ਬੜੌਦਾ, 14 ਅਕਤੂਬਰ (ਪੋਸਟ ਬਿਊਰੋ)- ਬੜੌਦਾ ਰਾਜ ਘਰਾਣੇ ਦੀ ਮਹਾਰਾਣੀ ਰਾਧਿਕਾ ਰਾਜੇ ਗਾਇਕਵਾੜ ਅੱਜ ਕੱਲ੍ਹ ਆਪਣੇ ਪਰਵਾਰ ਦੀ ਪਰੰਪਰਾ ਤੋਂ ਲੋਕਾਂ ਨੂੰ ਜਾਣੂੰ ਕਰਾਉਣ ਲਈ ਲਗਾਤਾਰ ਕੰਮ ਕਰ ਰਹੀ ਹੈ। ਉਨ੍ਹਾਂ ਨੇ ਦਿੱਲੀ ਵਿੱਚ ਹੋਏ ਰਾਬ ਰਿਪੋਰਟ ਲਿਮਟਿਡ-2018 ਪ੍ਰੋਗਰਾਮ ਵਿੱਚ ‘ਦ ਗਾਇਕਵਾੜਾ ਜਵੈਲਸ 300 ਈਅਰਸ ਆਫ ਟ੍ਰੈਡੀਸ਼ਨ’ ਸੈਸ਼ਨ ਵਿੱਚ ਰਾਜ ਘਰਾਣੇ ਦੀਆਂ ਪ੍ਰੰਪਰਾਵਾਂ ਅਤੇ ਵਿਰਾਸਤ ਦੇ ਬਾਰੇ ਗੱਲ ਕੀਤੀ।
ਵਰਨਣ ਯੋਗ ਹੈ ਕਿ ਰਾਧਿਕਾ ਰਾਜੇ ਬੜੌਦਾ ਰਾਜ ਘਰਾਣੇ ਦੇ ਮਹਾਰਾਜਾ ਸਮਰਜੀਤ ਸਿੰਘਾਰਾਓ ਗਾਇਕਵਾੜ ਦੀ ਪਤਨੀ ਹੈ। ਪ੍ਰੋਗਰਾਮ ਦੌਰਾਨ ਉਨ੍ਹਾਂ ਨੇ ਗਾਇਕਵਾੜ ਵੰਸ਼ ਦੇ ਇਤਿਹਾਸ ਬਾਰੇ ਵੀ ਗੱਲਬਾਤ ਕੀਤੀ ਤੇ ਦੱਸਿਆ ਕਿ ਰਾਜਾ-ਮਹਾਰਾਜਾ ਹਮੇਸ਼ਾ ਤੋਂ ਖੂਬਸੂਰਤ ਚੀਜ਼ਾਂ ਪ੍ਰਤੀ ਆਕਰਸ਼ਿਤ ਰਹੇ ਹਨ। ਆਪਣੀ ਵਿਰਾਸਤ ਦੇ ਬਾਰੇ ਗੱਲਬਾਤ ਕਰਦੇ ਹੋਏ ਮਹਾਰਾਣੀ ਨੇ ਕਿਹਾ, ‘1721 ਦਾ ਸਾਲ ਸੀ, ਜਦ ਮਰਾਠਾ ਆਰਮੀ ਦੇ ਦਮਾਜੀਰਾਓ ਗਾਇਕਵਾੜ ਉਤੇ ਸਾਹੂ ਮਹਾਰਾਜ ਦਾ ਧਿਆਨ ਗਿਆ। ਉਨ੍ਹਾਂ ਨੂੰ ਸ਼ਮਸ਼ੇਰ ਦੀ ਉਪਾਧੀ ਮਿਲੀ। ਉਨ੍ਹਾਂ ਦੇ ਭਤੀਜੇ ਪਿਲਾਜੀਰਾਓ ਗਾਇਕਵਾੜ ਨੇ ਵੀ ਯੁੱਧ ਅਤੇ ਕੂਟਨੀਤੀ ਨਾਲ ਆਪਣਾ ਖੇਤਰ ਵਧਾਇਆ। ਦਮਾਜੀਰਾਓ ਨੇ ਮੁਗਲਾਂ ਨੂੰ ਹਰਾਇਆ ਤੇ ਬੜੌਦਾ ਵੀ ਜਿੱਤ ਲਿਆ। ਇਸ ਦੇ ਬਾਅਦ ਉਹ ਕਦੇ ਮਹਾਰਾਸ਼ਟਰ ਨਹੀਂ ਆਏ ਅਤੇ ਗੁਜਰਾਤ ਨੂੰ ਹੀ ਆਪਣਾ ਟਿਕਾਣਾ ਬਣਾ ਲਿਆ।’ ਮਹਰਾਣੀ ਨੇ ਦੱਸਿਆ ਕਿ ਇਸ ਦੇ ਬਾਅਦ ਜਵੈਲਰਸ, ਬੁਨਕਰ ਗਾਇਕਵਾੜ ਦੀ ਸ਼ਰਨ ਆ ਗਏ ਸਨ। 19ਵੀਂ ਸਦੀ ਵਿੱਚ ਹੀ ਗਾਇਕਵਾੜ ਇੰਟਰਨੈਸ਼ਨਲ ਜਵੈਲਰਸ ਡੀਲਰਸ ਬਣ ਗਏ। 1867 ਵਿੱਚ ਗਾਇਕਵਾੜ ਰਾਜ ਨੇ ਇੱਕ ਅਜਿਹਾ ਹੀਰਾ ਖਰੀਦਿਆ, ਜੋ ਕੋਹੇਨੂਰ ਤੋਂ ਵੱਡਾ ਸੀ। ਮਹਾਰਾਣੀ ਨੇ ਦੱਸਿਆ ਕਿ ਇਹ ਹੀਰਾ ਇੱਕ ਬਲੈਕ ਮਹਿਲਾ ਨੂੰ ਬਰਾਜੀਲ ਵਿੱਚ ਲੱਭਿਆ ਸੀ।