ਲੰਡਨ, 16 ਅਕਤੂਬਰ (ਪੋਸਟ ਬਿਊਰੋ)- ਬ੍ਰਿਟੇਨ ਦੇ ਰਾਜਕੁਮਾਰ ਪ੍ਰਿੰਸ ਹੈਰੀ ਅਤੇ ਮੇਗਨ ਮਾਰਕਲੇ ਦੇ ਸ਼ੁੱਭਚਿੰਤਕਾਂ ਨੂੰ ਕੱਲ੍ਹ ਸ਼ਾਹੀ ਮਹੱਲ ਨੇ ਚੰਗੀ ਖਬਰ ਦਿੰਦਿਆਂ ਐਲਾਨ ਕੀਤਾ ਕਿ ਦੋਵੇਂ ਜਲਦੀ ਮੰਮੀ-ਪਾਪਾ ਬਣਨ ਜਾ ਰਹੇ ਹਨ ਅਤੇ ਸ਼ਾਹੀ ਮਹੱਲ 'ਚ ਇਕ ਵਾਰ ਫਿਰ ਕਿਲਕਾਰੀਆਂ ਗੂੰਜਣਗੀਆਂ। ਇਹ ਜਾਣਕਾਰੀ ਉਸ ਵੇਲੇ ਸਾਂਝੀ ਕੀਤੀ ਗਈ ਹੈ, ਜਦੋਂ ਇਹ ਸ਼ਾਹੀ ਜੋੜਾ 37 ਸਾਲਾ ਮੇਗਨ ਮਾਰਕਲੇ ਤੇ 34 ਸਾਲਾ ਪ੍ਰਿੰਸ ਹੈਰੀ ਸਿਡਨੀ ਪਹੁੰਚੇ ਹਨ, ਜਿਥੇ ਉਹ ਆਸਟਰੇਲੀਆ ਅਤੇ ਨਿਊਜ਼ੀਲੈਂਡ ਦਾ 16 ਦਿਨਾਂ ਦੌਰਾ ਕਰ ਰਹੇ ਹਨ।
ਕਿੰਗਸਟਨ ਪੈਲੇਸ ਨੇ ਕਿਹਾ ਹੈ ਕਿ ਪੰਜ ਮਹੀਨੇ ਪਹਿਲਾਂ ਇਨ੍ਹਾਂ ਦੋਵਾਂ ਦਾ ਵਿਆਹ ਹੋਇਆ ਸੀ, ਅਸੀਂ ਇਸ ਵੇਲੇ ਇਹ ਖੁਸ਼ਖਬਰੀ ਲੋਕਾਂ ਨਾਲ ਸਾਂਝੀ ਕਰਨ ਦੀ ਖੁਸ਼ੀ ਲੈ ਰਹੇ ਹਾਂ। ਵਰਨਣ ਯੋਗ ਹੈ ਕਿ ਸ਼ਾਹੀ ਪਰਵਾਰ ਦਾ ਇਹ ਬੱਚਾ ਬ੍ਰਿਟੇਨ ਦੇ ਤਖਤ ਦਾ 17ਵਾਂ ਦਾਅਵੇਦਾਰ ਹੋਵੇਗਾ। ਇਸ ਖੁਸ਼ਖਬਰੀ ਬਾਰੇ ਮਹਾਰਾਣੀ ਐਲਿਜ਼ਾਬੈਥ ਅਤੇ ਸ਼ਾਹੀ ਪਰਵਾਰ ਦੇ ਹੋਰ ਮੈਂਬਰਾਂ ਨੂੰ ਬੀਤੇ ਦਿਨੀਂ ਦੱਸ ਦਿੱਤਾ ਗਿਆ ਸੀ, ਜਦੋਂ ਸ਼ਾਹੀ ਪਰਵਾਰ ਰਾਜਕੁਮਾਰੀ ਯੂਜੀਨੀ ਦੇ ਵਿਆਹ 'ਚ ਵਿੰਡਸਰ ਕੈਸਲ ਪਹੁੰਚਿਆ ਸੀ। ਖਬਰਾਂ ਅਨੁਸਾਰ ਮੇਗਨ 12 ਹਫਤਿਆਂ ਦੀ ਗਰਭਵਤੀ ਹੈ। ਦੱਸਣ ਯੋਗ ਹੈ ਕਿ ਹੈਰੀ ਦੇ ਮਾਤਾ ਪਿਤਾ, ਪ੍ਰਿੰਸ ਚਾਰਲਸ ਤੇ ਰਾਜਕੁਮਾਰੀ ਡਿਆਨਾ ਨੇ ਵੀ ਵਿਆਹ ਤੋਂ ਬਾਅਦ ਪਹਿਲਾ ਸਰਕਾਰੀ ਦੌਰਾ ਆਸਟਰੇਲੀਆ ਅਤੇ ਨਿਊਜ਼ੀਲੈਂਡ ਦਾ ਹੀ ਕੀਤਾ ਸੀ।