ਸ੍ਰੀਨਗਰ, 14 ਅਕਤੂਬਰ (ਪੋਸਟ ਬਿਊਰੋ)- ਕਸ਼ਮੀਰ ਵਿੱਚ ਅਲ ਕਾਇਦਾ ਦੀ ਪਛਾਣ ਸਮਝੇ ਜਾਂਦੇ ਜ਼ਾਕਿਰ ਮੂਸਾ ਨੂੰ ਕੱਲ੍ਹ ਸੁਰੱਖਿਆ ਦਸਤਿਆਂ ਦੀ ਕਾਰਵਾਈ ਨਾਲ ਵੱਡਾ ਝਟਕਾ ਲੱਗਾ ਹੈ। ਉਸ ਦਾ ਸੱਜਾ ਹੱਥ ਕਹੇ ਜਾਂਦੇ ਅੱਤਵਾਦੀ ਸ਼ਬੀਰ ਅਹਿਮਦ ਡਾਰ ਉਰਫ ਸ਼ਬੀਰ ਮਾਲੀ ਨੂੰ ਬਾਬਗੁੰਡ, ਪੁਲਵਾਮਾ ਵਿੱਚ ਮਾਰ ਦਿੱਤਾ ਗਿਆ ਹੈ। ਇਸ ਦੌਰਾਨ ਮੁਕਾਬਲੇ ਵਿੱਚ ਜ਼ਖਮੀ ਹੋਣ ਦੇ ਬਾਵਜੂਦ ਬਚ ਨਿਕਲਿਆ ਅੱਤਵਾਦੀ ਸ਼ੌਕਤ ਬਾਅਦ ਵਿੱਚ ਹਸਪਤਾਲ ਵਿੱਚ ਦਮ ਤੋੜ ਗਿਆ, ਪਰ ਇੱਕ ਹੋਰ ਅੱਤਵਾਦੀ ਜਹੂਰ ਠੋਕਰ ਭੱਜਣ ਵਿੱਚ ਕਾਮਯਾਬ ਰਿਹਾ।
ਪਤਾ ਲੱਗਾ ਹੈ ਕਿ ਸ਼ੁੱਕਰਵਾਰ ਅੱਧੀ ਰਾਤ ਵੇਲੇ 55-ਆਰ ਆਰ (ਰਾਸ਼ਟਰੀ ਰਾਈਫਲਜ਼) ਦਾ ਇੱਕ ਪੈਟਰੋਲ ਟੀੰ ਆਪਣੇ ਕੈਸਪਰ ਵਾਹਨ ਉਤੇ ਬਾਗੁੰਡ, ਪੁਲਵਾਮਾ ਤੋਂ ਲੰਘ ਰਹੀ ਸੀ। ਪਿੰਡ ਦੇ ਬਾਹਰੀ ਹਿੱਸੇ ਤੋਂ ਲੰਘਦੇ ਜਵਾਨਾਂ 'ਤੇ ਉਥੇ ਲੁਕੇ ਅੱਤਵਾਦੀਆਂ ਨੇ ਆਪਣੇ ਆਧੁਨਿਕ ਹਥਿਆਰਾਂ ਨਾਲ ਫਾਇਰਿੰਗ ਕਰ ਦਿੱਤੀ। ਜਵਾਨਾਂ ਨੇ ਪੁਜੀਸ਼ਨ ਲੈ ਕੇ ਜਵਾਬੀ ਫਾਇਰ ਕਰ ਕੇ ਇਲਾਕੇ ਦੀ ਘੇਰਾਬੰਦੀ ਕਰ ਲਈ। ਇਸ ਪਿੱਛੋਂ ਤੜਕੇ ਤੱਕ ਦੋਵਾਂ ਪਾਸਿਉਂ ਗੋਲੀ ਚੱਲਦੀ ਰਹੀ। ਇਸ ਦੌਰਾਨ ਅੱਤਵਾਦੀਆਂ ਦਾ ਟਿਕਾਣਾ ਬਣਿਆ ਇੱਕ ਮਕਾਨ ਜ਼ੋਰਦਾਰ ਧਮਾਕੇ ਨਾਲ ਤਬਾਹ ਹੋ ਗਿਆ। ਅੱਤਵਾਦੀਆਂ ਵੱਲੋਂ ਚਲਾਈਆਂ ਗੋਲੀਆਂ ਬੰਦ ਹੋਣ 'ਤੇ ਜਵਾਨਾਂ ਨੇ ਮੁਕਾਬਲੇ ਵਾਲੀ ਥਾਂ ਦੀ ਤਲਾਸ਼ੀ ਲਈ ਤਾਂ ਉਨ੍ਹਾਂ ਨੂੰ ਇੱਕ ਅੱਤਵਾਦੀ ਦੀ ਲਾਸ਼ ਮਿਲੀ, ਜਿਸ ਦੀ ਪਛਾਣ ਸਾਂਬੁਰਾ ਪੰਪੌਰ ਦੇ ਸ਼ਬੀਰ ਅਹਿਮਦ ਡਾਰ ਉਰਫ ਸ਼ਬੀਰ ਮਾਲੀ ਦੇ ਰੂਪ ਵਿੱਚ ਹੋਈ। ਉਹ ਅੰਸਾਰ ਉਲ ਗਜਵਾ ਦੇ ਹਿੰਦ ਦੇ ਵੱਡੇ ਅੱਤਵਾਦੀਆਂ ਵਿੱਚੋਂ ਸੀ ਅਤੇ ਜ਼ਾਕਿਰ ਮੂਸਾ ਦਾ ਸੱਜਾ ਹੱਥ ਕਿਹਾ ਜਾਂਦਾ ਹੈ।