ਲੰਡਨ, 15 ਅਕਤੂਬਰ (ਪੋਸਟ ਬਿਊਰੋ)- ਉਤਰ ਪੱਛਮੀ ਇੰਗਲੈਂਡ ਵਿੱਚ ਰਹਿੰਦੇ ਭਾਰਤੀ ਮੂਲ ਦੇ ਜਿਸ ਵਿਅਕਤੀ ਦੀ ਅੱਖਾਂ ਦੀ ਰੌਸ਼ਨੀ ਘਟਦੀ ਜਾ ਰਹੀ ਹੈ, ਉਸ ਨੂੰ ਮਦਦ ਲਈ ਘੋੜਾ ਦਿੱਤਾ ਜਾਵੇਗਾ।
ਲੰਕਾਸ਼ਾਇਰ ਦੇ ਬਲੈਕਬਰਨ ਵਿੱਚ ਰਹਿੰਦੇ ਪੱਤਰਕਾਰ ਮੁਹੰਮਦ ਸਲੀਮ ਪਟੇਲ ਅੱਖਾਂ ਦੀ ਬਿਮਾਰੀ ਰੈਟਿਨੀਟਿਜ਼ ਪਿਗਮੈਨਟੋਸਾ ਨਾਲ ਪੀੜਤ ਹਨ ਤੇ ਉਨ੍ਹਾਂ ਦੀ ਸੱਜੀ ਅੱਖ ਵਿੱਚ ਥੋੜ੍ਹੀ ਜਿਹੀ ਰੌਸ਼ਨੀ ਬਾਕੀ ਬਚੀ ਹੈ। ਕੁਝ ਦੇਰ ਬਾਅਦ ਉਹ ਪੂਰੀ ਤਰ੍ਹਾਂ ਨੇਤਰਹੀਣ ਹੋ ਜਾਣਗੇ। 24 ਸਾਲਾ ਪਟੇਲ ਬਚਪਨ ਤੋਂ ਹੀ ਕੁੱਤਿਆਂ ਤੋਂ ਬਹੁਤ ਡਰਦੇ ਸਨ, ਇਸ ਲਈ ਉਨ੍ਹਾਂ ਨੂੰ ਮਦਦ ਲਈ ਘੋੜਾ ਦਿੱਤਾ ਜਾਵੇਗਾ। ਅਜਿਹੇ ਕੇਸਾਂ ਵਿੱਚ ਆਮ ਤੌਰ 'ਤੇ ਕੁੱਤੇ ਦੀ ਮਦਦ ਲਈ ਜਾਂਦੀ ਹੈ। ਪਟੇਲ ਨੇ ਦੱਸਿਆ ਕਿ ਉਨ੍ਹਾਂ ਦੀ ਮਦਦ ਕਰਨ ਵਾਲਾ ਘੋੜਾ (ਡਿਗਬੀ) ਅਜੇ ਬੱਚਾ ਹੈ ਅਤੇ ਮਈ 2019 ਵਿੱਚ ਉਹ ਦੋ ਸਾਲ ਦਾ ਹੋ ਜਾਵੇਗਾ। ਉਸ ਦੀ ਸਿਖਲਾਈ ਨੂੰ ਅਜੇ ਦੋ ਸਾਲ ਸਮਾਂ ਹੋਰ ਲੱਗੇਗਾ। ਉਨ੍ਹਾਂ ਨੂੰ ਉਮੀਦ ਹੈ ਕਿ ਇਸ ਮਗਰੋਂ ਉਹ ਘੋੜੇ ਨੂੰ ਬਲੈਕਬਰਨ ਆਪਣੇ ਨਾਲ ਲਿਜਾ ਸਕਣਗੇ। ਉਨ੍ਹਾਂ ਕਿਹਾ ਕਿ ਮਨੁੱਖ ਦੀ ਮਦਦ ਕਰਦੇ ਕੁੱਤੇ ਸੱਤ ਸਾਲ ਬਾਅਦ ਸੇਵਾਮੁਕਤ ਹੋ ਜਾਂਦੇ ਹਨ, ਜਦੋਂ ਕਿ ਘੋੜਾ (ਡਿਗਬੀ) 40 ਸਾਲ ਤੱਕ ਉਨ੍ਹਾਂ ਨਾਲ ਕੰਮ ਕਰੇਗਾ।