ਕਾਹਿਰਾ, 19 ਅਗਸਤ (ਪੋਸਟ ਬਿਊਰੋ)- ਕਰੀਬ ਦੋ ਸਾਲ ਪਹਿਲਾਂ ਸੁੰਨੀ ਮੁਸਲਮਾਂ ਦੀ ਸਿਖਲਾਈ ਸੰਸਥਾ ਅਲ ਅਜਹਰ ਵਿੱਚੋਂ ਉਈਗਰ ਵਿਦਿਆਰਥੀ ਅਬੁਦਲਮਲਿਕ ਅਬੁਦਲਅਜ਼ੀਜ ਨੂੰ ਮਿਸਰ ਦੀ ਪੁਲਸ ਨੇ ਗ੍ਰਿਫਤਾਰ ਕੀਤਾ ਸੀ। ਪੁਲਸ ਨੇ ਪਹਿਲਾਂ ਉਨ੍ਹਾਂ ਨੂੰ ਹੱਥਕੜੀ ਲਾਈ ਅਤੇ ਫਿਰ ਉਨ੍ਹਾਂ ਦਾ ਚਿਹਰਾ ਢੱਕ ਦਿੱਤਾ। ਜਦ ਉਨ੍ਹਾਂ ਨਕਾਬ ਹਟਾਇਆ ਗਿਆ ਤਾਂ ਉਹ ਰਾਜਧਾਨੀ ਕਾਹਿਰਾ ਦੇ ਥਾਣੇ ਵਿੱਚ ਸਨ ਤੇ ਚੀਨੀ ਅਧਿਕਾਰੀ ਉਨ੍ਹਾਂ ਤੋਂ ਪੁੱਛਗਿੱਛ ਕਰ ਰਹੇ ਸਨ।
ਅਬਦੁਲਅਜ਼ੀਜ ਇਕੱਲੇ ਉਈਗਰ ਨਹੀਂ ਹੈ, ਜਿਨ੍ਹਾਂ ਨੂੰ ਇਸ ਤਰ੍ਹਾਂ ਗ੍ਰਿਫਤਾਰ ਕਰਕੇ ਇਥੇ ਚੀਨ ਦੇ ਹਵਾਲੇ ਕਰ ਦਿੱਤਾ ਗਿਆ ਸੀ। ਜੁਲਾਈ 2017 ਵਿੱਚ 90 ਤੋਂ ਵੱਧ ਉਈਗਰ ਮੁਸਲਮਾਨਾਂ ਨੂੰ ਮਿਸਰ ਵਿੱਚ ਏਦਾਂ ਹੀ ਹਿਰਾਸਤ ਵਿੱਚ ਲੈ ਲਿਆ ਗਿਆ ਸੀ। ਉਨ੍ਹਾਂ ਵਿੱਚੋਂ ਕਈ ਅਲ ਅਜਹਰ ਵਿੱਚ ਇਸਲਾਮ ਦੀ ਪੜ੍ਹਾਈ ਕਰ ਰਹੇ ਸਨ। ਅਬਦੁਲਅਜ਼ੀਜ ਨੇ ਕਿਹਾ, ‘ਚੀਨੀ ਅਧਿਕਾਰੀ ਮੈਨੂੰ ਮੇਰੇ ਉਈਗਰ ਨਹੀਂ, ਬਲਕਿ ਚੀਨੀ ਨਾਮ ਨਾਲ ਸੰਬੋਧਨ ਕਰਦੇ ਸਨ। ਮਿਸਰ ਦੀ ਪੁਲਸ ਨੇ ਦੱਸਿਆ ਕਿ ਚੀਨ ਸਰਕਾਰ ਮੈਨੂੰ ਅੱਤਵਾਦੀ ਦੱਸ ਰਹੀ ਹੈ, ਪਰ ਮੈਂ ਉਨ੍ਹਾਂ ਨੂੰ ਨਹੀਂ ਵਿੱਚ ਜਵਾਬ ਦਿੱਤਾ ਸੀ।'
ਗ੍ਰਿਫਤਾਰ ਕੀਤੇ ਗਏ ਹੋਰ ਲੋਕਾਂ ਤੋਂ ਵੀ ਏਦਾਂ ਦੇ ਸਵਾਲ ਪੁੱਛੇ ਗਏ ਸਨ। ਕਈ ਦਿਨ ਹਿਰਾਸਤ ਵਿੱਚ ਰੱਖਣ ਤੋਂ ਬਾਅਦ ਸਾਰਿਆਂ ਨੂੰ ਤਿੰਨ ਗਰੁੱਪਾਂ ਵਿੱਚ ਵੰਡ ਕੇ ਲਾਲ, ਪੀਲੇ ਅਤੇ ਹਰੇ ਕਾਰਡ ਦਿੱਤੇ ਗਏ ਸਨ। ਇਨ੍ਹਾਂ ਕਾਰਡਾਂ ਤੋਂ ਤੈਅ ਹੁੰਦਾ ਸੀ ਕਿ ਉਨ੍ਹਾਂ ਨੂੰ ਰਿਹਾਅ ਕਰਨਾ ਹੈ, ਹਿਰਾਸਤ ਵਿੱਚ ਰੱਖਣਾ ਹੈ ਜਾਂ ਅੱਗੇ ਪੁੱਛਗਿੱਛ ਕੀਤੀ ਜਾਣੀ ਹੈ। ਨਾਰਵੇ ਵਿੱਚ ਰਹਿਣ ਵਾਲੇ ਭਾਸ਼ਾ ਮਾਹਰ ਅਬਦੁਲਵੇਲੀ ਅਯੂਪ ਕਹਿੰਦੇ ਹਨ, ਚੀਨ ਦੇ ਸ਼ਿਨਜ਼ਿਯਾਂਗ ਪ੍ਰਾਂਤ ਵਿੱਚ ਇਹੀ ਕੀਤਾ ਜਾਂਦਾ ਹੈ।