ਹੁਸ਼ਿਆਰਪੁਰ, 14 ਅਕਤੂਬਰ (ਪੋਸਟ ਬਿਊਰੋ)- ਵਧੀਕ ਜ਼ਿਲ੍ਹਾ ਸੈਸ਼ਨ ਜੱਜ ਹੁਸ਼ਿਆਰਪੁਰ ਰਣਜੀਤ ਕੁਮਾਰ ਜੈਨ ਦੀ ਕੋਰਟ ਨੇ ਬੀਤੇ ਦਿਨ ਨਕਲੀ ਦਵਾਈਆਂ ਨੂੰ ਅਸਲੀ ਕੰਪਨੀਆਂ ਦਾ ਲੇਬਲ ਲਾ ਕੇ ਵੇਚਣ ਦੇ ਮਾਮਲੇ ਵਿੱਚ ਦੋਸ਼ੀ ਪਾਏ ਗਏ ਇੱਕ ਫੈਕਟਰੀ ਮਾਲਕ ਨਰਿੰਦਰ ਮੋਹਨ ਰਾਠੌੜ ਵਾਸੀ ਸੈਕਟਰ ਦੋ ਤਲਵਾੜਾ ਨੂੰ ਸੱਤ ਸਾਲ ਕੈਦ ਅਤੇ ਤਿੰਨ ਲੱਖ ਰੁਪਏ ਜੁਰਮਾਨੇ ਦੀ ਸਜ਼ਾ ਸੁਣਾਈ ਹੈ। ਜੁਰਮਾਨਾ ਨਾ ਦਿੱਤਾ ਤਾਂ ਇੱਕ ਸਾਲ ਹੋਰ ਸੋਜ਼ਾ ਭੁਗਤਣੀ ਪਵੇਗੀ।
ਡਰੱਗ ਇੰਸਪੈਕਟਰ ਪਰਮਿੰਦਰ ਸਿੰਘ ਨੇ ਛੇ ਦਸੰਬਰ 2013 ਨੂੰ ਸਿਵਲ ਹਸਪਤਾਲ ਮੁਕੇਰੀਆਂ ਦੇ ਨੇੜੇ ਐੱਮ ਐੱਸ ਬਤਰਾ ਮੈਡੀਕੋੋ ਨਾਂਅ ਦੀ ਦਵਾਈਆਂ ਦੀ ਦੁਕਾਨ 'ਤੇ ਰੇਡ ਕਰ ਕੇ ਉਥੋਂ ਤਿੰਨ ਦਵਾਈਆਂ ਦੇ ਸੈਂਪਲ ਭਰੇ ਸਨ, ਜੋ ਫੇਲ ਹੋ ਗਏ। ਇਸ ਦੇ ਬਾਅਦ ਉਨ੍ਹਾਂ ਨੇ ਕੇਸ ਅਦਾਲਤ ਵਿੱਚ ਭੇਜਿਆ। ਦੋਸ਼ੀ ਨੇ ਹਿਮਾਚਲ ਦੇ ਟੈਰੇਸ ਨਾਂਅ ਦੇ ਸਥਾਨ 'ਤੇ ਮੈਡੋਕਸ ਲਾਈਫ ਸਾਇੰਸਿਜ਼ ਨਾਂਅ ਦੀ ਦਵਾਈਆਂ ਦੀ ਫੈਕਟਰੀ ਲਗਾਈ ਹੈ। ਦੋਸ਼ੀ ਨੇ ਆਪਣੀ ਫੈਕਟਰੀ ਲੀਜ਼ 'ਤੇ ਦਿੱਤੀ ਹੈ। ਡਰੱਗ ਇੰਸਪੈਕਟਰ ਨੇ ਦੱਸਿਆ ਕਿ ਉਹ ਸਜ਼ਾ ਦੇ ਆਰਡਰ ਹਿਮਾਚਲ ਦੇ ਡਰੱਗ ਕੰਟਰੋਲਰ ਨੂੰ ਭੇਜਣਗੇ ਅਤੇ ਉਹੀ ਇਸ ਬਾਰੇ ਅਗਲੀ ਕਾਰਵਾਈ ਕਰ ਸਕਦੇ ਹਨ। ਡਰੱਗ ਇੰਸਪੈਕਟਰ ਪਰਮਿੰਦਰ ਸਿੰਘ ਨੇ ਦੱਸਿਆ ਕਿ ਸਟੇਟ ਲੈਬੋਰਟਰੀ ਚੰਡੀਗੜ੍ਹ ਤੋਂ ਸੈਂਪਲ ਫੇਲ ਹੋਣ ਦੇ ਬਾਅਦ, ਜਦ ਇਹ ਰਿਪੋਰਟ ਅਦਾਲਤ ਵਿੱਚ ਪੇਸ਼ ਕੀਤੀ ਤਾਂ ਦੋਸ਼ੀ ਨੇ ਇਸ ਨੂੰ ਦੋਬਾਰਾ ਚੈਲੇਂਜ ਕੀਤਾ। ਇਸ ਕਾਰਨ ਇਸ ਨੂੰ ਦੋਬਾਰਾ ਚੈਕ ਕਰਨ ਲਈ ਕੋਲਕਾਤਾ ਸਥਿਤ ਦੇਸ਼ ਦੀ ਸਭ ਤੋਂ ਵੱਡੀ ਲੈਬ ਸੈਂਟਰਲ ਡਰੱਗ ਲੈਬੋਰਟਰੀ ਵਿੱਚ ਭੇਜਿਆ ਗਿਆ, ਜਿਸ ਦੇ ਆਧਾਰ ਉੱਤੇ ਸਜ਼ਾ ਹੋਈ ਹੈ।