ਡਾਂਸ ਫਿਲਮ ‘ਮੁੰਨਾ ਮਾਈਕਲ’ ਵਿੱਚ ਟਾਈਗਰ ਸ਼ਰਾਫ ਦੇ ਆਪੋਜ਼ਿਟ ਡੈਬਿਊ ਕਰਨ ਪਿੱਛੋਂ ਨਿਧੀ ਅਗਰਵਾਲ ਨੇ ਕਈਆਂ ਦਾ ਧਿਆਨ ਆਪਣੇ ਵੱਲ ਖਿੱਚਿਆ ਹੈ। ਬਾਲੀਵੁੱਡ ਦੀਆਂ ਸਭ ਤੋਂ ਫਿੱਟ ਅਭਿਨੇਤਰੀਆਂ ਵਿੱਚ ਸ਼ਾਮਲ ਹੋ ਚੁੱਕੀ ਨਿਧੀ ਅਕਸਰ ਸੋਸ਼ਲ ਮੀਡੀਆ 'ਤੇ ਆਪਣੇ ਫੈਨਸ ਲਈ ਦਿਲਕਸ਼ ਫੋਟੋਜ਼ ਸ਼ੇਅਰ ਕਰਦੀ ਹੈ। ਜ਼ਿਕਰ ਯੋਗ ਹੈ ਕਿ ਫਿਲਮ ਨਗਰੀ 'ਚ ਬਾਹਰੀ ਹੋਣ ਦੇ ਬਾਵਜੂਦ ਉਸ ਆਪਣੇ ਦਮ ਉਤੇ ਪਛਾਣ ਬਣਾਈ ਹੈ। ਉਸ ਦੀ ਲੋਕਪ੍ਰਿਅਤਾ ਦਾ ਪਤਾ ਇਸੇ ਗੱਲ ਤੋਂ ਲੱਗਦਾ ਹੈ ਕਿ ਥੋੜ੍ਹੇ ਹੀ ਸਮੇਂ 'ਚ ਇੰਸਟਾਗ੍ਰਾਮ 'ਤੇ ਉਸ ਦੇ 10 ਲੱਖ ਤੋਂ ਵੱਧ ਫਾਲੋਅਰਸ ਬਣ ਚੁੱਕੇ ਹਨ।
ਇੰਨਾ ਹੀ ਨਹੀਂ, ਨਿਧੀ ਦੇ ਫੈਨਸ ਉਸ ਦਾ ਧਿਆਨ ਖਿੱਚਣ ਲਈ ਤਰ੍ਹਾਂ-ਤਰ੍ਹਾਂ ਦੇ ਯਤਨ ਕਰਨ ਤੋਂ ਵੀ ਪਿੱਛੇ ਨਹੀਂ ਹਟਦੇ। ਕੁਝ ਪ੍ਰਸ਼ੰਸਕ ਉਸ ਨੂੰ ਤਰ੍ਹਾਂ-ਤਰ੍ਹਾਂ ਦੇ ਗਿਫਟ ਭੇਜਦੇ ਹਨ ਤਾਂ ਕੁਝ ਹੋਰ ਅਨੋਖੇ ਤਰੀਕਿਆਂ ਨਾਲ ਕੁਝ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ। ਪਿਛਲੇ ਦਿਨੀਂ ਉਸ ਦੇ ਇੱਕ ਪੱਕੇ ਫੈਨ ਨੇ ਗ੍ਰੈਫਿਟੀ ਨਾਲ ਉਸ ਦਾ ਚਿੱਤਰ ਕੰਧ 'ਤੇ ਬਣਾ ਕੇ ਉਸ ਦੇ ਪ੍ਰਤੀ ਦੀਵਾਨਗੀ ਜ਼ਾਹਿਰ ਕੀਤੀ ਸੀ। ਇਸ ਚਿੱਤਰ ਵਿੱਚ ਨਿਧੀ ਦੇ ਚਿਹਰੇ ਦੀਆਂ ਸਾਰੀਆਂ ਬਰੀਕੀਆਂ ਨੂੰ ਉਭਾਰਨ ਲਈ ਉਸ ਨੇ ਕਾਫੀ ਮਿਹਨਤ ਕੀਤੀ ਅਤੇ ਟਵਿੱਟਰ 'ਤੇ ਸਾਂਝਾ ਕਰਦੇ ਹੋਏ ਲਿਖਿਆ, ‘ਆਸ ਹੈ ਕਿ ਨਿਧੀ ਅਗਰਵਾਲ ਮੈਮ ਇਹ ਪੇਂਟਿੰਗ ਪਸੰਦ ਕਰੇਗੀ।’ ਇਸ ਨੂੰ ਦੇਖ ਕੇ ਨਿਧੀ ਨੇ ਜਵਾਬ 'ਚ ਲਿਖਿਆ, ‘‘ਇਹ ਹੈਰਾਨੀ ਜਨਕ ਹੈ! ਧੰਨਵਾਦ।”