ਪੂਰਬੀ ਦਿੱਲੀ, 14 ਅਕਤੂਬਰ (ਪੋਸਟ ਬਿਊਰੋ)- ਤਿਉਹਾਰਾਂ ਦੇ ਸੀਜ਼ਨ ਦੌਰਾਨ ਟਰੇਨਾਂ ਵਿੱਚ ਟਿਕਟ ਦੇ ਲਈ ਕਾਫੀ ਮੁਸ਼ਕਲ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਇਸ ਮੌਕੇ ਲੋਕ ਵੱਧ ਕੀਮਤ 'ਤੇ ਵੀ ਟਿਕਟ ਖਰੀਦਣ ਨੂੰ ਤਿਆਰ ਹੋ ਜਾਂਦੇ ਹਨ। ਇਸ ਦਾ ਫਾਇਦਾ ਲੈਣ ਲਈ ਦਲਾਲ ਸਰਗਰਮ ਹਨ, ਜਿਨ੍ਹਾਂ ਵਿੱਚੋਂ ਦੋ ਦਲਾਲਾਂ ਨੂੰ ਦਿੱਲੀ ਦੇ ਸ਼ਾਹਦਰਾ ਤੇ ਆਨੰਦ ਵਿਹਾਰ ਰੇਲਵੇ ਸਟੇਸ਼ਨ ਉੱਤੇ ਆਰ ਪੀ ਐੱਫ ਨੇ ਆਈ ਆਰ ਸੀ ਟੀ ਸੀ (ਭਾਰਤੀ ਰੇਲਵੇ ਖਾਣ-ਪਾਣ ਅਤੇ ਸੈਰ ਸਪਾਟਾ ਨਿਗਮ) ਨਾਲ ਮਿਲ ਕੇ ਫੜਿਆ ਹੈ। ਇਹ ਦਲਾਲ ਕਰੀਬ ਅੱਠ ਕਰੋੜ ਸੱਠ ਲੱਖ ਰੁਪਏ ਦੀਆਂ ਈ-ਟਿਕਟਾਂ ਬੁੱਕ ਕਰ ਚੁੱਕੇ ਸਨ। ਦੋਸ਼ੀਆਂ ਦੀ ਪਛਾਣ ਚਕੀਆ, ਮੁਜ਼ੱਫਰਪੁਰ (ਬਿਹਾਰ) ਵਾਸੀ ਨਮਨ ਕੁਮਾਰ ਕਨੌਡੀਆ (24) ਅਤੇ ਸ਼ਕਰਪੁਰ, ਦਿੱਲੀ ਦੇ ਸੋਨੂੰ (22) ਦੇ ਰੂਪ ਵਿੱਚ ਹੋਈ ਹੈ। ਦੋਵਾਂ ਦੇ ਲੈਪਟਾਪ ਅਤੇ ਮੋਬਾਈਲ ਜ਼ਬਤ ਕਰ ਲਏ ਗਏ ਹਨ।
ਇਸ ਕੇਸ ਦੀ ਜਾਂਚ ਵਿੱਚ ਪਤਾ ਲੱਗਾ ਹੈ ਕਿ ਟਿਕਟ ਦੇ ਲਈ ਨਮਨ ਕੁਮਾਰ ਕਨੌਡੀਆ ਆਈ ਆਰ ਸੀ ਟੀ ਸੀ ਦੇ 63 ਅਤੇ ਸੋਨੂੰ 65 ਅਕਾਊਂਟ (ਯੂਜ਼ਰ ਆਈ ਡੀ) ਦੀ ਵਰਤੋਂ ਕਰਦੇ ਸਨ। ਇਨ੍ਹਾਂ ਸਾਰੇ 128 ਅਕਾਊਂਟਸ ਨੂੰ ਬੰਦ ਕਰ ਦਿੱਤਾ ਗਿਆ ਹੈ। ਕੱਲ੍ਹ ਸ਼ਾਮ ਸੂਚਨਾ ਮਿਲੀ ਸੀ ਕਿ ਸੀਲਮਪੁਰ ਮੈਟਰੋ ਸਟੇਸ਼ਨ 'ਤੇ ਨਮਨ ਕੁਮਾਰ ਗ੍ਰਾਹਕਾਂ ਨੂੰ ਟਿਕਟ ਦੇਣ ਲਈ ਆ ਰਿਹਾ ਹੈ। ਇਸ ਉਤੇ ਆਰ ਪੀ ਐੱਫ ਨੇ ਦੋਸ਼ੀ ਨੂੰ ਕਾਬੂ ਕਰ ਲਿਆ। ਪੁੱਛਗਿੱਛ ਵਿੱਚ ਪਤਾ ਲੱਗਾ ਕਿ ਉਹ ਵੈਭਵ ਖੰਡ, ਇੰਦਰਾਪੁਰਮ, ਗਾਜ਼ੀਆਬਾਦ ਵਿੱਚ ਰਹਿੰਦਾ ਹੈ। ਟੀਮ ਨੇ ਉਸ ਦੇ ਘਰੋਂ 15 ਅਕਤੂਬਰ ਤੋਂ ਨਵੰਬਰ ਵਿਚਾਲੇ ਹੋਣ ਵਾਲੀ ਯਾਤਰਾ ਦੇ ਦੋ ਲੱਖ 65 ਹਜ਼ਾਰ ਰੁਪਏ ਮੁੱਲ ਦੇ 66 ਈ-ਟਿਕਟ ਬਰਾਮਦ ਕੀਤੇ ਹਨ। ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਉਹ ਇਸ ਸਾਲ ਨੱਬੇ ਲੱਖ 26 ਹਜ਼ਾਰ ਰੁਪਏ ਕੀਮਤ ਦੇ 4250 ਈ-ਟਿਕਟਾਂ ਬੁੱਕ ਕਰ ਚੁੱਕਾ ਹੈ।