ਨਵੀਂ ਦਿੱਲੀ, 15 ਅਕਤੂਬਰ (ਪੋਸਟ ਬਿਊਰੋ)- ਚੀਨ ਦੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਗਲੇ ਮਹੀਨੇ ਅਰਜਨਟੀਨਾ `ਚ ਮਿਲਣਗੇ।
ਭਾਰਤ `ਚ ਚੀਨ ਦੇ ਰਾਜਦੂਤ ਲੂਓ ਹੁਈ ਨੇ ਇਸ ਦੀ ਜਾਣਕਾਰੀ ਦਿੱਤੀ ਹੈ। ਉਨ੍ਹਾਂ ਨੇ ਅਫਗਾਨ ਡਿਪਲੋਮੈਟਸ ਦੇ ਲਈ ਭਾਰਤ-ਚੀਨ ਦੇ ਸਾਂਝੇ ਸਿਖਲਾਈ ਪ੍ਰੋਗਰਾਮ ਦੇ ਉਦਘਾਟਨ ਮੌਕੇ ਦੱਸਿਆ ਕਿ ਦੋਵੇਂ ਨੇਤਾ ਜੀ-20 ਸਮਿਟ ਦੇ ਦੌਰਾਨ ਮਿਲਣਗੇ। ਚੀਨ ਦੇ ਰਾਜਦੂਤ ਨੇ ਕਿਹਾ ਹੈ ਕਿ ਇਹ ਪ੍ਰੋਗਰਾਮ ਅਫਗਾਨਿਸਤਾਨ `ਤੇ ਚੀਨ-ਭਾਰਤ ਸਹਿਯੋਗ ਦੀ ਦਿਸ਼ਾ `ਚ ਪਹਿਲਾ ਕਦਮ ਹੈ ਅਤੇ ਭਵਿੱਖ `ਚ ਇਹ ਹੋਰ ਮਜ਼ਬੂਤ ਹੋਵੇਗਾ। ਉਨ੍ਹਾਂ ਨੇ ਦੱਸਿਆ ਹੈ ਕਿ ਚੀਨ ਦੇ ਸਟੇਟ ਕੌਂਸਲਰ ਅਤੇ ਵਿਦੇਸ਼ ਮੰਤਰੀ ਵਾਂਗ ਪੀ ਦਸੰਬਰ ਮਹੀਨੇ ਵਿੱਚ ਭਾਰਤ ਦੀ ਯਾਤਰਾ ਕਰਨਗੇ।
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਰਾਸ਼ਟਰਤਪੀ ਜਿਨਪਿੰਗ ਦੀ ਮੁਲਾਕਾਤ ਨੂੰ ਕਾਫੀ ਅਹਿਮ ਮੰਨਿਆ ਜਾ ਰਿਹਾ ਹੈ। ਬੀਤੇ ਦਿਨਾਂ `ਚ ਡੋਕਲਾਮ `ਚ 73 ਦਿਨ ਚੱਲੇ ਫੌਜੀ ਅੜਿੱਕੇ ਤੋਂ ਬਾਅਦ ਭਾਰਤ ਤੇ ਚੀਨ ਆਪਣੇ ਸੰਬੰਧਾਂ ਨੂੰ ਸੁਧਾਰਨ ਦਾ ਯਤਨ ਕਰ ਰਹੇ ਹਨ। ਮੋਦੀ ਅਤੇ ਸ਼ੀ ਜਿਨਪਿੰਗ ਇਸ ਸਾਲ ਦੋ ਗੈਰ ਰਸਮੀ ਬੈਠਕਾਂ ਕਰ ਚੁੱਕੇ ਹਨ। ਪਹਿਲੀ ਬੈਠਕ ਜੂਨ ਵਿੱਚ ਸ਼ੰਘਾਈ ਸਹਿਯੋਗ ਆਰਗੇਨਾਈਜ਼ੇਸ਼ਨ (ਐੱਸ ਸੀ ਓ) ਦੇ ਸਮਾਗਮ ਦੌਰਾਨ ਵੁਹਾਨ `ਚ ਅਤੇ ਦੂਜੀ ਮੁਲਾਕਾਤ ਦੱਖਣੀ ਅਫਰੀਕਾ ਦੇ ਜੋਹਾਨੀਸਬਰਗ `ਚ ਬ੍ਰਿਕਸ ਸੰਮੇਲਨ ਦੇ ਦੌਰਾਨ ਜੁਲਾਈ ਵਿੱਚ ਹੋਈ ਸੀ।