ ਨੂੰ ਵਿਚੇ ਛੱਡ ਕੇ ਕਿਧਰੇ ਫਰਾਰ ਹੋ ਗਏ ਹਨ। ਇਸੇ ਤਰ੍ਹਾਂ ਹੀ ਬੀਤੇ ਹਫ਼ਤੇ ਇਕ ਜਥੇ ਤੇ ਤਬਲਾਵਾਦਕ ਜਸਵਿੰਦਰ ਸਿੰਘ ਇਸੇ ਗੁਰੂ ਘਰ ਤੋਂ ਫਰਾਰ ਹੋ ਗਏ ਸਨ। ਪ੍ਰਬੰਧਕਾਂ ਨੇ ਦੱਸਿਆ ਕਿ ਇਨ੍ਹਾਂ ਦੋਵਾਂ ਰਾਗੀਆਂ ਦੀ ਸੂਚਨਾ ਪੁਲਸ ਨੂੰ ਦੇ ਰਹੇ ਹਾਂ। ਇਸ ਦੇ ਨਾਲ ਹੀ ਇਹ ਵੀ ਦੱਸਿਆ ਕਿ ਉਹ ਇਮੀਗ੍ਰੇਸ਼ਨ ਵਿਭਾਗ ਕੋਲ ਵੀ ਪਹੁੰਚ ਕਰਕੇ ਉਨ੍ਹਾਂ ਤੱਕ ਪੂਰੀ ਜਾਣਕਾਰੀ ਸਾਂਝੀ ਕਰਨਗੇ ਤਾਂ ਜੋ ਇਹ ਲੋਕ ਕਿਸੇ ਢੰਗ ਨਾਲ ਰਿਫਿਊਜੀ ਕਲੇਮ ਕਰਨ ’ਚ ਕਮਾਯਾਬ ਨਾ ਹੋ ਸਕਣ। ਅਸੀਂ ਕੁੱਝ ਦਿਨ ਪਹਿਲਾਂ ਵੀ ਇਸ ਗੱਲ ਦਾ ਜ਼ਿਕਰ ਕੀਤਾ ਸੀ ਕਿ ਲਗਾਤਾਰ ਆਏ ਹਫ਼ਤੇ ਕੋਈ ਨਾ ਕੋਈ ਰਾਗੀ ਜਥੇ ਦਾ ਮੈਂਬਰ ਲਾਪਤਾ ਹੋ ਜਾਂਦਾ ਹੈ। ਕੁੱਝ ਇਕ ਗੁਰੂ ਘਰ ਵਲੋਂ ਅਜਿਹੇ ਰਾਗੀ ਜਥੇ ਨੂੰ ਬੁਲਾਉਣ ਲਈ ਤੇ ਫੇਰ ਉਨ੍ਹਾਂ ਨੂੰ ਭਜਾਉਣ ਲਈ ਮੋਟੇ ਪੈਸੇ ਵਟੋਰਨ ਦੀਆਂ ਖ਼ਬਰਾਂ ਵੀ ਮਿਲਦੀਆ ਰਹੀਆਂ ਹਨ।