ਟੋਰਾਂਟੋ, 15 ਅਕਤੂਬਰ (ਪੋਸਟ ਬਿਊਰੋ)- ਮਿਲਟਨ ਤੋ ਐਮਪੀਪੀ ਪਰਮ ਗਿੱਲ ਵਲੋਂ ਕੱਲ ਓਂਟਾਰੀਓ ਦੀ ਪਾਰਲੀਮੈਟ ਵਿਖੇ ਆਟੋ ਇੰਸ਼ੋਰਂੈਸ ਨੂੰ ਘੱਟ ਕਰਨ ਲਈ ਪੋਸਟਲ ਕੋਡ ਡਿਸਕ੍ਰਿਮੀਨੇਸ਼ਨ ਖਤਮ ਕਰਨ ਲਈ ਬਿਲ ਪੇਸ਼ ਕੀਤਾ ਗਿਆ ਹੈ। ਇਹ ਪ੍ਰਾਈਵੇਟ ਮੈਂਬਰਜ਼ ਬਿਲ ਆਟੋ ਇੰਸ਼ੋਰੈਸ ਕੰਪਨੀਆਂ ਨੂੰ ਕਿਸੇ ਵਿਅਕਤੀ ਦਾ ਪੋਸਟਲ ਕੋਡ ਜਾਂ ਫੋਨ ਕੋਡ ਵਰਤ ਕੇ ਇੰਸ਼ੋਰੈਸ ਰੇਟ ਤੈਅ ਕਰਨ ਦੀ ਪ੍ਰੀਕਿਰਿਆ ਵੀ ਰੋਕੇਗਾ। ਪਰਮ ਗਿੱਲ ਨੇ ਸਾਡੇ ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ 3-4 ਹਫ਼ਤੇ ਬਾਅਦ ਇਸ ਬਿਲ ਦੀ ਦੂਸਰੀ ਰੀਡਿੰਗ ਹੋਵੇਗੀ ਤੇ ਫਿਰ ਇਹ ਬਿਲ ਕਮੇਟੀ ਕੋਲ ਜਾਵੇਗਾ ਤੇ ਉਸ ਤੋਂ ਬਾਅਦ ਤੀਜੀ ਰੀਡਿੰਗ ਹੋਣ ਮਗਰੋ ਇਹ ਬਿਲ ਕਾਨੂੰਨ ਬਣ ਜਾਵੇਗਾ। ਇਸ ਨਵੇ ਕਾਨੂੰਨ ਤਹਿਤ ਸਾਰੇ ਓਂਟਾਰੀਓ ਵਿਚ ਇਕ ਹੀ ਇੰਸ਼ੋਰੈਸ ਰੇਟ ਲਾਗੂ ਹੋਣਗੇ, ਉਨ੍ਹਾਂ ਕਿਹਾ ਕਿ ਜੇਕਰ ਅੱਜ ਕੋਈ ਕੈਲੇਡਨ ਵਿਚ ਰਹਿ ਰਿਹਾ ਹੈ, ਉਸ ਦੇ ਡਰਾਈਵਿੰਗ ਰਿਕਾਰਡ ਮੁਤਾਬਿਕ ਤੇ ਕਾਰ ਦੇ ਮੇਕ ਅਤੇ ਮਾਡਲ ਮੁਤਾਬਿਕ ਉਹ ਇੰਸ਼ੋਰੈਸ ਦਾ 1 ਹਜ਼ਾਰ ਡਾਲਰ ਭਰ ਰਹੇ ਹਨ ਤੇ ਕੱਲ ਨੂੰ ਉਹ ਬਰੈਂਪਟਨ ਵਿਖੇ ਮੂਵ ਹੋ ਜਾਂਦੇ ਹਨ ਤਾਂ ਉਨ੍ਹਾਂ ਦੀ ਉਹੀ ਇੰਸ਼ੋਰੈਸ ਰਹੇਗੀ, ਜੋ ਉਨ੍ਹਾਂ ਦੇ ਡਰਾਈਵਿੰਗ ਰਿਕਾਰਡ ਤੇ ਕਾਰ ਮੇਕ ਮਾਡਲ ਦੇ ਤਹਿਤ ਕੈਲੇਡਨ ਵਿਚ ਦਿੱਤੀ ਜਾਂਦੀ ਸੀ। ਇਸ ਕਾਨੂੰਨ ਤਹਿਤ ਜਿਥੇ ਆਮ ਲੋਕਾਂ ਨੂੰ ਆਟੋ ਇੰਸ਼ੋਰੈਸ ਤੋਂ ਵੱਡੀ ਰਾਹਤ ਮਿਲੇਗੀ, ਉਥੇ ਹੀ ਟਰੱਕ ਤੇ ਟੈਕਸੀ ਚਾਲਕਾਂ ਨੂੰ ਵੀ ਵੱਡੀ ਰਾਹਤ ਮਿਲੇਗੀ। ਯਾਦ ਰਹੇ ਕਿ ਬਰੈਂਪਟਨ ਦੇ ਦੋ ਅਜਿਹੇ ਪੋਸਟਲ ਕੋਡ ਹਨ, ਜਿਥੇ ਕੈਨੇਡਾ ਭਰ ਵਿਚ ਸਭ ਨਾਲੋਂ ਮਹਿੰਗੀ ਇੰਸ਼ੋਰੈਸ ਦਿੱਤੀ ਜਾਂਦੀ ਹੈ। ਇਸ ਬਿਲ ਤੋਂ ਬਾਅਦ ਬਰੈਂਪਟਨ, ਸਕਾਰਬਰੋ ਦੇ ਏਰੀਆ, ਜਿਥੇ ਇੰਸ਼ੋਰੈਸ ਬਹੁਤ ਮਹਿੰਗੀ ਹੈ, ਉਥੇ ਦੇ ਡਰਾਇਵਰਾਂ ਨੂੰ ਰਾਹਤ ਮਿਲੇਗੀ। ਆਟੋ ਇੰਸ਼ੋਰੈਸ ਨੂੰ ਘੱਟ ਕਰਨ ਦੀ ਇੱਛਾ ਤਹਿਤ ਅੱਜ ਬਰੈਂਪਟਨ ਈਸਟ ਤੋਂ ਐਮਪੀਪੀ ਗੁਰਰਤਨ ਵੀ ਆਪਣਾ ਬਿਲ ਪੇਸ਼ ਕਰਨਗੇ। ਇਸ ਬਿਲ ਵਿਚ ਕੀ ਪਰਮ ਗਿੱਲ ਦੇ ਬਿਲ ਨਾਲੋਂ ਵੱਖਰਾ ਕੀ ਹੋਵੇਗਾ, ਅੱਜ ਇਸ ਦਾ ਖੁਲਾਸਾ ਹੋਵੇਗਾ।