ਲੁਧਿਆਣਾ, 15 ਅਕਤੂਬਰ (ਪੋਸਟ ਬਿਊਰੋ)- ਵਿਧਾਨ ਸਭਾ ਲੁਧਿਆਣਾ ਦੱਖਣੀ ਦੇ ਵਿਧਾਇਕ ਬਲਵਿੰਦਰ ਸਿੰਘ ਬੈਂਸ ਦੀ ਫਰਜ਼ੀ ਅਸ਼ਲੀਲ ਵੀਡੀਓ ਕਿਸੇ ਨੌਜਵਾਨ ਨੇ ਫੇਸਬੁੱਕ ਉਤੇ ਵਾਇਰਲ ਕਰ ਦਿੱਤੀ। ਇਸ ਦੇ ਵਾਇਰਲ ਹੁੰਦਿਆਂ ਹੀ ਫੇਸਬੁੱਕ ਉੱਤੇ ਭੂਚਾਲ ਆ ਗਿਆ ਅਤੇ ਲੋਕਾਂ ਨੇ ਤੁਰੰਤ ਇਸ 'ਤੇ ਕੁਮੈਂਟਸ ਕਰਨੇ ਸ਼ੁਰੂ ਕਰ ਦਿੱਤੇ।
ਫਰਜ਼ੀ ਅਸ਼ਲੀਲ ਵੀਡੀਓ ਪਾਉਣ ਵਾਲੇ ਨੌਜਵਾਨ ਨੇ ਵਿਧਾਇਕ ਬਲਵਿੰਦਰ ਸਿੰਘ ਬੈਂਸ ਦੀ ਫੋਟੋ ਵੀ ਨਾਲ ਲਾਈ ਹੋਈ ਸੀ ਤੇ ਉਸ 'ਤੇ ਕੁਮੈਂਟ ਕੀਤਾ ਹੋਇਆ ਸੀ। ਫਰਜ਼ੀ ਅਸ਼ਲੀਲ ਵੀਡੀਓ ਪਾਉਣ ਤੋਂ ਕਰੀਬ ਤਿੰਨ ਘੰਟੇ ਬਾਅਦ ਉਸ ਨੇ ਫੇਸਬੁੱਕ ਤੋਂ ਹਟਾ ਦਿੱਤੀ, ਪਰ ਹੰਗਾਮਾ ਚੱਲਦਾ ਰਿਹਾ।
ਇਸ ਦੀ ਜਾਣਕਾਰੀ ਮਿਲਦਿਆਂ ਸਾਰ ਵਿਧਾਇਕ ਬਲਵਿੰਦਰ ਸਿੰਘ ਬੈਂਸ ਨੇ ਇਸ ਦੀ ਸੂਚਨਾ ਪੁਲਸ ਕਮਿਸ਼ਨਰ ਸੁਖਚੈਨ ਸਿੰਘ ਗਿੱਲ ਨੂੰ ਫੋਨ 'ਤੇ ਦਿੱਤੀ। ਸਾਈਬਰ ਕਰਾਈਮ ਸੈਲ ਇਸ ਮਾਮਲੇ ਦੀ ਜਾਂਚ ਕਰਨ 'ਚ ਜੁਟ ਗਿਆ ਹੈ ਅਤੇ ਪਤਾ ਲੱਗਾ ਹੈ ਕਿ ਫੇਸਬੁੱਕ 'ਤੇ ਲਵਜੀਤ ਸਿੰਘ ਨਾਂ ਦੇ ਕਿਸੇ ਨੌਜਵਾਨ ਨੇ ਵਿਧਾਇਕ ਬੈਂਸ ਦੀ ਫਰਜ਼ੀ ਅਸ਼ਲੀਲ ਵੀਡੀਓ ਵਾਇਰਲ ਕੀਤੀ ਸੀ। ਵੀਡੀਓ ਵਾਇਰਲ ਕਰਦੇ ਸਮੇਂ ਉਸ ਨੇ ਫੇਸਬੁੱਕ 'ਤੇ ਕੁਮੈਂਟ ਕੀਤਾ ਕਿ ਅਕਾਲੀ ਦਲ ਤੋਂ ਬਾਅਦ ਲੋਕ ਇਨਸਾਫ ਪਾਰਟੀ ਦੇ ਆਗੂ ਦੀ ਪੋਰਨ ਵੀਡੀਓ ਆਈ। ਇਸ ਵੀਡੀਓ ਨੇ ਸ਼ਹਿਰ 'ਚ ਤਹਿਲਕਾ ਮਚਾ ਦਿੱਤਾ।