ਵਾਸ਼ਿੰਗਟਨ, 16 ਅਕਤੂਬਰ (ਪੋਸਟ ਬਿਊਰੋ)- ਅਮਰੀਕਾ ਦੇ ਸਿਆਟਲ ਸ਼ਹਿਰ `ਚ ਮਾਈਕਰੋਸਾਫਟ ਦੇ ਕੋ-ਫਾਊਂਡਰ ਪਾਲ ਐਲਨ ਦਾ 65 ਸਾਲ ਦੀ ਉਮਰ `ਚ ਦੇਹਾਂਤ ਹੋ ਗਿਆ। ਉਨ੍ਹਾਂ ਨੂੰ ਕੈਂਸਰ ਸੀ। ਸਾਲ 1975 `ਚ ਉਨ੍ਹਾਂ ਨੇ ਬਿਲ ਗੇਟਸ ਨਾਲ ਮਿਲ ਕੇ ਮਾਈਕਰੋਸਾਫਟ ਦੀ ਨੀਂਹ ਰੱਖੀ ਸੀ।
ਐਲਨ ਦੀ ਭੈਣ ਜੂਡੀ ਨੇ ਕਿਹਾ, “ਮੇਰਾ ਭਰਾ ਹਰ ਪੱਧਰ `ਤੇ ਇਕ ਖ਼ਾਸ ਸ਼ਖਸ ਸੀ। ਜ਼ਿਆਦਾਤਰ ਲੋਕ ਉਨ੍ਹਾਂ ਨੂੰ ਟੈਕਨਾਲੋਜਿਸਟ ਤੇ ਪਰਉਪਕਾਰੀ ਦੇ ਰੂਪ `ਚ ਜਾਣਦੇ ਹਨ, ਪਰ ਸਾਡੇ ਲਈ ਉਹ ਇਕ ਬਿਹਤਰੀਨ ਭਰਾ, ਚਾਚਾ ਤੇ ਚੰਗੇ ਦੋਸਤ ਸਨ।” ਦੋ ਹਫ਼ਤੇ ਪਹਿਲਾਂ ਹੀ ਐਲਨ ਨੇ ਨਾਨ ਹੋਜਕਿਨ ਲਿਮਫੋਮਾ (ਇਕ ਤਰ੍ਹਾਂ ਦਾ ਕੈਂਸਰ) ਹੋਣ ਦੀ ਗੱਲ ਜਨਤਕ ਕੀਤੀ ਸੀ। ਨੌਂ ਸਾਲ ਪਹਿਲਾਂ ਵੀ ਉਨ੍ਹਾਂ ਨੇ ਇਸ ਦਾ ਇਲਾਜ ਕਰਾਇਆ ਸੀ, ਪਰ ਇਹ ਬਿਮਾਰੀ ਮੁੜ ਪਰਤ ਆਈ ਸੀ।
ਫੋਰਬਸ ਮੈਗਜ਼ੀਨ ਮੁਤਾਬਕ ਸਾਲ 1953 `ਚ ਸਿਆਟਲ `ਚ ਜਨਮੇ ਐਲਨ ਦੁਨੀਆ ਦੇ 44ਵੇਂ ਸਭ ਤੋਂ ਅਮੀਰ ਵਿਅਕਤੀ ਸਨ। ਇਨ੍ਹਾਂ ਦੀ ਕੁਲ ਜਾਇਦਾਦ 2170 ਕਰੋੜ ਡਾਲਰ ਦੀ ਹੈ। ਐਲਨ ਦੀ ਮੌਤ ਉੱਤੇ ਦੁਖ ਪ੍ਰਗਟਾਉਂਦੇ ਹੋਏ ਮਾਈਕਰੋਸਾਫਟ ਦੇ ਸੀ ਈ ਓ ਸਤਿਆ ਨਡੇਲਾ ਨੇ ਕਿਹਾ ਕਿ ਸਾਡੀ ਕੰਪਨੀ `ਚ ਅਤੇ ਦੇਸ਼ ਦੇ ਸਨਅਤੀ ਵਿਕਾਸ `ਚ ਉਨ੍ਹਾਂ ਦਾ ਅਹਿਮ ਯੋਗਦਾਨ ਹੈ। ਕੋ-ਫਾਊਂਡਰ ਦੇ ਰੂਪ `ਚ ਉਨ੍ਹਾਂ ਨੇ ਕਈ ਜਾਦੂਈ ਉਤਪਾਦਾਂ ਤੇ ਸੰਸਥਾਨਾਂ ਦਾ ਨਿਰਮਾਣ ਕੀਤਾ। ਉਨ੍ਹਾਂ ਨੇ ਇਸ ਤਰ੍ਹਾਂ ਦਾ ਕੰਮ ਕੀਤਾ ਜਿਸ ਨੇ ਨਾ ਸਿਰਫ਼ ਕੰਪਨੀ ਨੂੰ, ਬਲਕਿ ਦੁਨੀਆ ਹੀ ਬਦਲ ਕੇ ਰੱਖ ਦਿੱਤਾ।